ദിത്വാ ചുഴലിക്കാറ്റ്: വടക്കൻ തമിഴ്‌നാട്ടിലും പുതുച്ചേരിയിലും റെഡ് അലർട്ട്; എസ്ഡിആർഎഫ്, എൻഡിആർഎഫ് ടീമുകളെ വിന്യസിച്ചു

ചെന്നൈ : ദിത്വാ ചുഴലിക്കാറ്റ് ഇന്ത്യൻ തീരത്തോട് അടുക്കുന്നതിനെ തുടർന്ന് വടക്കൻ തമിഴ്‌നാട്ടിലും പുതുച്ചേരിയിലും റെഡ് അലർട്ട് പ്രഖ്യാപിച്ചു. ശ്രീലങ്കയിൽ വൻ നാശനഷ്ടങ്ങൾ വിതച്ച ദിത്വാ ചുഴലിക്കാറ്റ് ഇപ്പോൾ ശക്തി പ്രാപിച്ച ഇന്ത്യൻ തീരത്തേക്ക് നീങ്ങുകയാണ്. വടക്കൻ തമിഴ്‌നാട്, പുതുച്ചേരി, തെക്കൻ ആന്ധ്രാപ്രദേശ് തീരങ്ങളിൽ കനത്ത ജാഗ്രത നിർദ്ദേശം പുറപ്പെടുവിച്ചിട്ടുണ്ട്. ഈ പ്രദേശങ്ങളിൽ എസ്ഡിആർഎഫ്, എൻഡിആർഎഫ് ടീമുകളെ വിന്യസിച്ചു.

ഞായറാഴ്ച വൈകുന്നേരത്തോടെ
തമിഴ്‌നാട്, പുതുച്ചേരി തീരങ്ങളിൽ നിന്ന് 25 കിലോമീറ്റർ അകലെയായി ദിത്വാ ചുഴലിക്കാറ്റ്
എത്തും. ചുഴലിക്കാറ്റ് ഇതിനകം തന്നെ പുതുച്ചേരി, തമിഴ്‌നാട് തീരപ്രദേശങ്ങളിൽ ശക്തമായ കാറ്റും മഴയും മൂലം നാശം വിതച്ചിട്ടുണ്ട്. കനത്ത മഴയും കടൽ പ്രക്ഷുബ്ധതയും ഉണ്ടാകാൻ സാധ്യതയുള്ളതിനാൽ പൊതുജനങ്ങൾ ജാഗ്രത പാലിക്കണമെന്നും അത്യാവശ്യമല്ലാതെ തീരദേശ യാത്ര ഒഴിവാക്കണമെന്നും ജില്ലാ ഭരണകൂടം നിർദ്ദേശിച്ചു.

തമിഴ്‌നാട്ടിലെ നാഗപട്ടണം ജില്ലയിലെ വേദാരണ്യം തീരത്താണ് ദിത്വാ ചുഴലിക്കാറ്റ് കേന്ദ്രീകരിച്ചിരിക്കുന്നതെന്ന് ഐഎംഡിയുടെ ഏറ്റവും പുതിയ ബുള്ളറ്റിൻ പറയുന്നു. തമിഴ്‌നാട് സർക്കാർ സംസ്ഥാനത്തുടനീളം 6000 ക്യാമ്പുകൾ സജ്ജീകരിച്ചിട്ടുണ്ട്. എസ്ഡിആർഎഫ്, എൻഡിആർഎഫ് ടീമുകൾ ഉൾപ്പെടെ 28 ദുരന്ത നിവാരണ സംഘങ്ങൾ സജ്ജമാണെന്ന് തമിഴ്‌നാട് സർക്കാർ അറിയിച്ചു. ചുഴലിക്കാറ്റ് ഭീഷണി നിലനിൽക്കുന്നതിനാൽ ചെന്നൈ വിമാനത്താവളത്തിൽ നിന്നുള്ള 47 വിമാന സർവീസുകൾ റദ്ദാക്കി.