ഹൈദരാബാദ് : പുഷ്പ 2 പ്രീമിയർ ഷോക്കിടെ ഉണ്ടായ തിക്കിലും തിരക്കിലും പെട്ട് മരിച്ച രേവതിയുടെ മകന് രണ്ടുകോടി രൂപ നൽകുമെന്ന് നടൻ അല്ലു അർജുന്റെ പിതാവ് അല്ലു അരവിന്ദ്. രേവതിയുടെ മകൻ എട്ടുവയസ്സുകാരനായ ശ്രീ തേജ് ആശുപത്രിയിൽ ചികിത്സയിൽ തുടരുകയാണ്. കുട്ടിയുടെയും കുടുംബത്തിന്റെയും ഭാവിക്കായി ആണ് ഈ തുക നൽകുന്നത് എന്നും അല്ലു അരവിന്ദ് അറിയിച്ചു.
ശ്രീതേജിന് നൽകാൻ തീരുമാനിച്ചിട്ടുള്ള രണ്ടുകോടി രൂപയിൽ ഒരു കോടി രൂപ അല്ലു അർജുനും ഒരു കോടി രൂപ മൈത്രി മൂവി മേക്കേഴ്സും സംവിധായകൻ സുകുമാറും ചേർന്നാണ് നൽകുന്നത് എന്നും അല്ലു അരവിന്ദ് വ്യക്തമാക്കി. രേവതിയുടെ കുടുംബത്തെ നേരിൽ കാണുന്നതിനോ ബന്ധപ്പെടുന്നതിനോ നിയമപരമായി തടസ്സമുള്ളതിനാൽ ഈ തുക തെലങ്കാന ചലച്ചിത്ര വികസന കോർപറേഷൻ ചെയർപേഴ്സൺ ദിൽ രാജുവിനെ ഏൽപ്പിക്കുമെന്നും അദ്ദേഹം അറിയിച്ചു.
ശ്രീതേജിൻ്റെ വെൻ്റിലേറ്റർ നീക്കിയെന്നും കുട്ടിക്ക് ഇപ്പോൾ സ്വയം ശ്വസിക്കാനായി സാധിക്കുന്നുണ്ട് എന്ന് അറിയാൻ കഴിഞ്ഞതായും അല്ലു അരവിന്ദ് അറിയിച്ചു. കുട്ടിയുടെ നില മെച്ചപ്പെടുന്നതിൽ വളരെയേറെ സന്തോഷമുണ്ട്. അവൻ പെട്ടെന്ന് തന്നെ ജീവിതത്തിലേക്ക് നടന്നു വരും എന്നുള്ള വിശ്വാസവും പ്രാർത്ഥനയും ഉണ്ട് എന്നും അദ്ദേഹം സൂചിപ്പിച്ചു.
