പോക്സോ കേസിൽ പ്രതിയായ യുവാവ് അതിജീവിതയെ വിവാഹം കഴിച്ച് സന്തുഷ്ട ജീവിതം നയിക്കുന്ന സാഹചര്യം പരിഗണിച്ച് അവർക്കെതിരെയുള്ള ക്രിമിനൽ നടപടികൾ റദ്ദാക്കി ഹൈക്കോടതി. നിയമത്തിന്റെ കർക്കശമായ ചട്ടക്കൂടുകൾക്കപ്പുറം ഒരു കുടുംബത്തിന്റെ ഭാവി കൂടി കണക്കിലെടുത്താണ് ജസ്റ്റിസ് പി.വി. കുഞ്ഞികൃഷ്ണന്റെ നിർണ്ണായക ഉത്തരവ്. കേസ് തുടരുന്നത് ദമ്പതികളുടെ സമാധാനപരമായ ജീവിതത്തെ ബാധിക്കുമെന്നും കുട്ടിയുടെ സുരക്ഷിതത്വം ഉറപ്പാക്കേണ്ടതുണ്ടെന്നും കോടതി നിരീക്ഷിച്ചു.
സംഭവസമയത്ത് പെൺകുട്ടിക്ക് പ്രായപൂർത്തിയായിരുന്നില്ല എന്ന കാരണത്താലാണ് യുവാവിനെതിരെ പോക്സോ നിയമപ്രകാരം കേസെടുത്തിരുന്നത്. എന്നാൽ, പിന്നീട് പെൺകുട്ടിക്ക് പ്രായപൂർത്തിയായതോടെ ഇരുവരും നിയമപരമായി വിവാഹിതരാകുകയും ഇവർക്ക് ഒരു കുട്ടി ജനിക്കുകയും ചെയ്തു. നിലവിൽ യാതൊരു പരാതിയുമില്ലെന്നും ഭർത്താവിനൊപ്പം സന്തുഷ്ടയായി കഴിയുകയാണെന്നും അതിജീവിത കോടതിയെ അറിയിച്ചു. കേസ് നിലനിൽക്കുന്നത് തന്റെയും കുഞ്ഞിന്റെയും ഭാവിയെ തകർക്കുമെന്ന അതിജീവിതയുടെ വാദം കോടതി അംഗീകരിക്കുകയായിരുന്നു. സമാനമായ കേസുകളിൽ സുപ്രീം കോടതി പുറപ്പെടുവിച്ച വിവിധ മാർഗ്ഗനിർദ്ദേശങ്ങൾ കൂടി കണക്കിലെടുത്താണ് ഹൈക്കോടതി ഈ കനിവ് കാട്ടിയത്.
നിയമം നടപ്പിലാക്കുമ്പോൾ അത് ഒരു കുടുംബത്തിന്റെ തകർച്ചയ്ക്ക് കാരണമാകരുത് എന്ന നിരീക്ഷണമാണ് കോടതി നടത്തിയത്. വിവാഹശേഷം ദമ്പതികൾ ഒന്നിച്ച് കഴിയുന്ന സാഹചര്യത്തിൽ വിചാരണ തുടരുന്നത് വെറും സമയനഷ്ടമാണെന്നും കോടതി വിലയിരുത്തി. ഇതോടെ വർഷങ്ങളായി യുവാവ് അനുഭവിച്ചിരുന്ന നിയമയുദ്ധത്തിന് അന്ത്യമായി. ഈ ഉത്തരവ് സമാന സാഹചര്യത്തിലുള്ള നിരവധി കേസുകൾക്ക് മാതൃകയാകുമെന്നാണ് നിയമവിദഗ്ധർ കരുതുന്നത്.
