മണപ്പുറം ഉണരും മുൻപേ ആലുവയെത്താം തേവരെ കാണാം; ട്രെയിനിൽ പോയാലോ? സ്‌പെഷ്യൽ സർവീസുകൾ

ശിവരാത്രി ആഘോഷത്തിന് ഒരുങ്ങിയിരിക്കുകയാണ് ആലുവ മണപ്പുറം. പെരിയാറിന്റെ തേവരുടെ അനുഗ്രഹം തേടി ലക്ഷക്കണക്കിന് ആളുകളാണ് മണപ്പുറത്ത് എത്തുക. ശിവപഞ്ചാക്ഷരിയിൽ മുഖരിതമായ മണപ്പുറത്തേക്ക് ഇത്തവണ ട്രെയിനിൽ യാത്രപോയാലോ? മണപ്പുറം ഉണരും മുൻപേ ആലുവയിലെത്തി തേവരെ തൊഴുത് പിതൃദർപ്പണം നടത്തി മടങ്ങാം. ശിവരാത്രി പ്രമാണിച്ച് ഫെബ്രുവരി 26 ന് ആലുവയിലേക്ക് പ്രത്യേക ട്രെയിനുകളും സ്റ്റോപ്പുകളും അനുവദിച്ചിരിക്കുകയാണ് റെയിൽവേ.

നിലമ്പൂർ – കോട്ടയം എക്‌സ്പ്രസ് ഫെബ്രുവരി 26 ബുധനാഴ്ച നിലമ്പൂരിൽ നിന്ന് പുറപ്പെടുന്ന ട്രെയിൻ നമ്പർ 16325 നിലമ്പൂർ – കോട്ടയം എക്‌സ്പ്രസ് അന്ന് പതിവ് സ്റ്റോപ്പുകൾക്ക് പുറമേ മുള്ളൂർക്കര, ഒല്ലൂർ, നെല്ലായി, കൊരട്ടി എന്നിവിടങ്ങളിൽ കൂടി നിർത്തും.

രാത്രി തൃശ്ശൂരിലെത്തുന്ന 56605-ാം നമ്പർ ഷൊർണൂർ-തൃശ്ശൂർ പാസഞ്ചർ ആലുവ വരെ നീട്ടി. തൃശ്ശൂരിൽനിന്ന് രാത്രി 11.15-ന് ഈ വണ്ടി പുറപ്പെടും. ഒല്ലൂർ (11.24), പുതുക്കാട് (11.34), നെല്ലായി (11.40), ഇരിങ്ങാലക്കുട (11.47), ചാലക്കുടി (11.55), ഡിവൈൻ നഗർ (11.59), കൊരട്ടി ( 12.04), കറുകുറ്റി (12.09), അങ്കമാലി (12.17), ചൊവ്വര (12.26) എന്നിവിടങ്ങളിൽ ഈ ട്രെയിന് സ്റ്റോപ്പുണ്ടാകും. 12.45-ന് ആലുവയിലെത്തും. ഫെബ്രുവരി 27-ന് ആലുവയിൽനിന്ന് രാവിലെ 5.15-ന് പുറപ്പെടുന്ന 16609 തൃശ്ശൂർ-കണ്ണൂർ എക്‌സ്പ്രസിന് ചൊവ്വര (5.23), അങ്കമാലി (5.30), കറുകുറ്റി (5.36), കൊരട്ടി (5.41), ഡിവൈൻ നഗർ (5.46), ചാലക്കുടി (5.50), ഇരിങ്ങാലക്കുട (5.59), നെല്ലായി (6.08), പുതുക്കാട് (6.14), ഒല്ലൂർ (6.24)എന്നിവിടങ്ങളിൽ സ്റ്റോപ്പുണ്ടാകും. തൃശ്ശൂരിലെത്തി, പതിവുപോലെ 6.45-ന് കണ്ണൂരിലേക്ക് പുറപ്പെടും. ഈ ദിവസം മുള്ളൂർക്കര, വള്ളത്തോൾ നഗർ എന്നിവിടങ്ങളിലും ഈ വണ്ടിക്ക് സ്റ്റോപ്പ് അനുവദിച്ചിട്ടുണ്ട്.

ത്രേതായുഗത്തിൽ സാക്ഷാൽ ശ്രീരാമൻ, സീതാപഹരണസമയത്ത് രാവണനെ തടയാൻ ശ്രമിച്ച് കൊല്ലപ്പെട്ട പക്ഷി ശ്രേഷ്ഠനായ ജഡായുവിന് അന്ത്യകർമ്മങ്ങൾ നിർവ്വഹിച്ചയിടമാണ് ആലുവശിവക്ഷേത്രം. പ്രകൃതിയുടെ നിയന്ത്രണത്തിൽ സ്വഭാവികമായി ആറാട്ട് നടക്കുന്ന ചുരുക്കം ക്ഷേത്രങ്ങളിൽ ഒന്നാണ് ആലുവ ശിവക്ഷേത്രം. മഴക്കാലത്ത് പെരിയാർ നിറഞ്ഞൊഴുകി വിഗ്രഹം വെള്ളത്തിൽ മുങ്ങുമ്പോളാണ് ഇവിടെ ആറാട്ട് നടക്കുക എന്നത് ഈ ക്ഷേത്രത്തിന്റെ പ്രത്യേകതയാണ്.