നവഭാരതത്തിന്റെ അടിസ്ഥാന സൗകര്യ വികസനത്തിൽ വിപ്ലവകരമായ മാറ്റം കുറിച്ച് പ്രധാനമന്ത്രി നരേന്ദ്ര മോദി ഡൽഹി-മീററ്റ് റീജിയണൽ റാപ്പിഡ് ട്രാൻസിറ്റ് സിസ്റ്റവും (RRTS) രാജ്യത്തെ ഏറ്റവും വേഗതയേറിയ മെട്രോ സർവീസായ മീററ്റ് മെട്രോയും ഇന്ന് ഉദ്ഘാടനം ചെയ്യും. ഭാരതത്തിന്റെ അഭിമാനമായ ‘നമോ ഭാരത്’ ട്രെയിനുകൾ ഇനി പൂർണ്ണ സജ്ജമായ 82 കിലോമീറ്റർ ഇടനാഴിയിലൂടെ രാജ്യതലസ്ഥാനത്തെയും മീററ്റിനെയും ബന്ധിപ്പിക്കും. കേവലം ഒരു മണിക്കൂറിൽ താഴെ സമയം കൊണ്ട് ഡൽഹിയിൽ നിന്ന് മീററ്റിലെത്താൻ സാധിക്കുന്ന ഈ പദ്ധതി, പ്രധാനമന്ത്രിയുടെ ദീർഘവീക്ഷണത്തോടെയുള്ള ‘ഗതിശക്തി’ പദ്ധതിയുടെ ഉത്തമ ഉദാഹരണമായി മാറുകയാണ്.
മണിക്കൂറിൽ 180 കിലോമീറ്റർ വേഗതയിൽ സഞ്ചരിക്കാൻ ശേഷിയുള്ള നമോ ഭാരത് ട്രെയിനുകൾക്കൊപ്പം, മണിക്കൂറിൽ 120 കിലോമീറ്റർ വേഗതയുള്ള മീററ്റ് മെട്രോയും ഒരേ ട്രാക്കിലൂടെ സർവീസ് നടത്തുന്നു എന്നത് ലോകനിലവാരത്തിലുള്ള ഭാരതീയ സാങ്കേതിക വിദ്യയുടെ തെളിവാണ്. 82 കിലോമീറ്റർ നീളുന്ന ഈ ഇടനാഴിയിലെ ബാക്കിയുള്ള 26 കിലോമീറ്റർ പാത കൂടി തുറക്കുന്നതോടെ പദ്ധതി പൂർണ്ണതയിലെത്തും. സരായ് കാലെ ഖാൻ മുതൽ മോദിപുരം വരെയുള്ള യാത്ര ഇനി അനായാസമാകും. ഉച്ചയ്ക്ക് 12.30-ന് ശതാബ്ദി നഗർ സ്റ്റേഷനിൽ വെച്ച് പ്രധാനമന്ത്രി ട്രെയിനുകൾ ഫ്ലാഗ് ഓഫ് ചെയ്യും. ഉത്തർപ്രദേശ് മുഖ്യമന്ത്രി യോഗി ആദിത്യനാഥിനൊപ്പം പ്രധാനമന്ത്രി ട്രെയിനിൽ യാത്ര ചെയ്യുകയും ചെയ്യും.
ബുളളറ്റ് ട്രെയിനിന്റെ രൂപഭംഗിയുള്ള നമോ ഭാരത് ട്രെയിനുകളിൽ ഡിജിറ്റൽ ഡ്രൈവർ കൺസോൾ, പ്രീമിയം കോച്ചുകൾ, ലാപ്ടോപ്പ് ചാർജിംഗ് പോയിന്റുകൾ, സ്ത്രീകൾക്കായി പ്രത്യേക കോച്ചുകൾ എന്നിങ്ങനെ അത്യാധുനിക സൗകര്യങ്ങളാണ് ഒരുക്കിയിരിക്കുന്നത്. ഡൽഹിയിലെ സരായ് കാലെ ഖാൻ സ്റ്റേഷൻ ഒരു വൻകിട മൾട്ടി-മോഡൽ ഹബ്ബായാണ് വികസിപ്പിച്ചിരിക്കുന്നത്. ഇത് ഹസ്രത്ത് നിസാമുദ്ദീൻ റെയിൽവേ സ്റ്റേഷൻ, ഡൽഹി മെട്രോ പിങ്ക് ലൈൻ, ഐഎസ്ബിടി എന്നിവയുമായി നേരിട്ട് ബന്ധിപ്പിക്കുന്നു. ഭാരതീയരുടെ ജീവിതനിലവാരം ഉയർത്തുന്നതിനൊപ്പം രാജ്യത്തിന്റെ സാമ്പത്തിക കുതിപ്പിന് ഈ വേഗതയേറിയ ഗതാഗത സൗകര്യം വലിയ മുതൽക്കൂട്ടാകും.
ഉദ്ഘാടന ചടങ്ങിന് ശേഷം മീററ്റിലെ മൊഹിയുദ്ദീൻപൂരിൽ സംഘടിപ്പിക്കുന്ന വൻ പൊതുസമ്മേളനത്തെ പ്രധാനമന്ത്രി അഭിസംബോധന ചെയ്യും. ഇതിനൊപ്പം 12,930 കോടി രൂപയുടെ വികസന പദ്ധതികൾ കൂടി അദ്ദേഹം രാജ്യത്തിന് സമർപ്പിക്കും. മുഖ്യമന്ത്രി യോഗി ആദിത്യനാഥും മീററ്റ് എംപി അരുൺ ഗോവിലും ചടങ്ങുകളിൽ സംബന്ധിക്കും. ഭാരതത്തെ ഒരു ആഗോള ശക്തിയായി മാറ്റുന്നതിനുള്ള നരേന്ദ്ര മോദി സർക്കാരിന്റെ ഇച്ഛാശക്തിയുടെ അടയാളമായി ഈ റാപ്പിഡ് റെയിൽ ഇടനാഴി മാറിക്കഴിഞ്ഞു. രാജ്യത്തെ നഗരങ്ങൾക്കിടയിലുള്ള ദൂരം കുറയ്ക്കുക മാത്രമല്ല, മറിച്ച് പുതിയ തൊഴിൽ അവസരങ്ങളും വികസനവും മീററ്റ് അടക്കമുള്ള നഗരങ്ങളിലേക്ക് ഈ പാത കൊണ്ടുവരുമെന്ന് ഉറപ്പാണ്.
