പാകിസ്താന് വേണ്ടി ചാരപ്പണി എടുത്തെന്ന കേസിൽ സർക്കാർ ജീവനക്കാരനും കോൺഗ്രസ് നേതാവിന്റെ മുൻ പേഴ്സണൽ അസിസ്റ്റന്റുമായ യുവാവിനെ അറസ്റ്റ് ചെയ്തു. ജയ്പൂരിലെ ഒരു സർക്കാർ വകുപ്പിൽ നിന്ന് സകുർ ഖാൻ മംഗലിയ എന്ന വ്യക്തിയെ ആണ് അറസ്റ്റ് ചെയ്തത്. രാജസ്ഥാൻ ഇന്റലിജൻസിന്റെ പ്രത്യേക സംഘമാണ് ഇയാളെ പിടികൂടിയത്. ജയ്സാൽമീർ ജില്ലയിലെ താമസക്കാരനായ യുവാവ് നിലവിൽ സംസ്ഥാനത്തെ എംപ്ലോയ്മെന്റ് ഓഫീസിലാണ് ജോലി ചെയ്യുന്നത്.
സംശയാസ്പദമായ പ്രവർത്തനങ്ങളിൽ യുവാവ് ഉൾപ്പെട്ടിട്ടുണ്ടെന്ന് ഉദ്യോഗസ്ഥർ സംശയിക്കുന്നു. പാക് എംബസി ഉദ്യോഗസ്ഥനുമായുള്ള ബന്ധത്തെക്കുറിച്ചും ഐഎസ്ഐയുമായുള്ള ബന്ധത്തെക്കുറിച്ചും രഹസ്യാന്വേഷണ ഏജൻസികൾക്ക് വിവരം ലഭിച്ചതിനെത്തുടർന്ന് കുറച്ചുനാളായി ഇയാളെ നിരീക്ഷിച്ചു വരികയായിരുന്നു. കോൺഗ്രസ് സർക്കാരിലെ മുൻ മന്ത്രിയായിരുന്ന ഷാലെ മുഹമ്മദിന്റെ പേഴ്സണൽ അസിസ്റ്റന്റായി സകുർ ഖാൻ മുമ്പ് ജോലി ചെയ്തിരുന്നു. മുഹമ്മദും ഖാനും ഒരേ ഗ്രാമത്തിൽ നിന്നുള്ളവരാണ്.
സകുർ ഖാൻ മംഗലിയയുടെ മൊബൈൽ ഫോണിൽ നിന്ന് അജ്ഞാതമായ നിരവധി പാകിസ്താൻ നമ്പറുകൾ രഹസ്യാന്വേഷണ സംഘം കണ്ടെത്തിയതായാണ് വിവരം.ചോദ്യം ചെയ്യലിൽ, മുമ്പ് 6-7 തവണ പാകിസ്താൻ സന്ദർശിച്ചതായും യുവാവ് സമ്മതിച്ചു. ഇയാളുടെ മൊബൈൽ ഫോണിൽ നിന്ന് ഇതുവരെ സൈനികവുമായി ബന്ധപ്പെട്ട വീഡിയോകളോ സെൻസിറ്റീവ് ഉള്ളടക്കമോ കണ്ടെത്തിയിട്ടില്ലെന്ന് ഉദ്യോഗസ്ഥർ പറഞ്ഞു. എന്നിരുന്നാലും, ഫോണിലെ നിരവധി വിവരങ്ങൾ ഇല്ലാതാക്കിയതായി കണ്ടെത്തി. രണ്ട് ബാങ്ക് അക്കൗണ്ടുകൾ ഉൾപ്പെടെയുള്ള യുവാവിന്റെ സാമ്പത്തിക രേഖകളും രഹസ്യാന്വേഷണ ഏജൻസികൾ പരിശോധിച്ചുവരികയാണ്.
