ടെഹ്റാൻ: അമേരിക്ക-ഇസ്രായേൽ സംയുക്ത വ്യോമാക്രമണത്തിൽ കൊല്ലപ്പെട്ട ആയത്തുള്ള അലി ഖമേനിക്ക് പിന്നാലെ ഇറാന്റെ പുതിയ പരമോന്നത നേതാവായി അദ്ദേഹത്തിന്റെ മകൻ മൊജ്തബ ഖമേനിയെ തിരഞ്ഞെടുത്തു. യുദ്ധം കൊടുമ്പിരിക്കൊള്ളുന്ന സാഹചര്യത്തിൽ ചേർന്ന ഇറാൻ പുരോഹിത സമിതിയാണ് 56-കാരനായ മൊജ്തബയെ പുതിയ നേതാവായി പ്രഖ്യാപിച്ചത്. ഇറാന്റെ ചരിത്രത്തിലെ നിർണ്ണായകമായ ഒരു അധികാര കൈമാറ്റമാണിത്.
ഇറാൻ റെവല്യൂഷണറി ഗാർഡ്സിന്റെ (IRGC) ശക്തമായ പിന്തുണയോടെയാണ് മൊജ്തബ ഖമേനിയുടെ നിയമനം നടന്നതെന്നാണ് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നത്. പിതാവിന്റെ മരണത്തിന് പിന്നാലെ ഇറാനിലെ ഭരണരംഗത്തും സൈനിക രംഗത്തും അനിശ്ചിതത്വം ഒഴിവാക്കാനാണ് ഈ നീക്കം.
35 വർഷത്തോളം ഇറാന്റെ പരമോന്നത പദവിയിലിരുന്ന അലി ഖമേനിയുടെ രണ്ടാമത്തെ മകനാണ് മൊജ്തബ. ഇറാൻ രാഷ്ട്രീയത്തിലും സൈനിക നീക്കങ്ങളിലും വർഷങ്ങളായി തിരശ്ശീലയ്ക്ക് പിന്നിൽ അദ്ദേഹം സജീവമായിരുന്നു.മൊജ്തബ അധികാരമേൽക്കുമ്പോഴും ഇറാൻ-യുഎസ് യുദ്ധം കനക്കുകയാണ്. ഇറാന്റെ ഡ്രോൺ ആക്രമണങ്ങളിൽ യുഎഇ, കുവൈത്ത്, സൗദി അറേബ്യ എന്നിവിടങ്ങളിൽ നാശനഷ്ടങ്ങൾ റിപ്പോർട്ട് ചെയ്തിട്ടുണ്ട്. ഇതിന് തിരിച്ചടിയായി ഇറാന്റെ സൈനിക താവളങ്ങൾക്കും ആണവ കേന്ദ്രങ്ങൾക്കും നേരെ ഇസ്രായേലും അമേരിക്കയും ആക്രമണം തുടരുകയാണ്.
ഇറാനിലെ പുതിയ നേതൃത്വത്തെക്കുറിച്ചുള്ള റിപ്പോർട്ടുകളോട് യുഎസ് പ്രസിഡന്റ് ഡൊണാൾഡ് ട്രംപ് പ്രതികരിച്ചു. ഇറാൻ ഇനിയെങ്കിലും ഭീകരവാദം അവസാനിപ്പിക്കണമെന്നും, അല്ലെങ്കിൽ കടുത്ത നടപടികൾ തുടരുമെന്നും ട്രംപ് മുന്നറിയിപ്പ് നൽകി.
ഇറാനിലെ പുതിയ നേതൃത്വം യുദ്ധം നിർത്താൻ തയ്യാറാകുമോ അതോ കൂടുതൽ ശക്തമായ തിരിച്ചടിക്ക് ഉത്തരവിടുമോ എന്നാണ് ലോകരാജ്യങ്ങൾ ഉറ്റുനോക്കുന്നത്. പുതിയ നേതാവിന്റെ നിയമനത്തോടെ ഇറാൻ ഭരണകൂടം കൂടുതൽ തീവ്രമായ നിലപാടുകളിലേക്ക് നീങ്ങാൻ സാധ്യതയുണ്ടെന്ന് രാഷ്ട്രീയ നിരീക്ഷകർ കരുതുന്നു.
