ഭാരത് മണ്ഡപത്തിൽ നടന്ന ആഗോള എഐ (AI) ഉച്ചകോടിക്കിടെ യൂത്ത് കോൺഗ്രസ് നടത്തിയ വിവാദമായ ‘നഗ്ന പ്രതിഷേധ’ത്തിന് പിന്നിൽ അന്താരാഷ്ട്ര തലത്തിലുള്ള ഗൂഢാലോചനയുണ്ടെന്ന് ഡൽഹി പോലീസ്. അയൽരാജ്യമായ നേപ്പാളിൽ ഭരണകൂടത്തെ അട്ടിമറിച്ച ‘ജെൻ സി’ (Gen Z) പ്രക്ഷോഭങ്ങളിൽ നിന്ന് പ്രചോദനം ഉൾക്കൊണ്ടാണ് ഈ നാടകം ആസൂത്രണം ചെയ്തതെന്ന് പോലീസ് കോടതിയിൽ വ്യക്തമാക്കി. പ്രധാനമന്ത്രി നരേന്ദ്ര മോദിയെയും ആഗോള ടെക് ഭീമന്മാരെയും സാക്ഷിയാക്കി നടത്തിയ ഈ പ്രതിഷേധം രാജ്യത്തിന്റെ പ്രതിച്ഛായ തകർക്കാൻ ലക്ഷ്യമിട്ടുള്ളതായിരുന്നുവെന്നും പോലീസ് ചൂണ്ടിക്കാട്ടി.
പ്രതിഷേധക്കാർ ധരിച്ചിരുന്ന ടീ-ഷർട്ടുകളിൽ പ്രധാനമന്ത്രിക്കെതിരായ മോശം പരാമർശങ്ങൾക്ക് പുറമെ ‘ഇന്ത്യ-യുഎസ് ട്രേഡ് ഡീൽ’, ‘എപ്സ്റ്റീൻ ഫയൽസ്’ തുടങ്ങിയ വാചകങ്ങളും പതിപ്പിച്ചിരുന്നു. അതിസങ്കീർണ്ണമായ സുരക്ഷാ സംവിധാനങ്ങൾ മറികടക്കാൻ ക്യുആർ കോഡുകൾ എങ്ങനെ ഇവർക്ക് ലഭിച്ചു എന്നതിനെക്കുറിച്ച് പോലീസ് വിശദമായ അന്വേഷണം ആരംഭിച്ചു. ഈ ടി-ഷർട്ടുകൾ പ്രിന്റ് ചെയ്തതിനും പ്രതിഷേധം സംഘടിപ്പിച്ചതിനും പിന്നിൽ ആരുടെ ഫണ്ടിംഗ് ഉണ്ടെന്നത് കണ്ടെത്താൻ പ്രതികളെ കസ്റ്റഡിയിൽ വേണമെന്ന് പോലീസ് കോടതിയിൽ ആവശ്യപ്പെട്ടു. പത്തിലധികം വരുന്ന സംഘം വേദിയിൽ ഷർട്ടൂരി മുദ്രാവാക്യം വിളിച്ചത് അന്താരാഷ്ട്ര പ്രതിനിധികൾക്ക് മുന്നിൽ ഇന്ത്യയെ നാണം കെടുത്തിയെന്നും ബിജെപി ആരോപിച്ചു.
സംഭവത്തെ തുടർന്ന് കോൺഗ്രസിനെതിരെ രൂക്ഷമായ പരിഹാസവുമായാണ് ബിജെപി രംഗത്തെത്തിയത്. “കോൺഗ്രസിനെ വിശേഷിപ്പിക്കാൻ ടോപ്ലെസ്, ബ്രെയിൻലെസ്, ഷെയിംലെസ് (Topless, Brainless, Shameless) എന്നീ മൂന്ന് വാക്കുകൾ മതി” എന്ന് ബിജെപി വക്താവ് സംബിത് പത്ര പരിഹസിച്ചു. സാം ആൾട്ട്മാൻ, സുന്ദർ പിച്ചൈ തുടങ്ങിയ ആഗോള പ്രമുഖർ പങ്കെടുത്ത ഉച്ചകോടിയെ അട്ടിമറിക്കാൻ ശ്രമിച്ചത് രാജ്യദ്രോഹത്തിന് തുല്യമാണെന്ന് കേന്ദ്രമന്ത്രി ഭൂപേന്ദർ യാദവ് കുറ്റപ്പെടുത്തി. ഇതിനിടെ, മുബൈയിൽ രാഹുൽ ഗാന്ധിയുടെ വാഹനത്തിന് നേരെ കരിങ്കൊടി വീശിയും ജമ്മുവിൽ കോൺഗ്രസ് ആസ്ഥാനത്തിന് മുന്നിൽ പ്രതിഷേധിച്ചും ബിജെപി രംഗത്തെത്തി.
നാല് യൂത്ത് കോൺഗ്രസ് നേതാക്കൾ നിലവിൽ പോലീസ് കസ്റ്റഡിയിലാണ്. ഡിജിറ്റൽ തെളിവുകളുടെയും സിസിടിവി ദൃശ്യങ്ങളുടെയും അടിസ്ഥാനത്തിൽ അന്വേഷണം പുരോഗമിക്കുകയാണ്.
Discussion about this post