കോട്ടയം: നാട്ടകത്ത് കല്യാണ സദ്യക്കിടെ പപ്പടത്തിന്റെ കിട്ടാത്തതിന്റെ പേരില്‍ കൂട്ടത്തല്ല്. സദ്യയ്ക്ക് രണ്ടാമതും പപ്പടം വേണമെന്ന് മദ്യപിച്ചെത്തിയ ഒരു സംഘം ആവശ്യമുന്നയിച്ചതോടെയാണ് ് കല്ല്യാണസദ്യയില്‍ കൂട്ടത്തല്ലിന് കളമൊരുങ്ങിയത്. കോട്ടയം നാട്ടകത്തെ ക്ഷേത്രത്തില്‍ ഞായറാഴ്ച നടന്ന വിവാഹച്ചടങ്ങിനിടെയായിരുന്നു തമ്മിലടിയുണ്ടായത്.
വിവാഹത്തിന്റെ ചടങ്ങുകള്‍ കഴിഞ്ഞതിന് പിന്നാലെ വധൂവരന്മാര്‍ മടങ്ങിക്കഴിഞ്ഞാണ് മദ്യപ സംഘം സംഘര്‍ഷമുണ്ടാക്കിയത്. മുട്ടം സ്വദേശിയായ യുവതിയും, കൈനകരി സ്വദേശിയായ യുവാവും തമ്മിലുളള വിവാഹമായിരുന്നു ക്ഷേത്രത്തില്‍ വെച്ച് നടന്നത്.
വിവാഹ ചടങ്ങുകള്‍ക്ക് ശേഷം മദ്യപിക്കുന്നതിന് ടച്ചിംങ്‌സ് തേടിയെത്തിയ മദ്യപ സംഘമാണ് ബന്ധുക്കള്‍ അടക്കമുള്ളവരുമായി ഏറ്റുമുട്ടിയത്. ആദ്യം ടച്ചിംങ്‌സ് ചോദിച്ചെത്തിയ മദ്യപ സംഘം സദ്യ കഴിക്കാന്‍ ഇരുന്നതോടെയാണ് പ്രശ്നങ്ങള്‍ക്ക് തുടക്കമായത്.
ഭക്ഷണം കഴിക്കാന്‍ ഇരുന്ന മദ്യപ സംഘത്തില്‍ ഒരാള്‍ രണ്ടാമതും പപ്പടം വേണമെന്ന് ആവശ്യപ്പെടുകയായിരുന്നു. ഇതേച്ചൊല്ലി പാചകക്കാരും ബന്ധുക്കളും മദ്യപസംഘവുമായി വാക്കേറ്റമുണ്ടായി.പിന്നീട് കൂട്ടത്തല്ലില്‍ കലാശിക്കുകയായിരുന്നു. ഈ സംഘര്‍ഷത്തില്‍ രണ്ടു പേരുടെ തലയ്ക്ക് പൊട്ടലുണ്ടായി. നാട്ടുകാര്‍ വിവരം അറിയിച്ചതോടെ സ്ഥലത്ത് എത്തിയ പൊലീസ് സംഘമാണ് സ്ഥിതിഗതികള്‍ നിയന്ത്രിച്ചത്. രണ്ടു പേരെ പരിക്കുകളോടെ കോട്ടയം ജില്ലാ ജനറല്‍ ആശുപത്രിയില്‍ എത്തിച്ചു. എന്നാല്‍ പരാതിയില്ലാത്തതിനാല്‍ പൊലീസ് കേസെടുത്തില്ല.
Discussion about this post