പ്രയാഗ്രാജ്: നൂറ്റാണ്ടുകളുടെ കാത്തിരിപ്പിനൊടുവിൽ സംഭവിക്കുന്ന ഏറ്റവും വലിയ ആത്മീയ സംഗമമായ മഹാകുംഭമേളയിലേക്ക് ദിനംപ്രതി ലക്ഷക്കണക്കിന് തീർത്ഥാടകരാണ് ഒഴുകിയെത്തുന്നത്. ഹിന്ദു സംസ്കാരത്തിൽ ഏറ്റവും പ്രധാനപ്പെട്ട ദിനമായ മൗനി അമാവാസിയാണ് ഇന്ന്. കുംഭമേളയുടെ ഏറ്റവും പ്രധാനപ്പെട്ട രണ്ടാമത്തെ അമൃതസ്നാന ദിവസമായ ഇന്ന് ദശലക്ഷക്കണക്കിന് ആളുകളാണ് പുണ്യനദികളായ ഗംഗ, യമുന, സരസ്വതിയുടെ സംഗമസ്ഥലമായ ത്രിവേണി സംഗമത്തിൽ പുണ്യസ്നാനം ചെയ്യാൻ ഒഴുകിയെത്തിയത്.
സനാതനധർമികളെ സംബന്ധിച്ചിടത്തോളം, ഏറെ പ്രധാനപ്പെട്ട ദിവസങ്ങളിലൊന്നാണ് മൗനി അമാവാസി.മാഘമാസത്തിലെ ഈ വിശിഷ്ട ദിനം വളരെയധികം ആത്മീയ പ്രാധാന്യമുള്ളതാണ്. ഏറെ വിശിഷ്ടമായ മൗനി അമാവാസി, കുംഭമേളയോടൊപ്പം ചേർന്നു സംഭവിച്ചപ്പോൾ, ഈ ദിനം ഭക്തർക്ക് നൽകുന്ന പവിത്രമായ അനുഭവത്തെ നൂറിരട്ടിയായി ഉയർത്തിയിരിക്കുകയാണ്. ത്രിവേണി സംഗമത്തിൽ പുണ്യസ്നാനം നടത്താൻ, കടൽ പോലെയാണ് തീർത്ഥാടകർ ഒഴുകിയെത്തിയത്. 35 ദശലക്ഷം തീർത്ഥാടകരാണ് പുണ്യസ്നാനം നടത്തിയത്.
മൗനി അമാവാസി പൂർവികർക്ക് സമർപ്പിക്കപ്പെട്ട ദിവസമാണ്. മൗനി അമാവാസി ദിനത്തിൽ പുണ്യതീർത്ഥങ്ങളിലെ ജലം അമൃതായി മാറുമെന്നാണ് വിശ്വാസം. ഈ ദിനത്തിൽ പുണ്യസംഗമത്തിൽ സ്നാനം നടത്തുന്നത് പുണ്യവും മോക്ഷവും നൽകുന്നു. മൗന എന്ന സംസ്കൃത പദത്തിൽ നിന്നാണ് മൗനി എന്ന വാക്കിന്റെ ഉത്ഭവം. മൗനം എന്നാണ് ഇതിനർത്ഥം. ആത്മീയമായ ശുദ്ധീകരണം, ആനതരീകമായ നിശബ്ദത, ആഴത്തിലുള്ള ഭക്തി എന്നിവയുടെ പ്രതീകമാണ് മൗനി അമാവാസി. ഈ ദിവസം, ദൈവീകമായ ഊർജം അതിന്റെ ഉച്ചസ്ഥായിയിൽ ആയിരിക്കുമെന്നാണ് വിശ്വാസം. അതുകൊണ്ട് തന്നെ ത്രിവേണി സംഗമത്തിലെ പവിത്ര സ്നാനം ഈ ദിവസത്തിലായാൽ, കൂടുതൽ ശക്തിമത്താകുമെന്ന് വിശ്വസിക്കപ്പെടുന്നു.
മൗനി അമാവാസി ദിനം നമ്മളിൽ സന്തോഷവും അനുഗ്രഹവും ചൊരിയുന്നു. ഇതോടൊപ്പം, പിതൃദോഷങ്ങളകലാനും ഈ മംഗളകരമായ ദിനം ഉചിതമാണ്. മൗനി അമാവാസി ദിനത്തിൽ സംഗമസ്ഥാനത്ത് സ്നാനം നടത്തിയാൽ, മുൻകാല പാപങ്ങളിൽ നിന്ന് രക്ഷനേടുകയും മോക്ഷം നേടിത്തരുകയും ചെയ്യും.
Discussion about this post