എറണാകുളം : പഹൽഗാം ഭീകരാക്രമണത്തിൽ കൊല്ലപ്പെട്ട എറണാകുളം ഇടപ്പള്ളി സ്വദേശി എൻ രാമചന്ദ്രന് കണ്ണീരോടെ വിട നൽകി നാട്. ഭാരത് മാതാ കീ ജയ് വിളികളോടെ ആണ് ധീരനായ സ്വയംസേവകന് യാത്രയയപ്പ് നൽകിയത്. അദ്ദേഹത്തിന്റെ ഭാര്യയുടെ പ്രത്യേക അഭ്യർത്ഥന പ്രകാരം ഗണഗീതം പാടിയാണ് രാമചന്ദ്രനെ സംഘബന്ധുക്കൾ യാത്രയാക്കിയത്. ഇടപ്പള്ളി ശ്മശാനത്തിൽ ആണ് അദ്ദേഹത്തിന്റെ സംസ്കാര ചടങ്ങുകൾ നടന്നത്.
കഴിഞ്ഞദിവസം രാമചന്ദ്രന്റെ പൊതുദർശന സമയത്ത് അദ്ദേഹത്തിന് അന്തിമോപചാരം അർപ്പിക്കാൻ എത്തിയ സീമ ജാഗരൺ മഞ്ച് ദേശീയ സംരക്ഷൺ എ ഗോപാലകൃഷ്ണനോട് അന്തരിച്ച രാമചന്ദ്രന്റെ ഭാര്യ ഷീല തന്റെ ആഗ്രഹം പറയുകയായിരുന്നു. ‘പരമ പവിത്രമതാമീ മണ്ണില്’ എന്ന ഗണഗീതം എൻ രാമചന്ദ്രൻ എല്ലായ്പ്പോഴും പാടിയിരുന്നതായി അദ്ദേഹത്തിന്റെ ഭാര്യ ഷീല സൂചിപ്പിച്ചു. ഷീലയുടെയും മകൾ ആരതിയുടെയും പ്രത്യേക അഭ്യർത്ഥന പ്രകാരം രാമചന്ദ്രന്റെ സംസ്കാരസമയത്ത് ഈ ഗണഗീതം ആലപിക്കുകയായിരുന്നു.
ഭാരത് മാതാ കീ ജയ് വിളികളോടെ ആണ് എൻ രാമചന്ദ്രന്റെ ഭാര്യ ഷീലയും മകൾ ആരതിയും അദ്ദേഹത്തിനെ യാത്രയാക്കിയത്. വികാരഭരിതമായ രംഗങ്ങൾക്കായിരുന്നു ഇടപ്പള്ളിയിലെ അദ്ദേഹത്തിന്റെ വീട് സാക്ഷ്യം വഹിച്ചത്. ഇടപ്പള്ളി ദേവൻകുളങ്ങര ശാഖയിലെ മുഖ്യശിക്ഷകൻ ആയിരുന്നു എൻ രാമചന്ദ്രൻ. രാജ്യസ്നേഹിയായിരുന്ന രാമചന്ദ്രന് ഉചിതമായ വിടവാങ്ങൽ നൽകണമെന്ന ഭാര്യയുടെയും മകളുടെയും ആഗ്രഹമാണ് സംഘ ബന്ധുക്കൾ പൂർത്തീകരിച്ചത്.
Discussion about this post