പഹൽഗാം ഭീകരാക്രമണത്തിന് ഇന്ത്യ,ഓപ്പറേഷൻ സിന്ദൂരിലൂടെ മറുപടി നൽകിയിരിക്കുകയാണ്. പെൺമക്കളുടെ കണ്ണീരിന് 9 ഭീകരകേന്ദ്രങ്ങൾ തകർത്താണ് രാജ്യം പകരം ചോദിച്ചിരിക്കുന്നത്. നിരവധി നൂതന ആയുധങ്ങളാണ് സംയുക്ത സൈനിക ആക്രമണത്തിൽ ഇന്ത്യ പ്രയോഗിച്ചത്.
ഇന്റലിജൻസ് ഏജൻസികൾ കൈമാറിയ വിവരങ്ങളുടെ അടിസ്ഥാനത്തിൽ ലക്ഷ്യസ്ഥാനത്ത് എത്താനായി സ്കാൽപ് മിസൈലുകൾ,ഹാമ്മർ ബോംബുകൾ എന്നിവയോടൊപ്പം പ്രിസിഷൻ സ്ട്രൈക്ക് ആയുധസംവിധാനങ്ങളും ലോയിറ്ററിംഗ് മ്യൂണിഷൻസ് സിസ്റ്റംസും ഉപയോഗിച്ചിരുന്നു.
ലോയിട്ടറിംഗ് മ്യൂണിഷൻ അഥവാ ചാവേർ ഡ്രോൺ ഉപയോഗിച്ചാണ് ഇന്ത്യ പ്രധാനമായും ആക്രമണം നടത്തിയത്. ഒരു പ്രത്യേക ലക്ഷ്യസ്ഥാനത്ത് പറന്നുചെന്ന് ശത്രുവിനെ കണ്ടെത്തുന്നതിനും ആക്രമിക്കുന്നതിനും ഉപയോഗിക്കുന്ന ആയുധസംവിധാനമാണിത്. ഈ സംവിധാനത്തിൽ പോർമുന ഘടിപ്പിച്ച ഒരു ആളില്ലാ വിമാനമുണ്ടാകും.ഇത് സ്വയമേവയോ അല്ലെങ്കിൽ മനുഷ്യന്റെ നിയന്ത്രണത്തിലോ ആണ് പ്രവർത്തിക്കുന്നത്. ശത്രുവിനെ കണ്ടെത്തി കൃത്യമായി ആക്രമണം നടത്തുന്നതിനുള്ള കഴിവ് ഈ ആയുധത്തിനുണ്ട്.
ലക്ഷ്യസ്ഥാനത്തിന്റെയും അതിന്റെ ചുറ്റുപാടുകളുടെയും തത്സമയ ചിത്രം കാണുന്ന ഒരു ഓപ്പറേറ്റിംഗ് സംവിധാനമാണ് എൽഎംഎസ് നിയന്ത്രിക്കുന്നത്. ആക്രമണത്തിന്റെ സമയം, കൃത്യമായ ദിശ എന്നിവ നിയന്ത്രിക്കാനും ഈ സംവിധാനത്തിന് കഴിയും.ആക്രമിക്കേണ്ട സ്ഥലം ഉടനടി കണ്ടെത്താൻ സാധിച്ചില്ലെങ്കിലും ദീർഘനേരം ആകാശത്ത് കറങ്ങിനടന്ന് ലക്ഷ്യസ്ഥാനത്തിനായി കാത്തിരിക്കാൻ എൽഎംഎസിന് കഴിയും. അത്യാധുനിക സെൻസറുകളും ഗൈഡൻസ് സിസ്റ്റങ്ങളും ഉപയോഗിക്കുന്നതിനാൽ, ലക്ഷ്യസ്ഥാനത്ത് വളരെ കൃത്യതയോടെ ആക്രമണം നടത്താൻ സാധിക്കുന്നു. ആക്രമണത്തിനിടയിൽ പോലും ലക്ഷ്യം മാറ്റാനോ, ദൗത്യം ഉപേക്ഷിക്കാനോ എൽഎംഎസിന് സാധിക്കും
