കോഴിക്കോട് : കല്യാണദിവസം ആഘോഷമാക്കി കാറിൽ അഭ്യാസപ്രകടനം നടത്തിയ നവവരനും സുഹൃത്തുക്കൾക്കും മുട്ടൻ പണിയുമായി പോലീസ്. കോഴിക്കോട് നാദാപുരം വളയത്ത് വിവാഹാഘോഷത്തിനിടെ അപകടകരമായി കാറുകൾ ഓടിച്ചു കൊണ്ട് റീല്‍സ് ചിത്രീകരിച്ച സംഭവത്തിലാണ് പോലീസ് കേസ് എടുത്തിട്ടുള്ളത്. നവവരനും സുഹൃത്തുക്കൾക്കും എതിരെയാണ് പോലീസ് കേസ്.
കല്ലാച്ചി സ്വദേശി അര്‍ഷാദിന്റെ വിവാഹദിനത്തിൽ ആയിരുന്നു കാറിൽ അപകടകരമായ രീതിയിൽ അഭ്യാസപ്രകടനം നടത്തിയത്. മൂന്ന് കിലോമീറ്ററോളം ദൂരം കാറുകളുടെ ഡോറില്‍ ഇരുന്നും റോഡില്‍ പടക്കം പൊട്ടിച്ചും പൂത്തിരി കത്തിച്ചുമായിരുന്നു ആഡംബര വാഹനങ്ങളിലെ അഭ്യാസപ്രകടനങ്ങള്‍. പിന്നില്‍ നിന്നും വന്ന ഒരു വാഹനത്തെയും ഇതിനിടയില്‍ കടന്നുപോകാനും അനുവദിച്ചില്ല.
സംഭവത്തിന്റെ ദൃശ്യങ്ങൾ സമൂഹമാധ്യമങ്ങളിൽ വൈറൽ ആയതോടെ വളയം പൊലീസ് ആണ് കേസെടുത്തത്. അപകടകരമായി വാഹനം ഓടിക്കല്‍, പൊതുഗതാഗതം തടസപ്പെടുത്തല്‍ തുടങ്ങിയ വകുപ്പുകള്‍ പ്രകാരമാണ് കേസ്. പൊലീസ് സ്റ്റേഷനില്‍ ഹാജരാകാന്‍ ഇവര്‍ക്ക് നോട്ടിസ് നല്‍കി. അഭ്യാസപ്രകടനം നടത്തിയ ആഡംബര കാറുകളിൽ ഒന്നും പോലീസ് കസ്റ്റഡിയിൽ എടുത്തിട്ടുണ്ട്. പോലീസിന് പിന്നാലെ മോട്ടോർ വാഹന വകുപ്പും ഇവർക്കെതിരെ നടപടി സ്വീകരിക്കും.
