300 കോടി രൂപയിലേറെ മൂല്യം ; ഇന്ത്യയുടെ രാജകീയ രത്നം ‘ഗോൾക്കൊണ്ട ബ്ലൂ’ സ്വിറ്റ്സർലാൻഡിൽ ലേലത്തിന്

തെലങ്കാനയിലെ പ്രശസ്തമായ ഗോൽക്കൊണ്ട ഖനികളിൽ നിന്നും കുഴിച്ചെടുക്കപ്പെട്ട അപൂർവ രത്നമായ ‘ഗോൾക്കൊണ്ട ബ്ലൂ’ ലേലത്തിന് വെച്ച് സ്വിറ്റ്സർലാൻഡ് വജ്ര വ്യാപാരി. 2025 മെയ് 14 ന് ജനീവയിൽ നടക്കുന്ന ക്രിസ്റ്റീസ് മാഗ്നിഫിഷ്യന്റ് ജുവൽസ് ലേലത്തിൽ ആണ് ഇന്ത്യയിൽ നിന്നുമുള്ള ഈ രാജകീയ രത്നം വിൽപ്പനയ്ക്കായി വെച്ചിട്ടുള്ളത്. അപൂർവവും അസാധാരണവുമായ 23.24 കാരറ്റ് നീല വജ്രമാണ് ‘ഗോൾക്കൊണ്ട ബ്ലൂ’.

പ്രശസ്ത പാരീസ് ഡിസൈനർ ജെഎആറിന്റെ ഒരു വിശിഷ്ട ഡിസൈനർ മോതിരത്തിലാണ് ഇപ്പോൾ ഈ വജ്രം പതിപ്പിച്ചിട്ടുള്ളത്. 35 മുതൽ 50 മില്യൺ യുഎസ് ഡോളർ (ഏകദേശം 300 മുതൽ 430 കോടി രൂപ വരെ) വരെ ഈ വിശിഷ്ട വജ്രത്തിന് വില ലഭിക്കുമെന്നാണ് പ്രതീക്ഷിക്കപ്പെടുന്നത്. ഇത്രയും ഉയർന്ന നിലവാരത്തിലുള്ള അസാധാരണ കുലീന രത്നങ്ങൾ ജീവിതത്തിൽ ഒരിക്കൽ മാത്രമേ വിപണിയിലെത്തൂ എന്നാണ് ക്രിസ്റ്റീസ് ഇന്റർനാഷണൽ ജുവൽസ് മേധാവി ഈ സവിശേഷ വജ്രത്തെക്കുറിച്ച് വ്യക്തമാക്കിയിട്ടുള്ളത്.

ഇൻഡോറിലെ മഹാരാജാ യശ്വന്ത് റാവു ഹോൾക്കർ രണ്ടാമൻ ആയിരുന്നു ഗോൾക്കൊണ്ട ഖനികളിൽ നിന്നും ലഭിച്ച ഈ വജ്രം ആദ്യമായി സ്വന്തമാക്കിയിരുന്നത്. ചൗമെറ്റ് എന്ന ഫ്രഞ്ച് ജ്വല്ലറി ആണ് ഈ അപൂർവ വജ്രം മഹാരാജാവിനുള്ള ആഭരണം ആക്കി മാറ്റിയത്. ആദ്യമായി ഒരു ബ്രേസ്‌ലെറ്റിൽ ആയിരുന്നു ഈ വജ്രം പതിപ്പിച്ചിരുന്നത്. 1930-കളിൽ രാജകീയ ആഭരണ വ്യാപാരിയായ മൗബൗസിൻ ഈ ആഭരണം പുനർരൂപകൽപ്പന ചെയ്ത് ഒരു മാലയിലേക്ക് മാറ്റിയ ശേഷം ഇൻഡോറിലെ മഹാറാണി ആയിരുന്നു ഇത് ധരിച്ചിരുന്നത്. 1947-ൽ ഇന്ത്യ സ്വാതന്ത്ര്യം നേടിയതിനുശേഷം ന്യൂയോർക്ക് ജ്വല്ലറി വ്യാപാരിയായ ഹാരി വിൻസ്റ്റൺ ഈ വജ്രം വാങ്ങി. പിന്നീട് ബറോഡയിലെ മഹാരാജാവിന് ആണ് ഈ വജ്രം കൈമാറപ്പെട്ടത്. ബറോഡ മഹാരാജാവ് പിന്നീട് ഈ വജ്രം സ്വകാര്യ വ്യക്തികൾക്ക് വിൽപ്പന നടത്തിയെന്നാണ് പറയപ്പെടുന്നത്.