ഇന്ത്യയിലെ ഐടി മേഖലയ്ക്ക് കറുത്ത വെള്ളിയാഴ്ച. ആഗോള വിപണിയിലെ തളർച്ചയും അമേരിക്കൻ തൊഴിൽ വിപണിയിലെ അപ്രതീക്ഷിത മാറ്റങ്ങളും ഐടി ഓഹരികളെ കൂപ്പുകുത്തിച്ചു. ഇൻഫോസിസ്, ടിസിഎസ്, വിപ്രോ തുടങ്ങിയ വമ്പൻമാരുടെ ഓഹരി വില അഞ്ചു ശതമാനം വരെയാണ് ഇന്ന് ഇടിഞ്ഞത്. നിഫ്റ്റി ഐടി ഇൻഡക്സ് അഞ്ച് ശതമാനത്തോളം ഇടിഞ്ഞതോടെ നിക്ഷേപകർക്ക് ലക്ഷക്കണക്കിന് കോടി രൂപയുടെ നഷ്ടമാണ് സംഭവിച്ചത്. ഭാരതീയ ഐടി കമ്പനികൾ അമേരിക്കൻ വിപണിയിൽ നിന്ന് വലിയ വരുമാനം നേടുന്നതിനാൽ, അവിടെയുണ്ടാകുന്ന ഓരോ ചലനവും ദലാൽ സ്ട്രീറ്റിൽ വലിയ പ്രത്യാഘാതങ്ങളാണ് ഉണ്ടാക്കുന്നത്.
അമേരിക്കയിലെ ശക്തമായ തൊഴിൽ കണക്കുകളാണ് വിപണിയെ ആശങ്കയിലാക്കിയത്. തൊഴിൽ വിപണി കരുത്താർജ്ജിക്കുന്നത് പലിശനിരക്ക് കുറയ്ക്കാനുള്ള ഫെഡറൽ റിസർവിന്റെ തീരുമാനത്തെ ബാധിക്കുമെന്ന ഭീതിയാണ് ഓഹരി വിപണിയിൽ പ്രതിഫലിച്ചത്. പലിശനിരക്ക് ദീർഘകാലം ഉയർന്നുനിൽക്കുന്നത് ഐടി കമ്പനികളുടെ മൂല്യത്തെ ബാധിക്കുമെന്ന തിരിച്ചറിവ് ആഗോളതലത്തിൽ തന്നെ സാങ്കേതിക ഓഹരികളിൽ വലിയ വിറ്റഴിക്കലിന് (Sell-off) കാരണമായി. അമേരിക്കൻ വിപണിയിൽ ലിസ്റ്റ് ചെയ്തിട്ടുള്ള ഇന്ത്യൻ കമ്പനികളുടെ എഡിആറുകൾ (ADR) കഴിഞ്ഞ ദിവസം ഇടിഞ്ഞത് ഇന്ന് ഇന്ത്യൻ വിപണിയിലും കനത്ത തകർച്ചയ്ക്ക് വഴിമരുന്നിട്ടു.
സാമ്പത്തിക ഘടകങ്ങൾക്കപ്പുറം, ആന്ത്രോപിക് (Anthropic) പോലുള്ള വിദേശ കമ്പനികൾ വികസിപ്പിച്ചെടുത്ത കൃത്രിമ ബുദ്ധി (AI) സംവിധാനങ്ങളാണ് നിക്ഷേപകരെ ആശങ്കപ്പെടുത്തുന്നത്. കോഡിംഗും സോഫ്റ്റ്വെയർ പരിപാലനവും ആർട്ടിഫിഷ്യൽ ഇന്റലിജൻസ് ഏറ്റെടുക്കുന്നതോടെ തൊഴിൽ അധിഷ്ഠിത ഐടി മാതൃക വെല്ലുവിളി നേരിടുമെന്ന പ്രചാരണം ശക്തമാണ്. ആന്ത്രോപിക്കിന്റെ പുതിയ പ്ലഗിന്നുകൾ പുറത്തുവന്നതോടെ പരമ്പരാഗത ഐടി സേവനങ്ങളുടെ പ്രസക്തി കുറയുമോ എന്ന ഭീതി വിപണിയിൽ വിറ്റഴിക്കലിന് വേഗത കൂട്ടി. “ആന്ത്രോപിക് ഷോക്കിൽ നിന്നും ഐടി ഓഹരികൾ ഉടനെ കരകയറാൻ സാധ്യതയില്ല” എന്നാണ് പ്രമുഖ സാമ്പത്തിക വിദഗ്ധർ വിലയിരുത്തുന്നത്.
Discussion about this post