ചെന്നൈ: പൊങ്കലിന് റെക്കോര്ഡുകള് ഭേദിച്ച് തമിഴ്നാട്ടിലെ മദ്യവില്പ്പന. തമിഴ്നാട് സ്റ്റേറ്റ് മാര്ക്കറ്റിംഗ് കോര്പ്പറേഷന്റെ (ടാസ്മാക്) വഴി ജനുവരി 12 മുതല് 16 വരെ 725.56 കോടി രൂപയുടെ മദ്യമാണ് വിറ്റത്. എന്നാല് കഴിഞ്ഞ വര്ഷം ഇതേ കാലയളവില് വിറ്റമദ്യം 678.65 കോടി രൂപയുടേതാണ്. ജനുവരി 1 മുതല് 16 വരെ, ടാസ്മാകിലൂടെ 2,462.97 കോടി രൂപയുടെ മദ്യം വിറ്റു. 2024 ലെ ഇതേ കാലയളവില് 2,300.23 കോടി രൂപയുടെ മദ്യമാണ് വിറ്റത്. 162.74 കോടി രൂപയുടെ (7.07%) വര്ധനയാണ് ഈ വര്ഷമുണ്ടായത്.
പൊങ്കലിന് പലരും പോയതിനാല് ചെന്നൈയിലും സമീപ പ്രദേശങ്ങളിലും മദ്യവില്പ്പന കുറഞ്ഞതായി മുതിര്ന്ന ടാസ്മാക് ഉദ്യോഗസ്ഥന് പറഞ്ഞു. കന്യാകുമാരി, നാഗപട്ടണം, തിരുവാരൂര്, രാമനാഥപുരം എന്നിവയുള്പ്പെടെ 12 ജില്ലകളിലും വില്പ്പനയില് നേരിയ ഇടിവ് രേഖപ്പെടുത്തി. പേരമ്പാലൂരിലാണ് വില്പ്പനയില് ഏറ്റവും കൂടുതല് വര്ധന രേഖപ്പെടുത്തിയത്.
ബിയര് വില്പ്പനയിലും പേരമ്പാലൂര് ഒന്നാം സ്ഥാനത്താണ്. ജില്ലയില് കഴിഞ്ഞ വര്ഷം 22,435 കെയ്സുകള് വിറ്റഴിച്ചപ്പോള് 27,047 കെയ്സുകള് വിറ്റു.
Discussion about this post