പാലക്കാട് നെന്മാറയിൽ കൂകി ഉണർത്താറുള്ള പൂവൻകോഴി മുട്ടയിട്ടെന്ന വാർത്ത സമൂഹമാധ്യമങ്ങളിൽ വൻതോതിൽ വൈറലാകുകയാണ്. ആൺകോഴി എങ്ങനെ മുട്ടയിടും എന്ന ചോദ്യവുമായി നിരവധി പേരാണ് അദ്ഭുതത്തോടെ ഈ വാർത്ത പങ്കുവെക്കുന്നത്. എന്നാൽ ബാഹ്യരൂപത്തിൽ പൂവൻകോഴിയായി തോന്നുമെങ്കിലും ഇതിന് പിന്നിൽ തികച്ചും ശാസ്ത്രീയമായ ചില കാരണങ്ങളുണ്ടെന്നാണ് വിദഗ്ദ്ധർ വ്യക്തമാക്കുന്നത്.
ജീവശാസ്ത്രപരമായി ‘സെക്സ് റിവേഴ്സൽ’ (Sex Reversal) അഥവാ ലിംഗമാറ്റം എന്ന പ്രതിഭാസമാണ് ഇവിടെ സംഭവിച്ചിട്ടുണ്ടാകുക. മനുഷ്യരിൽ നിന്ന് വ്യത്യസ്തമായി പെൺകോഴികൾക്ക് ZW ക്രോമസോമും ആൺകോഴികൾക്ക് ZZ ക്രോമസോമുമാണുള്ളത്. അതുപോലെ മനുഷ്യരിൽ രണ്ട് അണ്ഡാശയങ്ങൾ ഉള്ളപ്പോൾ പിടക്കോഴികളിൽ ഇടതുവശത്തെ അണ്ഡാശയം (Left Ovary) മാത്രമേ സജീവമായി പ്രവർത്തിക്കുകയുള്ളൂ.
എന്നാൽ അണുബാധയോ, ട്യൂമറോ അല്ലെങ്കിൽ മറ്റെന്തെങ്കിലും അസുഖങ്ങളോ കാരണം ഈ ഇടത് അണ്ഡാശയത്തിന് കേടുപാടുകൾ സംഭവിക്കുമ്പോൾ ശരീരത്തിൽ ഈസ്ട്രജന്റെ ഉത്പാദനം ഗണ്യമായി കുറയുന്നു. ഈ ഘട്ടത്തിൽ വലതുവശത്തുള്ള പ്രവർത്തനരഹിതമായ ലിംഗഗ്രന്ഥി (Gonadal Tissue) വളരുകയും ടെസ്റ്റോസ്റ്റിറോൺ എന്ന പുരുഷ ഹോർമോൺ കൂടുതൽ ഉത്പാദിപ്പിക്കപ്പെടാൻ തുടങ്ങുകയും ചെയ്യും.
ഇതോടെ കോഴിയുടെ തലയിലെ പൂവും താടയും വലുതാവുകയും, കാലുകളിൽ കൂർത്ത നഖങ്ങൾ (Spur) വളരുകയും, ആൺകോഴിയെപ്പോലെ ശബ്ദമുണ്ടാക്കി കൂവാനും തുടങ്ങും. ബാഹ്യരൂപത്തിലും പെരുമാറ്റത്തിലും പൂർണ്ണമായും പൂവൻകോഴിയായി മാറുമെങ്കിലും ഉള്ളിൽ വീണ്ടും അണ്ഡാശയം ഭാഗികമായി വീണ്ടെടുക്കപ്പെടുമ്പോൾ ഇവ മുട്ടയിടാൻ കാരണമാകുന്നു. അതായത് അത്ഭുതമല്ല, മറിച്ച് പ്രകൃതിയുടെ അപൂർവ്വമായ ഒരു ഹോർമോൺ വ്യതിയാനം മാത്രമാണിതെന്ന് മൃഗസംരക്ഷണ മേഖലയിലെ വിദഗ്ദ്ധർ ചൂണ്ടിക്കാണിക്കുന്നു.
