പൊലീസ്, ആമ്പുലന്സ്, ഫയര്ഫോഴ്സ് തുടങ്ങിയ എമര്ജന്സി നമ്പറുകള് അത്രയും അത്യാവശ്യ ഘട്ടങ്ങളില് മാത്രം വിളിക്കാനുള്ളതാണ്. എന്നാല് ശല്യം ചെയ്യാനായി ഇടതടവില്ലാതെ എമര്ജന്സി നമ്പറിലേക്ക് വിളിച്ചാലോ ? അതുപോലെ ഒരു സംഭവം ന്യൂജേഴ്സിയിലുണ്ടായിരിക്കയാണ്. തുടരെ 911 -ലേക്ക് വിളിച്ച യുവാവിനെ ഇപ്പോള് പൊലീസ് അറസ്റ്റ് ചെയ്തിരിക്കുകയാണ്.
ന്യൂജേഴ്സിയിലെ ഈസ്റ്റ് വിന്ഡ്സറില് നിന്നുള്ള 24 -കാരനാണ് 17 തവണ എമര്ജന്സി നമ്പറിലേക്ക് വിളിച്ചത്. ഡിസംബര് 23 -നാണ് ആദം വോണ് എന്ന യുവാവിനെ പൊലീസ് കസ്റ്റഡിയിലെടുക്കുന്നത്. പൊലീസിനെ വിളിച്ച് അടുത്തുള്ള ഹൈറ്റ്സ്ടൗണിലെ ഒരു കടയില് പോകാനും തിരികെ വരാനും വാഹനം വിട്ടുതരണം എന്ന് നിരന്തരം ആവശ്യപ്പെടുകയായിരുന്നു ഇയാള്.
വിന്ഡ്സറിലെ ഒരു ഹോട്ടലിലായിരുന്നു ഇയാളുടെ താമസം. ആദ്യം ഇയാള് വിളിച്ചപ്പോള് പൊലീസ് അവിടെയെത്തി ഇയാളെ കാണുകയും അടിയന്തിരാവശ്യങ്ങള്ക്ക് മാത്രമേ 911 -ലേക്ക് വിളിക്കാവൂ എന്നും, എന്തൊക്കെ ആവശ്യത്തിന് വിളിക്കാം എന്നുമൊക്കെ ഇയാളോട് കൃത്യമായി സംസാരിക്കുകയും ചെയ്തിരുന്നു. എന്നാല് ഇയാള് വീണ്ടും പലതവണ 911 -ലേക്ക് വിളിച്ച് തന്റെ ആവശ്യം ആവര്ത്തിക്കുകയായിരുന്നത്രെ. ഇങ്ങനെ 17 തവണയാണ് ഇയാള് പൊലീസിനെ വിളിച്ചത്. ഇതോടെയാണ് അറസ്റ്റ് ചെയ്യാന് പൊലീസ് തീരുമാനിച്ചത്.
അമേരിക്കയിലെ യൂണിവേഴ്സല് എമര്ജന്സി നമ്പറാണ് 911. എമര്ജന്സി സഹായങ്ങള്ക്കാണ് ഈ നമ്പറില് വിളിക്കാന് സാധിക്കുക. നേരത്തെയും പല സ്ഥലങ്ങളിലും സമാനമായ സംഭവങ്ങള് നടന്നിട്ടുണ്ട്.
Discussion about this post