മികച്ച ടീമുകൾ പുറത്തേക്ക്? ഇന്ത്യയുടെ സെമി ഫൈനൽ മോഹങ്ങൾക്ക് തുരങ്കം വെച്ച് ഐസിസിയുടെ വിചിത്ര നിയമം

2026 ടി20 ലോകകപ്പിലെ സൂപ്പർ-8 ഗ്രൂപ്പ് ഘടനയെച്ചൊല്ലി ഐസിസി വലിയ വിവാദത്തിൽ. ടൂർണമെന്റിലെ മികച്ച പ്രകടനം കാഴ്ചവെച്ച ടീമുകളെ ഒരേ ഗ്രൂപ്പിൽ ഉൾപ്പെടുത്തിയ ‘പ്രീ-സീഡിങ്’ രീതിക്കെതിരെ സോഷ്യൽ മീഡിയയിൽ പ്രതിഷേധം കടുക്കുകയാണ്.

ഗ്രൂപ്പ് ഘട്ടത്തിലെ പോരാട്ടങ്ങൾ അവസാനിച്ചപ്പോൾ പുറത്തുവന്ന സൂപ്പർ-8 പട്ടിക ആരാധകരെയും ക്രിക്കറ്റ് നിരീക്ഷകരെയും ഒരുപോലെ ഞെട്ടിച്ചിരിക്കുകയാണ്. ഗ്രൂപ്പ് ഘട്ടത്തിൽ ഒന്നാം സ്ഥാനക്കാരായി എത്തിയവർക്ക് യാതൊരു മുൻഗണനയും ലഭിക്കാത്ത രീതിയിലാണ് ഇപ്പോഴത്തെ ക്രമീകരണം.

ടൂർണമെന്റ് തുടങ്ങുന്നതിന് മുൻപേ തന്നെ വമ്പൻ ടീമുകൾക്ക് ഐസിസി പ്രത്യേക സ്ഥാനങ്ങൾ (A1, B1, C1, D1 എന്നിങ്ങനെ) നിശ്ചയിച്ചിരുന്നു. ഈ ടീമുകൾ അവരുടെ ഗ്രൂപ്പിൽ എത്രാമത് എത്തിയാലും ഈ നിശ്ചിത സ്ഥാനങ്ങളിൽ തന്നെ തുടരും എന്നതായിരുന്നു നിയമം. ഇത് വിചിത്രമായ ഒരു സാഹചര്യത്തിന് വഴിവെച്ചു. ഗ്രൂപ്പ് 1 ൽ ഒന്നാം സ്ഥാനക്കാരായ നാല് ടീമുകൾ ഈ ഗ്രൂപ്പിൽ ഒത്തുചേർന്നു (ഇന്ത്യ, സിംബാബ്‌വെ, വെസ്റ്റ് ഇൻഡീസ്, സൗത്ത് ആഫ്രിക്ക).

ഗ്രൂപ്പ് 2 ൽ  ഗ്രൂപ്പ് ഘട്ടത്തിൽ രണ്ടാം സ്ഥാനക്കാരായ നാല് ടീമുകൾ ഇവിടെയും ഒന്നിച്ചു (പാകിസ്താൻ, ശ്രീലങ്ക, ഇംഗ്ലണ്ട്, ന്യൂസിലാൻഡ്). മികച്ച ഫോമിലുള്ള ടീമുകൾ സൂപ്പർ-8ൽ തന്നെ പരസ്പരം ഏറ്റുമുട്ടി പുറത്തുപോകേണ്ടി വരുമ്പോൾ, ഗ്രൂപ്പ് ഘട്ടത്തിൽ കഷ്ടിച്ച് രണ്ടാം സ്ഥാനത്തെത്തിയ ടീമുകൾക്ക് സെമി ഫൈനലിലേക്ക് താരതമ്യേന എളുപ്പവഴിയാണ് ലഭിച്ചിരിക്കുന്നത്. ഉദാഹരണത്തിന്, ഗ്രൂപ്പിൽ ഒന്നാമതെത്തിയ സൗത്ത് ആഫ്രിക്കയ്ക്ക് ലഭിച്ചത് കടുപ്പമേറിയ ഗ്രൂപ്പാണ്. എന്നാൽ ഗ്രൂപ്പിൽ രണ്ടാമതായ ന്യൂസിലാൻഡ് ‘ലോ സീഡ്’ ആയിരുന്നിട്ടും പ്രീ-സീഡിങ് കാരണം എളുപ്പമുള്ള ഗ്രൂപ്പിൽ ഇടംപിടിച്ചു.

ആതിഥേയരായ ശ്രീലങ്കയ്ക്കും ഈ ഫോർമാറ്റ് തിരിച്ചടിയാണ്. സ്വന്തം മണ്ണിൽ മികച്ച പ്രകടനം നടത്തി സെമിയിലെത്തിയാലും, ഐസിസിയുടെ മുൻകൂട്ടി നിശ്ചയിച്ച ഷെഡ്യൂൾ പ്രകാരം സെമി ഫൈനൽ കളിക്കാൻ അവർ ഇന്ത്യയിലേക്ക് പറക്കേണ്ടി വരും. ഇത് കൊളംബോയിലെ കാണികൾക്ക് മുന്നിൽ കളിക്കാനുള്ള അവരുടെ അവസരം നഷ്ടപ്പെടുത്തുന്നു. യാത്രാ സൗകര്യങ്ങളും സ്റ്റേഡിയം ക്രമീകരണങ്ങളും മുൻകൂട്ടി പ്ലാൻ ചെയ്യേണ്ടതിനാലാണ് ഇത്തരമൊരു രീതി അവലംബിച്ചതെന്നാണ് ഐസിസിയുടെ വാദം.