“എനിക്ക് തെറ്റ് പറ്റി, എന്നെ രക്ഷിക്കണം”; പാകിസ്താനിലേക്ക് പോയ സരബ്ജീത് കൗറിന്റെ സന്ദേശം പുറത്ത്!

പാകിസ്താനിൽ  വെച്ച് മതം മാറുകയും പാക്ക് പൗരനെ വിവാഹം കഴിക്കുകയും ചെയ്ത ഇന്ത്യൻ സിഖ് വനിത സരബ്ജീത് കൗറിന്റെ പുതിയ ഓഡിയോ ക്ലിപ്പ് പുറത്ത്. തനിക്ക് തെറ്റ് പറ്റിയെന്നും തന്നെ ഭീഷണിപ്പെടുത്തിയും ബ്ലാക്ക്‌മെയിൽ ചെയ്തുമാണ് അവിടെ നിർത്തിയിരിക്കുന്നതെന്നും കരഞ്ഞുകൊണ്ട് പറയുന്ന സരബ്ജീത്, എങ്ങനെയെങ്കിലും തന്നെ ഭാരതത്തിലേക്ക് തിരികെ എത്തിക്കണമെന്ന് അപേക്ഷിക്കുന്നു. കഴിഞ്ഞ വർഷം നവംബറിൽ തീർത്ഥാടനത്തിന് പോയി പാകിസ്താനിൽ കുടുങ്ങിയ സരബ്ജീത്തിന്റെ ഈ വെളിപ്പെടുത്തൽ പാകിസ്താനിലെ ‘ലവ് ജിഹാദ്’ കെണികളെക്കുറിച്ചുള്ള ചർച്ചകൾക്ക് വീണ്ടും ആക്കം കൂട്ടിയിരിക്കുകയാണ്.

നവംബറിൽ സിഖ് തീർത്ഥാടക സംഘത്തോടൊപ്പം പാകിസ്താനിലെ നങ്കാന സാഹിബിലേക്ക് പോയ സരബ്ജീത് കൗർ (48) ഇപ്പോൾ ലാഹോറിലെ സർക്കാർ ഷെൽട്ടർ ഹോമിലായ (Dar-ul-Aman) അവസ്ഥയിലാണ്. അവിടെ നിന്ന് തന്റെ ഭർത്താവുമായി (യുകെയിലുള്ള മുൻ ഭർത്താവെന്നും റിപ്പോർട്ടുകളുണ്ട്) സംസാരിക്കുന്ന ഓഡിയോ ക്ലിപ്പാണ് സോഷ്യൽമീഡിയയിൽ വൈറലാകുന്നത്. പാകിസ്താനിലെ ദുരിതപൂർണ്ണമായ ജീവിതത്തെക്കുറിച്ചും താൻ നേരിടുന്ന പീഡനങ്ങളെക്കുറിച്ചും സരബ്ജീത് ഇതിൽ വിവരിക്കുന്നു.

തന്റെ കൈവശമുള്ള ചില ചിത്രങ്ങൾ കാണിച്ച് പാക്ക് പൗരനായ നാസിർ ഹുസൈൻ തന്നെ ബ്ലാക്ക്‌മെയിൽ ചെയ്തുവെന്നും അതാണ് പാകിസ്താനിൽ തങ്ങാൻ കാരണമായതെന്നും സരബ്ജീത് പറയുന്നു. “ഇവിടെ അവസ്ഥ അത്ര നല്ലതല്ല. എനിക്ക് കുട്ടികളുടെ അടുത്തേക്ക് പോകണം. ധരിക്കാൻ നല്ല വസ്ത്രം പോലുമില്ല, ഒരു രൂപ പോലും കയ്യിലില്ല. എന്നെ നിരന്തരം ഉപദ്രവിക്കുകയും പരിഹസിക്കുകയും ചെയ്യുന്നു.” – കരഞ്ഞുകൊണ്ട് സരബ്ജീത് പറയുന്നു. സരബ്ജീത്തിനെ ആശ്വസിപ്പിക്കുന്ന ഭർത്താവ്, ഉടൻ തന്നെ നങ്കാന സാഹിബ് ഗുരുദ്വാര അധികൃതരെ സമീപിച്ച് സഹായം തേടാൻ നിർദ്ദേശിക്കുന്നുണ്ട്.

2023 നവംബർ 4-നാണ് കപൂർത്തല സ്വദേശിയായ സരബ്ജീത് കൗർ സിഖ് ജാഥയുടെ ഭാഗമായി പാകിസ്താനിലേക്ക് പോയത്. 13-ന് മറ്റുള്ളവർ മടങ്ങിയപ്പോൾ സരബ്ജീത് കാണാതായി.  ദിവസങ്ങൾക്കുള്ളിൽ ഇസ്ലാം മതം സ്വീകരിച്ച് ‘നൂർ ഹുസൈൻ’ എന്ന പേര് സ്വീകരിച്ചതായി പാക് മാദ്ധ്യമങ്ങൾ റിപ്പോർട്ട് ചെയ്തു.  ഷെയ്ഖ്പുര സ്വദേശിയായ നാസിർ ഹുസൈനെ വിവാഹം കഴിച്ചതായും താൻ സ്വമനസ്സാലെയാണ് അവിടെ തുടരുന്നതെന്നും അവകാശപ്പെടുന്ന വീഡിയോകൾ അന്ന് പുറത്തുവന്നിരുന്നു. ഈ മാസം ആറാം തീയതി വാഗാ അതിർത്തി വഴി ഇവരെ ഭാരതത്തിലേക്ക് നാടുകടത്താൻ തീരുമാനിച്ചിരുന്നെങ്കിലും അവസാന നിമിഷം പാക്ക് അധികൃതർ അത് റദ്ദാക്കി. രേഖകളിലെ പ്രശ്നങ്ങൾ എന്നാണ് ഔദ്യോഗിക വിശദീകരണം.