പാക് അധീന കശ്മീരിൽ മാത്രമല്ല, പാകിസ്താൻ പഞ്ചാബിലെ ഭീകരതാവളങ്ങളും ഇന്ത്യൻ സേന തകർത്തു. പാകിസ്താൻ പഞ്ചാബിലെ ബഹവൽപൂരിലും ആക്രമണം നടന്നതായി അന്താരാഷ്ട്ര മാദ്ധ്യമങ്ങൾ റിപ്പോർട്ട് ചെയ്യുന്നു. ജെയ്ഷെ മുഹമ്മദിൻറെ ആസ്ഥാനമായ ബഹവൽപൂർ തകർത്തു എന്നാണ് അന്താരാഷ്ട്ര മാദ്ധ്യമങ്ങൾ റിപ്പോർട്ട് ചെയ്യുന്നത്.
കഴിഞ്ഞ മാസം ഇവിടെ ഹമാസ് ഭീകര സംഘം സന്ദർശനം നടത്തി പരിശീലനം നടത്തിയിരുന്നതായി റിപോർട്ടുകളുണ്ടായിരുന്നു. ഈ കേന്ദ്രമാണ് ഇന്ത്യയുടെ ആക്രമണത്തിൽ തകർന്നതെന്ന് പ്രാഥമിക വിവരങ്ങൾ സൂചിപ്പിക്കുന്നു.
ലഷ്കർ ഇ തൊയ്ബ നേതാവായ ഹഫീസ് സയീദ് ബഹവൽപൂരിലെ ഈ ഭീകരകേന്ദ്രം ആസ്ഥാനമായി പ്രവർത്തിച്ചിരുന്നു എന്നു മുൻപ് റിപോർട്ടുകൾ വന്നിട്ടുണ്ട്.
പാക് അധീന കശ്മീരിലെ ലഷ്കർ തൊയ്ബ ഭീകര കേന്ദ്രങ്ങളിൽ ഉൾപ്പെടെ ഇന്ത്യ സർജിക്കൽ സ്ട്രൈക്ക് നടത്തി എന്നാണ് സ്ഥിരീകരണം. ഇന്ത്യൻ വ്യോമസേനയും ഇന്ത്യൻ കരസേനയും സംയുക്തമായി നടത്തിയ ഓപ്പറേഷൻ സിന്ദൂർ പഹൽഗാമിനുള്ള ഇന്ത്യയുടെ മറുപടിയാണ്. എന്നാൽ ആക്രമണങ്ങളിൽ മരണ സംഖ്യ എത്രയെന്ന് സ്ഥിരീകരണം വന്നിട്ടില്ല. എങ്കിലും നൂറുകണക്കിന് ഭീകരരെ ഇന്ത്യ വധിച്ചിട്ടുണ്ട് എന്നാണ് അനുമാനം. കൃത്യമായ ലക്ഷ്യത്തോടെയാണ് ഭീകര കേന്ദ്രങ്ങൾ ഇന്ത്യ തകർത്തത്.
പാക് സൈനിക താവളങ്ങളെ ഇന്ത്യ ലക്ഷ്യമിട്ടിട്ടില്ലെന്നും ഇന്ത്യ ഔദ്യോഗികമായി സ്ഥിരീകരിച്ചിട്ടുണ്ട്. ഇതിലൂടെ കൃത്യമായ മുന്നറിയിപ്പാണ് ഇന്ത്യ പാകിസ്താന് നൽകുന്നത്. എന്തിനും തയ്യാറാണ് എന്ന സൂചനയാണ് ഭീകരകേന്ദ്രങ്ങളെ ലക്ഷ്യം വെച്ചുകൊണ്ട് ഇന്ത്യ പാകിസ്താന് നൽകിയത്.
രാജ്യത്തെ തീരാ വേദനയിലാഴ്ത്തിയ പഹൽഗാം ഭീകരാക്രമണത്തിന് കണക്ക് ചോദിച്ച് ഇന്ത്യ. പാകിസ്താനിലെ ഭീകരതാവളങ്ങളിൽ ആക്രമണം നടത്തിയാണ് രാജ്യം, 26 സാധാരണക്കാരുടെ ജീവന് പകരം ചോദിച്ചിരിക്കുന്നത്. ഓപ്പറേഷൻ സിന്ദൂർ എന്നാണ് സേന നടപടികൾക്ക് നൽകിയിരിക്കുന്ന പേര്.
ബഹാവൽപൂരിലും മുസാഫറബാദിലും കോട്ലിയിലും മുറിഡ്കെയിലും ഉൾപ്പെടെ 9 പാക് ഭീകര കേന്ദ്രങ്ങൾ ആക്രമിച്ചു തകർത്തതായി കരസേന അറിയിച്ചു. നീതി നടപ്പാക്കിയെന്ന് സേന വ്യക്തമാക്കി. കൂടുതൽ വിവരങ്ങൾ ഉടൻ വെളിപ്പെടുത്തുമെന്ന് പ്രതിരോധ മന്ത്രാലയം അറിയിച്ചു. ആക്രമിച്ചത് പാക് സൈനിക കേന്ദ്രങ്ങളല്ലെന്നും പ്രതിരോധ മന്ത്രാലയം അറിയിച്ചു.
അതേസമയം ഭീകര സംഘടന ലഷ്കര് ഇ തായ്ബയുടെ ആസ്ഥാനമാണ് മുരിദികെ. ഭീകരന് മസൂദ് അസ്ഹറിന്റെ നേതൃത്വത്തിലുള്ള ജെയ്ഷെ മുഹമ്മദിന്റെ കേന്ദ്രമാണ് പാകിസ്താനിലെ പഞ്ചാബ് പ്രവിശ്യയിലെ ബഹാവല്പുര്.
Discussion about this post