കോഴിക്കോട്: പ്രവാചകനെ അപമാനിച്ചു കൊണ്ടുള്ള ഫേസ്ബുക്ക് പോസ്റ്റ് പത്രത്തില്‍ പ്രസിദ്ധീകരിച്ചതില്‍ ഖേദം പ്രകടിപ്പിച്ച് മാതൃഭൂമി മാനേജ്‌മെന്റ് സമസ്തക്ക് കത്ത് നല്‍കി.
സംഭവത്തില്‍ ഖേദം പ്രകടിപ്പിച്ചുകൊണ്ട് മാതൃഭൂമി, ചാനലിലും ഓണ്‍ലൈനിലും വാര്‍ത്ത കൊടുക്കുകയും, വ്യാഴാഴ്ചത്തെ പത്രത്തില്‍ ഒന്നാംപേജില്‍ പത്രാധിപരുടെ ഖേദപ്രകടനവും പ്രസിദ്ധീകരിക്കുകയും ചെയ്തു. ഇതിനെ പുറമെയാണ് ഇപ്പോള്‍ സമസ്ത പോലുള്ള സംഘടനകള്‍ക്ക് മാതൃഭൂമി പത്രാധിപര്‍ ഇത്തരം സംഭവങ്ങള്‍ ആവര്‍ത്തിക്കില്ലെന്ന് കാണിച്ച് കത്തയച്ചത്.
മന്ത്രി പി.കെ കുഞ്ഞാലിക്കുട്ടി, സമസ്ത നേതാക്കളായ പ്രൊഫ. കെ.ആലിക്കുട്ടി മുസ്‌ലിയാര്‍, കോട്ടുമല ടി.എം ബാപ്പു മുസ്‌ലിയാര്‍ തുടങ്ങി പ്രമുഖ നേതാക്കളെയെല്ലാം മാതൃഭൂമി മാനേജിങ് ഡയറക്ടര്‍ എം.പി വീരേന്ദ്രകുമാര്‍, മാനേജിങ് എഡിറ്റര്‍ പി.വി.ചന്ദ്രന്‍, ഡയറക്ടര്‍ ശ്രേയാംസ്‌കുമാര്‍ തുടങ്ങിയവര്‍ ബന്ധപ്പെട്ടു ഖേദം പ്രകടിപ്പിച്ചിരുന്നു. ഈ ഫേസ്ബുക്ക് പോസ്റ്റ് പ്രസിദ്ധീകരിച്ച മൂന്നു ജീവനക്കാരെ മാതൃഭൂമി സസ്‌പെന്‍ഡ് ചെയ്യുകയും ചെയ്തിരുന്നു.
സമസ്തക്ക് നല്‍കിയ കത്തിന്റെ പൂര്‍ണരൂപം
ജനറല്‍ സെക്രട്ടറി, സമസ്ത കേരള ജംഇയ്യത്തുല്‍ ഉലമ
പ്രിയ ജനാബ് ആലിക്കുട്ടി മുസ്‌ലിയാര്‍,
മതനിരപേക്ഷതയുടേത് എന്നപോലെ മതബഹുമാനത്തിന്റെയും മതസ്വാതന്ത്രത്തിന്റെയും പാരമ്പര്യമാണ് മാതൃഭൂമി എന്നും ഉയര്‍ത്തിപ്പിടിച്ചിട്ടുള്ളത്. മാതൃഭൂമി പിറന്നുവീണ സ്വാതന്ത്രസമരകാലംതൊട്ട് അത് തുടര്‍ന്നുകൊണ്ടേയിരിക്കുന്നു. അതേ സ്‌നേഹവും സൗഹൃദവും മതവിശ്വാസികളില്‍നിന്ന്, വിശേഷിച്ച് ഇസ്‌ലാം മത സംഘടനകളില്‍നിന്നും മതനേതാക്കളില്‍നിന്നും മാതൃഭൂമിക്ക് ലഭിച്ചിട്ടുമുണ്ട്.
എന്നാല്‍ കഴിഞ്ഞദിവസം ദുഃഖകരമായ ഒരു സംഭവം ഉണ്ടാവുകയുണ്ടായി. തൃശൂര്‍, കോഴിക്കോട് ‘നഗരം’ സപ്ലിമെന്റുകളില്‍ ഇന്റര്‍നെറ്റിലെ സോഷ്യല്‍മീഡിയയില്‍നിന്ന് എടുത്തുചേര്‍ത്ത കമന്റുകളിലൊന്ന് ഇസ്‌ലാം മതവിശ്വാസികള്‍ക്ക് ദുഃഖവും വേദനയും സൃഷ്ടിക്കുന്നതായിരുന്നു. അങ്ങനെ സംഭവിച്ചതിലും അവര്‍ക്കുണ്ടായ ദുഃഖത്തിലും ഞങ്ങള്‍ക്ക് വ്യസനമുണ്ട്. ഞങ്ങളും ഇതില്‍ തുല്യദുഃഖിതരാണ്. പുനഃപ്രസിദ്ധീകരണത്തിലുണ്ടായ ഗുരുതരമായ ശ്രദ്ധക്കുറവും അത് സൃഷ്ടിച്ച സാമുദായിക വേദനയും തിരിച്ചറിഞ്ഞ് ഞങ്ങള്‍ ഒന്നാംപേജില്‍ തന്നെ നിര്‍വ്യാജമായ ഖേദപ്രകടനം നടത്തിയത് ശ്രദ്ധയില്‍പെട്ടിരിക്കുമല്ലോ. വീഴ്ച്ചയ്ക്ക് ഉത്തരവാദികളായവര്‍ക്കെതിരെ ഔദ്യോഗികതലത്തില്‍ നടപടിയും സ്വീകരിച്ചിട്ടുണ്ട്.
ലോകത്തിന് വെളിച്ചം കാട്ടിയ പ്രവാചകനായ നബി തിരുമേനിയോടും ഇസ്‌ലാം മതത്തോടും മാതൃഭൂമിക്ക് അങ്ങേയറ്റം ആദരവുണ്ട്. അശ്രദ്ധകൊണ്ട് പറ്റിയ വീഴ്ചയെ വളരെ ഗൗരവത്തോടെയാണ് ഞങ്ങള്‍ എടുത്തിട്ടുള്ളത്. അത് ആവര്‍ത്തിക്കാതിരിക്കാനുള്ള എല്ലാ മുന്‍കരുതലുകളും എടുക്കുമെന്ന് ഞങ്ങള്‍ ഉറപ്പുതരുന്നു. ഈ സാഹചര്യത്തില്‍ സമാധാനപരമായ അന്തരീക്ഷം പുലരണമെന്നും മാതൃഭൂമിയോടുള്ള സൗഹൃദവും സഹകരണവും പഴയപടി തുടരണമെന്നും ഞങ്ങള്‍ അഭ്യര്‍ത്ഥിക്കുന്നു.
എന്ന് സ്‌നേഹപുരസരം
എം കേശവമേനോന്‍ (പത്രാധിപര്‍)
Discussion about this post