മോസ്കോ : തൊഴിൽ പ്രതിസന്ധി രൂക്ഷമായിരിക്കുന്ന സാഹചര്യത്തിൽ ഇന്ത്യയിൽ നിന്നും കൂടുതൽ തൊഴിലാളികളെ നിയമിക്കാൻ ഒരുങ്ങുകയാണ് റഷ്യ. ജനസംഖ്യാപരമായ ഇടിവും യുക്രേനിയൻ യുദ്ധവും മൂലം റഷ്യയിലെ പല മേഖലകളിലും തൊഴിലാളികളെ ലഭിക്കാനില്ലാത്ത അവസ്ഥയാണുള്ളത്. ഈ സാഹചര്യത്തെ നേരിടാനായി ഇന്ത്യയുടെ സഹായം തേടിയിരിക്കുകയാണ് റഷ്യ. പ്രസിഡന്റ് വ്ളാഡിമിർ പുടിന്റെ ന്യൂഡൽഹി സന്ദർശന വേളയിൽ, താൽക്കാലിക തൊഴിൽ കുടിയേറ്റം ലളിതമാക്കുന്നതിനുള്ള ഒരു കരാറിൽ ഇരു രാജ്യങ്ങളും ഒപ്പുവച്ചു. ഇത് ഇന്ത്യൻ തൊഴിലാളികൾക്കുള്ള പെർമിറ്റുകളിൽ വലിയ വർദ്ധനവിന് കാരണമായി.
ഇന്ത്യക്കാർക്ക് റഷ്യ നൽകിയ തൊഴിൽ പെർമിറ്റുകളുടെ എണ്ണം മുൻ വർഷങ്ങളിൽ ഉണ്ടായിരുന്ന 5,000 ൽ നിന്ന് 56,000 ൽ അധികമായി ഉയർത്തിയിരിക്കുകയാണ്. ജനനനിരക്ക് കുറയുന്നതിനാൽ 1990-കൾ മുതൽ റഷ്യ ഒരു ജനസംഖ്യാ പ്രതിസന്ധി നേരിടുന്നു. ജനസംഖ്യയുടെ ഏകദേശം നാലിലൊന്ന് പേർ വിരമിക്കൽ പ്രായത്തിലുള്ളവരാണ്. റഷ്യയിലെ തൊഴിലില്ലായ്മ നിരക്ക് ഏകദേശം 2% ആണ്, ഇത് ആഗോളതലത്തിൽ ഏറ്റവും താഴ്ന്ന നിരക്കുകളിൽ ഒന്നാണ്. തൽഫലമായി രാജ്യത്തിന് വിദേശത്ത് നിന്നുള്ള പുതിയ തൊഴിലാളികളെ ആവശ്യമുണ്ട്. ഈ സാഹചര്യത്തിലാണ് ഇന്ത്യയിൽ നിന്നും കൂടുതൽ തൊഴിലാളികൾക്ക് പെർമിറ്റ് നൽകാൻ റഷ്യ തീരുമാനിച്ചിരിക്കുന്നത്.
ദക്ഷിണേന്ത്യയിലെ ചെന്നൈയിൽ വെൽഡർമാർക്കായി ഒരു പരിശീലന കേന്ദ്രം സ്ഥാപിക്കുന്നതിനായി ഇൻട്രൂഡ് റഷ്യൻ അസോസിയേഷൻ ഓഫ് വെൽഡേഴ്സുമായി ഇന്ത്യ സഹകരിച്ചിട്ടുണ്ട്. ഇതുവഴി റഷ്യയിൽ നിയമിക്കുന്നതിന് മുമ്പ് ഉദ്യോഗാർത്ഥികൾക്ക് പരിശീലനം നൽകുകയും വിലയിരുത്തുകയും ചെയ്യുന്നു. കൂടാതെ ഹോട്ടൽ ജീവനക്കാർക്കും മറ്റ് തസ്തികകൾക്കും ഏജൻസികൾ റഷ്യൻ ഭാഷാ ക്രാഷ് കോഴ്സുകളും സംഘടിപ്പിക്കുന്നുണ്ട്.
Discussion about this post