ഇന്ത്യൻ ക്രിക്കറ്റിൽ പുതിയൊരു സുവർണ്ണ അധ്യായം എഴുതിച്ചേർത്ത് നായകൻ സൂര്യകുമാർ യാദവ്. ന്യൂസിലൻഡിനെതിരായ ടി20 പരമ്പര 4-1 ന് സ്വന്തമാക്കിയതോടെ ടി20 നായകൻ എന്ന നിലയിൽ അജയ്യമായ കുതിപ്പാണ് സൂര്യ തുടരുന്നത്. പരമ്പരയിലെ മികച്ച പ്രകടനത്തിലൂടെ ‘പ്ലെയർ ഓഫ് ദി സീരീസ്’ പുരസ്കാരവും സൂര്യകുമാർ സ്വന്തമാക്കി.
നായകസ്ഥാനം ഏറ്റെടുത്തത് മുതൽ തോൽവിയറിയാത്ത കുതിപ്പാണ് സൂര്യയുടെ കീഴിൽ ഇന്ത്യ നടത്തുന്നത്. ഓസ്ട്രേലിയ (4-1, 2-1), ശ്രീലങ്ക (3-0), ബംഗ്ലാദേശ് (3-0), ദക്ഷിണാഫ്രിക്ക (3-1, 3-1), ഇംഗ്ലണ്ട് (4-1) എന്നിങ്ങനെ വമ്പൻ ടീമുകളെ ഇന്ത്യ ഈ കാലഘട്ടത്തിൽ മുട്ടുകുത്തിച്ചു.
ഇത് കൂടാതെ സൂര്യകുമാറിന്റെ കീഴിൽ ഇന്ത്യ ഏഷ്യ കപ്പിൽ മുത്തമിട്ടു. ന്യൂസിലൻഡിനെതിരായ പരമ്പര 4-1 ന് സ്വന്തമാക്കിയ ഇന്ത്യ, ലോകകപ്പിന് മുമ്പ് തങ്ങൾ സജ്ജമാണെന്ന് പ്രഖ്യാപിച്ചു കഴിഞ്ഞു. ഇത് കൂടാതെ മോശം ഫോമിന്റെ പേരിൽ ഈ നാളുകളിൽ പഴികേട്ട താരം പരമ്പരയിലുടനീളം ബാറ്റിംഗിലും ഫീൽഡിംഗിലും മിന്നും പ്രകടനം കാകാഴ്ചവെച്ചു. നിർണ്ണായകമായ പല ഇന്നിംഗ്സുകളിലൂടെയും ഇന്ത്യയെ വിജയത്തിലേക്ക് നയിക്കാൻ അദ്ദേഹത്തിന് സാധിച്ചു.
രോഹിത് ശർമ്മയ്ക്ക് ശേഷം ടി20 ടീമിന്റെ കടിഞ്ഞാൺ ഏറ്റെടുത്ത സൂര്യകുമാർ യാദവ്, ഹാർദിക് പാണ്ഡ്യയെപ്പോലുള്ള സീനിയർ താരങ്ങളെയും യുവതാരങ്ങളെയും ഒരേപോലെ ഒത്തിണക്കത്തോടെ കൊണ്ടുപോകുന്നതിൽ വിജയിച്ചിരിക്കുകയാണ്. ലോകകപ്പ് ഫെബ്രുവരി 7-ന് തുടങ്ങാനിരിക്കെ, ടീം ഇന്ത്യക്ക് ഈ പരമ്പര വിജയം വലിയ ആത്മവിശ്വാസമാണ് നൽകുന്നത്.
Discussion about this post