ബിഎൽഒമാരുടെയും സൂപ്പർവൈസർമാരുടെയും വേതനം ഇരട്ടിയാക്കി വർദ്ധിപ്പിച്ച് തിരഞ്ഞെടുപ്പ് കമ്മീഷൻ ; ഇആർഒകൾക്ക് പ്രത്യേക ഓണറേറിയം

ന്യൂഡൽഹി : വോട്ടർ പട്ടികയുടെ പ്രത്യേക തീവ്ര പരിഷ്കരണവുമായി ബന്ധപ്പെട്ട് പ്രവർത്തിക്കുന്നവർക്ക് വേതനം ഇരട്ടിയാക്കി വർദ്ധിപ്പിച്ച് തിരഞ്ഞെടുപ്പ് കമ്മീഷൻ. ജോലി സമ്മർദ്ദം നേരിടുന്നതായി വിവിധ ഉദ്യോഗസ്ഥർ പരാതി ഉയർത്തിയതിനെ തുടർന്നാണ് കേന്ദ്ര തിരഞ്ഞെടുപ്പ് കമ്മീഷന്റെ ഈ തീരുമാനം. ബിഎൽഒമാരുടെയും സൂപ്പർവൈസർമാരുടെയും വേതനമാണ് ഇരട്ടിയാക്കി വർദ്ധിപ്പിച്ചിരിക്കുന്നത്.

ഇതോടൊപ്പം ഇലക്ടറൽ രജിസ്ട്രേഷൻ ഓഫീസർമാർ (ഇആർഒ), അസിസ്റ്റന്റ് ഇലക്ടറൽ രജിസ്ട്രേഷൻ ഓഫീസർമാർ (എഇആർഒ) എന്നിവർക്ക് ഓണറേറിയം ഏർപ്പെടുത്താനും തിരഞ്ഞെടുപ്പ് കമ്മീഷൻ തീരുമാനിച്ചു. ബിഎൽഒമാരുടെയും സൂപ്പർവൈസർമാരുടെയും വേതനത്തിൽ 2015 മുതൽ നിലവിലുള്ള തുക ഇരട്ടിയാക്കി വർദ്ധിപ്പിക്കാനാണ് തീരുമാനമെടുത്തിട്ടുള്ളത്.

ബൂത്ത് ലെവൽ ഓഫീസർ (BLO)മാരുടെ വേതനം നേരത്തെ 6000 രൂപയായിരുന്നത് 12000 രൂപയാക്കി വർദ്ധിപ്പിച്ചു. ഓരോ തിരഞ്ഞെടുപ്പ് പ്രക്രിയക്കും പ്രത്യേകമായി നൽകുന്ന തുകയാണിത്. BLO സൂപ്പർവൈസറുടെ വേതനം 12,000 രൂപയിൽ നിന്ന് 18,000 രൂപയായി വർദ്ധിപ്പിച്ചു. ഇലക്ടറൽ രജിസ്ട്രേഷൻ ഓഫീസർമാർ (ഇആർഒ)ക്ക് ഓണറേറിയമായി 30000 രൂപയും അസിസ്റ്റന്റ് ഇലക്ടറൽ രജിസ്ട്രേഷൻ ഓഫീസർമാർ (എഇആർഒ)ക്ക് 25000 രൂപയും കേന്ദ്ര തെരഞ്ഞെടുപ്പ് കമ്മീഷൻ ഉത്തരവിട്ടിട്ടുണ്ട്.