ചെന്നൈ : ദിത്വാ ചുഴലിക്കാറ്റ് തമിഴ്നാട്-പുതുച്ചേരി തീരത്തേക്ക് അടുക്കുന്നു. തമിഴ്നാടിന്റെ വടക്കൻ തീരദേശ മേഖലകളിലും പുതുച്ചേരിയിലും മണിക്കൂറിൽ 60-70 കിലോമീറ്റർ വേഗതയിലും മണിക്കൂറിൽ 80 കിലോമീറ്റർ വേഗതയിലും ശക്തമായ ഉപരിതല കാറ്റ് വീശാൻ സാധ്യതയുള്ളതായി ഇന്ത്യൻ കാലാവസ്ഥാ വകുപ്പ് മുന്നറിയിപ്പ് നൽകിയിട്ടുണ്ട്. വടക്കൻ തമിഴ്നാട്ടിലും പുതുച്ചേരിയിലും റെഡ് അലർട്ട് പ്രഖ്യാപിച്ചിട്ടുണ്ട്. തമിഴ്നാട്ടിൽ ചുഴലിക്കാറ്റിനെ തുടർന്നുണ്ടായ മഴയുമായി ബന്ധപ്പെട്ട അപകടങ്ങളിൽ ഇതുവരെ മൂന്ന് പേർ മരിച്ചു.
ദിത്വാ ചുഴലിക്കാറ്റിനെ തുടർന്നുണ്ടായ കനത്ത മഴയിൽ തമിഴ്നാട്ടിലെ ഡെൽറ്റ ജില്ലകളിലായി 149 കന്നുകാലികൾ ചത്തതായും 57,000 ഹെക്ടർ കൃഷിഭൂമി നശിച്ചതായും തമിഴ്നാട് റവന്യൂ, ദുരന്തനിവാരണ മന്ത്രി കെ.കെ.എസ്.എസ്.ആർ രാമചന്ദ്രൻ അറിയിച്ചു. മേഖലയിലുടനീളം 234 വീടുകൾക്ക് കേടുപാടുകൾ സംഭവിച്ചിട്ടുണ്ട്. ചുഴലിക്കാറ്റ് കര തൊടുന്നതോടെ നാശനഷ്ടങ്ങളുടെ വ്യാപ്തി വലിയതോതിൽ വർദ്ധിക്കുമെന്നാണ് കണക്കുകൂട്ടുന്നത്.
ചുഴലിക്കാറ്റിനെ നേരിടാനായി എസ്ഡിആർഎഫ്, എൻഡിആർഎഫ് എന്നിവയുൾപ്പെടെ 28 ദുരന്ത പ്രതികരണ സംഘങ്ങളെ സജ്ജരാക്കിയിട്ടുണ്ടെന്നും മറ്റ് സംസ്ഥാനങ്ങളിൽ നിന്ന് 10 സംഘങ്ങൾ കൂടി തമിഴ്നാട്ടിലേക്ക് എത്തിയിട്ടുണ്ടെന്നും മന്ത്രി രാമചന്ദ്രൻ പറഞ്ഞു. നിലവിൽ ദിത്വാ ചുഴലിക്കാറ്റ് മണിക്കൂറിൽ 12 കിലോമീറ്റർ വേഗതയിൽ സഞ്ചരിച്ച് തെക്ക് പടിഞ്ഞാറൻ ബംഗാൾ ഉൾക്കടലിലും അതിനോട് ചേർന്നുള്ള വടക്കൻ തമിഴ്നാട്-പുതുച്ചേരി തീരങ്ങളിലും, കടലൂരിന് ഏകദേശം 100 കിലോമീറ്റർ കിഴക്ക്-തെക്കുകിഴക്ക്, പുതുച്ചേരിക്ക് 110 കിലോമീറ്റർ തെക്കുകിഴക്ക്, ചെന്നൈയ്ക്ക് 180 കിലോമീറ്റർ തെക്ക്-തെക്കുകിഴക്ക് എന്നിവിടങ്ങളിലായി സ്ഥിതി ചെയ്യുന്നു. ചുഴലിക്കാറ്റ് അടുത്ത 24 മണിക്കൂറിനുള്ളിൽ വടക്കൻ തമിഴ്നാട്-പുതുച്ചേരി തീരങ്ങൾക്ക് സമാന്തരമായി വടക്കോട്ട് നീങ്ങാൻ സാധ്യതയുള്ളതായാണ് ഇന്ത്യൻ കാലാവസ്ഥ വകുപ്പ് അറിയിക്കുന്നത്.
