ഐഐടി മദ്രാസ് ഡയറക്ടർ വി. കാമകോടിക്ക് പത്മശ്രീ പുരസ്‌കാരം ലഭിച്ചതിനെച്ചൊല്ലി രാഷ്ട്രീയ പോരാട്ടം മുറുകുന്നു. ഗോമൂത്രത്തെക്കുറിച്ചുള്ള അദ്ദേഹത്തിന്റെ മുൻപത്തെ പരാമർശങ്ങൾ ഉയർത്തിക്കാട്ടി കോൺഗ്രസ് പരിഹസിച്ചപ്പോൾ, ശക്തമായ പ്രതിരോധവുമായി സോഹോ സ്ഥാപകൻ ശ്രീധർ വെമ്പുവും ബിജെപിയും രംഗത്തെത്തി.
ഗോമൂത്രത്തിന്റെ ഔഷധഗുണങ്ങളെക്കുറിച്ച് കാമകോടി മുൻപ് നടത്തിയ പരാമർശങ്ങളെ പരിഹസിച്ചുകൊണ്ട് കോൺഗ്രസ് കേരള യൂണിറ്റ് രംഗത്തെത്തിയതാണ് വിവാദങ്ങൾക്ക് തിരി കൊളുത്തിയത്. കോൺഗ്രസ് കേരള യൂണിറ്റ് ‘X’ (ട്വിറ്റർ) പ്ലാറ്റ്‌ഫോമിൽ പങ്കുവെച്ച പോസ്റ്റാണ് ചർച്ചയായത്. “വി. കാമകോടിക്ക് അഭിനന്ദനങ്ങൾ. ഐഐടി മദ്രാസിൽ താങ്കൾ ഗോമൂത്രത്തെക്കുറിച്ച് നടത്തിയ ഗവേഷണങ്ങളെ രാജ്യം അംഗീകരിച്ചിരിക്കുന്നു” എന്ന പരിഹാസത്തോടെയായിരുന്നു പോസ്റ്റ്.
ഗോമൂത്രത്തെയും ചാണകത്തെയും കുറിച്ചുള്ള പഠനങ്ങൾ ശാസ്ത്രീയമായി തന്നെ കാണണമെന്നും, പാശ്ചാത്യ രാജ്യങ്ങളിലെ ഹാർവാർഡോ എംഐടിയോ ഇത് പറഞ്ഞാൽ അംഗീകരിക്കുന്ന അടിമത്ത മനോഭാവമാണ് ചിലർക്കെന്നും വെമ്പു ആഞ്ഞടിച്ചു. വെമ്പുവിന്റെ വാദങ്ങളെയും കോൺഗ്രസ് ചോദ്യം ചെയ്തു. ചാണകത്തിനും ഗോമൂത്രത്തിനും അത്രയേറെ ഗുണമുണ്ടെങ്കിൽ നിങ്ങളുടെ കമ്പനി ഇതിൽ നിക്ഷേപം നടത്താത്തത് എന്തുകൊണ്ടാണെന്ന് കോൺഗ്രസ് ചോദിച്ചു. മധ്യപ്രദേശിലെ ഒരു ഗവേഷണ പദ്ധതിയിൽ നടന്ന അഴിമതി ചൂണ്ടിക്കാട്ടി ‘ഗവേഷണ ഫലം പൂജ്യമാണെന്നും’ കോൺഗ്രസ് പരിഹസിച്ചു.
ദേശീയ പുരസ്‌കാരങ്ങളെ കോൺഗ്രസ് രാഷ്ട്രീയവത്കരിക്കുകയാണെന്ന് ബിജെപി ആരോപിച്ചു. മുൻപ് ഗാന്ധി കുടുംബത്തോട് അടുപ്പമുള്ളവർക്ക് മാത്രം ലഭിച്ചിരുന്ന പുരസ്‌കാരങ്ങൾ ഇപ്പോൾ അർഹരായവർക്ക് പാർട്ടി നോക്കാതെയാണ് നൽകുന്നതെന്ന് ബിജെപി നേതാവ് ഗൗരവ് വല്ലഭ് പറഞ്ഞു. വി.എസ്. അച്യുതാനന്ദൻ, രോഹിത് ശർമ്മ എന്നിവർക്ക് പുരസ്‌കാരം നൽകുന്നത് കോൺഗ്രസിന് ഇഷ്ടപ്പെട്ടില്ലേ എന്നും അദ്ദേഹം ചോദിച്ചു.
