വാല്‍പ്പാറ: വൈദ്യുതി വകുപ്പിന്റെ ജീപ്പ് ആക്രമിച്ച് കാട്ടാന. വാല്‍പ്പാറയിലാണ് സംഭവം. വൈദ്യുതി വകുപ്പിലെ ജീവനക്കാരുമായി എത്തിയ ജീപ്പ് കാട്ടാന ആക്രമിക്കുകയായിരുന്നു. ജീപ്പ് കാട്ടാന ആക്രമിച്ച് പത്ത് അടിയോളം താഴ്ചയിലേക്ക് മറിച്ചിടുകയായിരുന്നു.
ജീപ്പിലുണ്ടായിരുന്ന വൈദ്യുതി വകുപ്പിന്റെ എന്‍ജിനീയറും സഹപ്രവര്‍ത്തകരും അത്ഭുതകരമായാണ് രക്ഷപ്പെട്ടത്. ആനമലയ്ക്ക് സമീപം നവമലയില്‍ ജൂനിയര്‍ വൈദ്യുതി വിഭാഗം എന്‍ജിനീയറായ വിശ്വനാഥനും, വൈദ്യുതി വകുപ്പിലെ ജീവനക്കാരും കൂടി അത്താളി അമ്മന്‍ ക്ഷേത്രം വഴി ആളിയാറിലേക്ക് പോകുമ്പോഴാണ് കാട്ടാനയുടെ മുന്നില്‍പ്പെട്ടത്.
കാട്ടാന ജീപ്പിനെ പത്തടി താഴ്ചയിലേക്ക് കുത്തിമറിക്കുകയായിരുന്നു. വൈദ്യുതി വകുപ്പ് ജീവനക്കാര്‍ അത്ഭുതകരമായി രക്ഷപ്പെട്ടെങ്കിലും നിസാരമായ പരിക്കുകള്‍ ഏറ്റിട്ടുണ്ട്. റോഡില്‍ ജീപ്പിന് മുന്നില്‍ കാട്ടാനയെ കണ്ട് ജീപ്പ് പിന്നോട്ട് എടുത്തെങ്കിലും ആന നിമിഷനേരത്തിനുള്ളില്‍ പാഞ്ഞടുക്കുകയായിരുന്നു.
ജീപ്പിനെ കൊമ്പില്‍ കോര്‍ത്ത് താഴ്ചയിലേക്ക് മറിച്ചിടുകയായിരുന്നു. അപകടത്തില്‍ ജീപ്പിന്റെ ചില്ലുകളും മുന്‍ ഭാഗത്തിനും സാരമായ കേടുപാടുകള്‍ സംഭവിച്ചിട്ടുണ്ട്. വൈദ്യുതി വകുപ്പിന്റെ മഹീന്ദ്ര ബൊലേറോ വാഹനമാണ് ഇങ്ങനെ അപകടത്തില്‍പ്പെട്ടത്.
Discussion about this post