ന്യൂഡൽഹി : എഐ ഉച്ചകോടിയിലെ പ്രതിഷേധങ്ങളുമായി ബന്ധപ്പെട്ട് യൂത്ത് കോൺഗ്രസ് പ്രസിഡന്റ് ഉദയ് ഭാനു ചിബിനെ ഡൽഹി പോലീസ് അറസ്റ്റ് ചെയ്ത സംഭവത്തെ അപലപിച്ച് രാഹുൽ ഗാന്ധി. സത്യം രാജ്യത്തിന് മുന്നിൽ തുറന്നുകാട്ടിയതിന് യൂത്ത് കോൺഗ്രസ് പ്രസിഡന്റ് ഉദയ് ഭാനു ചിബിനെയും മറ്റ് ഐവൈസി സഹപ്രവർത്തകരെയും അറസ്റ്റ് ചെയ്തത് സ്വേച്ഛാധിപത്യ പ്രവണതകളുടെയും ഭീരുത്വത്തിന്റെയും തെളിവാണെന്ന് രാഹുൽ ഗാന്ധി എക്സില് പങ്കുവെച്ച ഒരു പോസ്റ്റിൽ എഴുതി. ഞങ്ങൾ ഞങ്ങളുടെ ധീര സിംഹങ്ങൾക്കൊപ്പം നിൽക്കുന്നു എന്നും രാഹുൽ അറിയിച്ചു.
സമാധാനപരമായി പ്രതിഷേധിക്കാനുള്ള അവകാശം ചരിത്രപരമായി നമുക്കുണ്ടെന്നും രാഹുൽ ഗാന്ധി സൂചിപ്പിച്ചു. ” വഞ്ചന കാണിച്ച പ്രധാനമന്ത്രിക്കെതിരെ ദേശീയ താൽപ്പര്യത്തിനായി നിർഭയമായി ശബ്ദമുയർത്തിയ എന്റെ സഹ യൂത്ത് കോൺഗ്രസ് അംഗങ്ങളെ ഓർത്ത് ഞാൻ അഭിമാനിക്കുന്നു. യുഎസുമായുള്ള വ്യാപാര കരാർ രാജ്യത്തിന്റെ താൽപ്പര്യങ്ങൾക്ക് വിട്ടുവീഴ്ച ചെയ്തു. ഈ കരാർ നമ്മുടെ കർഷകരെയും തുണി വ്യവസായത്തെയും ദോഷകരമായി ബാധിക്കുകയും നമ്മുടെ ഡാറ്റ യുഎസിന് കൈമാറുകയും ചെയ്യും.
ഈ സത്യം രാജ്യത്തിന് മുന്നിൽ തുറന്നുകാട്ടിയതിനാണ് യൂത്ത് കോൺഗ്രസ് പ്രസിഡന്റ് ഉദയ് ഭാനു ചിബിനെയും മറ്റ് ഐവൈസി സഹപ്രവർത്തകരെയും അറസ്റ്റ് ചെയ്തത്, ” എന്നും രാഹുൽ ഗാന്ധി എക്സിലെ പോസ്റ്റിൽ സൂചിപ്പിച്ചു.
