ജനുവരി എട്ടിന്റെ ആ പകലിൽ ലോസ് ആഞ്ചലസ് വിമാനത്താവളത്തിലെ യാത്രക്കാരും വിമാനപ്രേമികളും അമ്പരന്നുപോയി. ആകാശത്ത് സാധാരണ വിമാനങ്ങളിൽ നിന്ന് വ്യത്യസ്തമായ, വെളുത്ത നിറത്തിലുള്ള ഒരു കൂറ്റൻ വിമാനം ഇറങ്ങാൻ തയ്യാറെടുക്കുന്നു. അത് അമേരിക്കൻ വ്യോമസേനയുടെ E-4B നൈറ്റ് വാച്ച് ആയിരുന്നു. ലോകം അതിനെ വിളിക്കുന്നത് ‘ഡൂംസ്ഡേ പ്ലെയിൻ.
പേര് സൂചിപ്പിക്കുന്നത് പോലെ തന്നെ ഭയാനകമാണ് ഇതിന്റെ ലക്ഷ്യം. ലോകത്ത് ഒരു ആണവയുദ്ധം പൊട്ടിപ്പുറപ്പെട്ടാൽ, അല്ലെങ്കിൽ ഭൂമിയിലെ സകല കമാൻഡ് സെന്ററുകളും തകർക്കപ്പെട്ടാൽ, അമേരിക്കൻ പ്രസിഡന്റിനും സൈനിക മേധാവികൾക്കും സുരക്ഷിതമായി ഇരുന്ന് യുദ്ധം നയിക്കാനുള്ള ഒരു ‘പറക്കുന്ന പെന്റഗൺ’ ആണിത്. ഒരു ആണവ സ്ഫോടനം നടന്നാൽ പോലും ഇതിനുള്ളിലെ ഇലക്ട്രോണിക് സംവിധാനങ്ങൾ തകരില്ല. ആകാശത്ത് വെച്ച് തന്നെ ഇന്ധനം നിറയ്ക്കാവുന്ന ഈ വിമാനം ദിവസങ്ങളോളം തളരാതെ പറക്കും.
ഈ വിമാനം സാധാരണയായി അതീവ സുരക്ഷയുള്ള സൈനിക താവളങ്ങളിലാണ് കാണാറുള്ളത്. എന്നാൽ ഇത്തവണ അത് ലോസ് ആഞ്ചലസിലെ സാധാരണ വിമാനത്താവളത്തിൽ ഇറങ്ങി. വിമാനത്തിനുള്ളിൽ ഉണ്ടായിരുന്നത് അമേരിക്കൻ പ്രതിരോധ സെക്രട്ടറി പീറ്റ് ഹെഗ്സെത്തും അദ്ദേഹത്തിന്റെ സംഘവുമാണ്. കൂടെ വിവാദ വലതുപക്ഷ ആക്ടിവിസ്റ്റ് ലോറ ലൂമറും ഉണ്ടായിരുന്നു എന്നത് വാർത്തകൾക്ക് കൂടുതൽ ചൂടേകി.
വെനസ്വേലൻ പ്രസിഡന്റ് നിക്കോളാസ് മഡുറോയെ അമേരിക്കൻ സൈന്യം പിടികൂടിയതിന്റെയും, ഇറാനുമായുള്ള സംഘർഷങ്ങൾ പുകയുന്നതിന്റെയും പശ്ചാത്തലത്തിലാണ് ഈ വിമാനം പ്രത്യക്ഷപ്പെട്ടത്. “അമേരിക്ക ആണവയുദ്ധത്തിന് തയ്യാറെടുക്കുകയാണോ?” എന്ന ചോദ്യം സോഷ്യൽ മീഡിയയിൽ പടർന്നു.
എന്നാൽ, സൈനിക വൃത്തങ്ങൾ നൽകുന്ന സൂചന പ്രകാരം ഇതൊരു സാധാരണ യാത്രയായിരുന്നു. പ്രതിരോധ മേഖലയിലെ പ്രമുഖരെ കാണാൻ ഹെഗ്സെത്ത് എത്തിയതായിരുന്നു. എങ്കിലും, ഈ വിമാനം എവിടെ കണ്ടാലും ലോകം ഒന്ന് ഭയക്കും; കാരണം ഇത് പുറത്തിറങ്ങുന്നത് സാധാരണ സമയങ്ങളിലല്ല എന്നതുകൊണ്ട് തന്നെ…
