ബോളിവുഡ് നടന് സെയ്ഫ് അലിഖാന് വീട്ടില് വച്ച് കുത്തേറ്റ സംഭവത്തില് ഒരാള് അറസ്റ്റില്. മഹാരാഷ്ട്രയിലെ താനെയില്നിന്നു ഞായറാഴ്ച പുലര്ച്ചെയാണു ബിജെ എന്ന മുഹമ്മദ് അലിയാനെ പിടികൂടിയത്. ‘വിജയ് ദാസ്’ എന്നുകൂടി പേരുള്ള ഇയാള്, നടന്റെ വീട്ടില് കയറി ആക്രമണം നടത്തിയെന്നു സമ്മതിച്ചതായി പൊലീസ് പറഞ്ഞു. രാവിലെ 9ന് പൊലീസ് വാര്ത്താസമ്മേളനം വിളിച്ചിട്ടുണ്ട്.
മുംബൈയിലെ പബ്ബില് ജോലിക്കാരനാണു ഇയാള് താനെയിലെ ഹിരാനന്ദാനി എസ്റ്റേറ്റിലെ മെട്രോ നിര്മാണ സ്ഥലത്തിനു സമീപത്തെ ലേബര് ക്യാംപില്നിന്നാണ് അറസ്റ്റ് ചെയ്തത്. ഇയാളെ ബാന്ദ്രയിലെത്തിച്ച് ചോദ്യം ചെയ്തു. രാവിലെ കോടതിയില് ഹാജരാക്കും. അക്രമി ഇന്ത്യക്കാരനാണോ ബംഗ്ലദേശ് പൗരനാണോ എന്നും അന്വേഷിക്കുന്നുണ്ട്.
സെയ്ഫിന്റെ വീട്ടില്നിന്ന് അക്രമി പടികള് ഇറങ്ങുന്ന സിസിടിവി ദൃശ്യം മുംബൈയിലും സമീപ സ്ഥലങ്ങളിലും പൊലീസ് പോസ്റ്റര് പതിച്ചിരുന്നു. പ്രതിയെ പിടിക്കാന് 20 സംഘങ്ങളെയും നിയോഗിച്ചു. കേസുമായി ബന്ധപ്പെട്ടു ഛത്തിസ്ഗഡിലെ ദുര്ഗില് ഒരാളെ കസ്റ്റഡിയിലെടുത്തതിന് പിന്നാലെയാണ് ഇപ്പോഴത്തെ അറസ്റ്റ്.
വ്യാഴാഴ്ച പുലര്ച്ചെയാണു ബാന്ദ്ര വെസ്റ്റിലെ വീട്ടില് മോഷണത്തിനെത്തിയ ഒരാള് സെയ്ഫിനെ കുത്തിയത്. ആക്രമണത്തില് കഴുത്തിലും നട്ടെല്ലിനു സമീപവും ഉള്പ്പെടെ നടന് ആഴത്തില് കുത്തേറ്റു. ഉടനെ ഓട്ടോറിക്ഷയില് ലീലാവതി ആശുപത്രിയിലെത്തിച്ച് അടിയന്തര ശസ്ത്രക്രിയയ്ക്കു വിധേയനാക്കി. നടന് അപകടനില തരണം ചെയ്തതായി ഡോക്ടര്മാര് പറഞ്ഞു.
Discussion about this post