ഓണ്ലൈന് ഫുഡ് ഡെലിവറി പ്ലാറ്റഫോം സോമറ്റോ എല്ലാ വര്ഷവും തങ്ങളുടെ വാര്ഷിക റിപ്പോര്ട്ട് പുറത്ത് വിടാറുണ്ട്. ഇപ്പോഴിതാ 2024ലെ ട്രെന്ഡിംഗ് ഭക്ഷണങ്ങളുടെ ലിസ്റ്റ് പുറത്തുവിട്ടിരിക്കുകയാണ് സൊമാറ്റോ ഇന്ത്യക്കാരുടെ ഭക്ഷണ പ്രിയവും 2024 ലെ ട്രെന്ഡിങ് ഭക്ഷണവും ഉള്പ്പടെ എന്തും ഇത് നോക്കിയാല് മനസിലാക്കാന് കഴിയും. റിപ്പോര്ട്ട് പ്രകാരം, ലിസ്റ്റില് തുടര്ച്ചയായ ഒന്പതാം വര്ഷവും ഒന്നാം സ്ഥാനത്തുള്ളത് ബിരിയാണിയാണ്.
2024-ല് 9,13,99,110 ബിരിയാണിയാണ് സോമറ്റോ ഡെലിവറി ചെയ്തിട്ടുള്ളത്. ഓരോ സെക്കന്ഡിലും മൂന്നിലധികം ബിരിയാണികള് വിതരണം ചെയ്തതായി കണക്കുകള് വ്യക്തമാക്കുന്നു. ബിരിയാണിക്ക് തൊട്ടുപിന്നാലെ, രണ്ടാം സ്ഥാനം നേടിയത് പിസ്സയാണ്, രാജ്യത്തുടനീളം സോമാറ്റോ 5,84,46,908 പിസകള് വിതരണം ചെയ്തു.
അതേസമയം, പാനീയങ്ങളിലേക്ക് വരുമ്പോള് ഈ വര്ഷം ചായ കാപ്പിയെ മറികടന്നു. 77,76,725 കപ്പ് ചായയാണ് സോമറ്റോ 2024 ല് മാത്രം ഡെലിവറി ചെയ്തത്. അതേസമയം ഡെലിവറി ചെയ്ത കോഫിയുടെ എണ്ണം 74,32,856 ആണ്.
സോമറ്റോ വഴി റെസ്റോറന്റുകളില് ടേബിളുകള് റിസര്വ് ചെയ്യാനുള്ള സൗകര്യവുമുണ്ട്. ഇത് പ്രയോജനപ്പെടുത്തി 1,25,55,417 ഇന്ത്യക്കാര് ഈ വര്ഷം ടേബിളുകള് റിസര്വ് ചെയ്തതായി സോമറ്റോ വ്യക്തമാക്കി. ഫാദേഴ്സ് ഡേ ആയിരുന്നു ഇതില് ഏറ്റവും തിരക്കേറിയ ദിവസം എന്ന സോമറ്റോയുടെ കണക്കുകള് വ്യക്തമാക്കുന്നു.
