ഇന്ത്യൻ പാസ്‌പോർട്ട് ഉടമകൾക്ക് ജർമ്മനി വിസ രഹിത ട്രാൻസിറ്റ് സൗകര്യം പ്രഖ്യാപിച്ചു. പ്രധാനമന്ത്രി നരേന്ദ്ര മോദിയും ജർമ്മൻ ചാൻസലർ ഫ്രീഡ്രിക്ക് മെർസും തമ്മിൽ നടത്തിയ കൂടിക്കാഴ്ചയ്ക്ക് ശേഷമാണ് സുപ്രധാന തീരുമാനം . ഈ നീക്കം ഇന്ത്യൻ പൗരന്മാർക്ക് അന്താരാഷ്ട്ര യാത്ര സൌകര്യപ്രദമാക്കാനും ഇരു രാജ്യങ്ങളും തമ്മിലുള്ള ജനങ്ങൾ തമ്മിലുള്ള ബന്ധം ശക്തിപ്പെടുത്താനും സഹായകമാകും .
ജർമ്മൻ ചാൻസലർ ഫ്രെഡറിക് മെർസിന് രണ്ട് ദിവസത്തെ ഔദ്യോഗിക സന്ദർശനത്തിനായി ഇന്ത്യയിലെത്തിയിട്ടുണ്ട്. സന്ദർശനവേളയിൽ പ്രധാനമന്ത്രിയുമായി നടത്തിയ കൂടിക്കാഴ്ചയ്ക്ക് ശേഷം പുറത്തിറക്കിയ ഇന്ത്യ-ജർമ്മനി സംയുക്ത പ്രസ്താവനയിലാണ് ഈ തീരുമാനം പ്രഖ്യാപിച്ചത്. ഫെഡറൽ ചാൻസലർ എന്ന നിലയിൽ മെർസിന്റെ ആദ്യ ഇന്ത്യാ സന്ദർശനവും ഏഷ്യയിലേക്കുള്ള ആദ്യ സന്ദർശനവുമായിരുന്നു ഇത്.
വിസ രഹിത ട്രാൻസിറ്റ് സൗകര്യം അർത്ഥമാക്കുന്നത്, മറ്റൊരു രാജ്യത്തേക്ക് പോകുന്നതിനായി ജർമ്മൻ വിമാനത്താവളങ്ങളിലൂടെ കടന്നുപോകുന്ന ഇന്ത്യൻ യാത്രക്കാർക്ക് ഇനി പ്രത്യേക ട്രാൻസിറ്റ് വിസയ്ക്ക് അപേക്ഷിക്കേണ്ടതില്ല എന്നാണ്. ഇത് യാത്രാ നടപടികൾ ലഘൂകരിക്കാനും പണവും സമയവും ലാഭിക്കാനും സഹായിക്കും.
ജർമ്മനിയിൽ പഠിക്കുന്ന ഇന്ത്യൻ വിദ്യാർത്ഥികളുടെ എണ്ണം വർധിക്കുന്നതിനെ ഇരു നേതാക്കളും സ്വാഗതം ചെയ്തു.വിദ്യാഭ്യാസവും വൈദഗ്ധ്യവും ചർച്ചകളിൽ പ്രധാനമായി ഇടം നേടി. ജർമ്മനിയിലെ ഇന്ത്യൻ വിദ്യാർത്ഥികളുടെ എണ്ണത്തിൽ വർദ്ധനവ്, സംയുക്ത, ഇരട്ട ബിരുദ പ്രോഗ്രാമുകളുടെ വികാസം, ഉന്നത വിദ്യാഭ്യാസ സ്ഥാപനങ്ങൾ തമ്മിലുള്ള അടുത്ത സഹകരണം
ഇന്ത്യൻ പ്രൊഫഷണലുകൾക്ക് ജർമ്മൻ തൊഴിൽ വിപണിയിൽ കൂടുതൽ അവസരങ്ങൾ നൽകുന്നതിനെക്കുറിച്ചും ചർച്ചകൾ നടന്നു. ജർമ്മനിയുടെ സമ്പദ്‌വ്യവസ്ഥ, നവീകരണം, സാംസ്കാരിക ജീവിതം എന്നിവയിൽ ഇന്ത്യൻ സമൂഹത്തിന്റെ വിലയേറിയ സംഭാവന രാജ്യം അംഗീകരിച്ചു. പരസ്പര ധാരണ വർദ്ധിപ്പിക്കുന്നതിന് വിദ്യാഭ്യാസം, ഗവേഷണം, തൊഴിൽ പരിശീലനം, സംസ്കാരം, യുവജന വിനിമയങ്ങൾ എന്നിവയിൽ സഹകരണം വികസിപ്പിക്കേണ്ടതിന്റെ ആവശ്യകതയും ചർച്ചയിൽ ഊന്നിപ്പറഞ്ഞു.
ഇന്ത്യൻ വിദ്യാർത്ഥികളുടെയും ബിരുദധാരികളുടെയും ജർമ്മൻ തൊഴിൽ വിപണിയിലെ സംഭാവന ഇരുരാജ്യങ്ങളും എടുത്തു പറഞ്ഞു. ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്നോളജിയും ജർമ്മൻ സാങ്കേതിക സർവകലാശാലകളും തമ്മിലുള്ള ബന്ധം ശക്തമാക്കാനും തീരുമാനമായി . ഉന്നത വിദ്യാഭ്യാസത്തിൽ ഒരു ഇന്തോ-ജർമ്മൻ സമഗ്രമായ റോഡ്മാപ്പ് സൃഷ്ടിക്കാൻ ഇരുപക്ഷവും സമ്മതിച്ചു. കൂടാതെ പുതിയ വിദ്യാഭ്യാസ നയത്തിന് കീഴിൽ ഇന്ത്യയിൽ കാമ്പസുകൾ തുറക്കാൻ പ്രധാനമന്ത്രി മോദി പ്രമുഖ ജർമ്മൻ സർവകലാശാലകളെ ക്ഷണിച്ചു.
