ബാബറിനെ വിടാതെ അശ്വിൻ; പാക് നായകന്റെ മെല്ലെപ്പോക്കിനെ പരിഹസിച്ച് തമിഴ്നാട് താരം, ട്രോൾ ചർച്ചയാകുന്നു

ടി20 ലോകകപ്പ് സൂപ്പർ-8 പോരാട്ടത്തിൽ ഇംഗ്ലണ്ടിനെതിരെ പാകിസ്ഥാൻ നായകൻ ബാബർ അസം വീണ്ടും ബാറ്റിംഗിൽ പരാജയപ്പെട്ടതോടെ, താരത്തെ പരിഹസിച്ച് ഇന്ത്യൻ സ്പിന്നർ ആർ. അശ്വിൻ. ഇന്നലെ നടന്ന മത്സരത്തിൽ 24 പന്തിൽ 25 റൺസെടുത്ത ബാബറിന്റെ മെല്ലെപ്പോക്ക് ബാറ്റിംഗിനെതിരെ സോഷ്യൽ മീഡിയയിൽ ട്രോളുകൾ നിറയുകയാണ്.

നിർണ്ണായക സൂപ്പർ-8 മത്സരത്തിൽ പാകിസ്ഥാൻ ടോസ് നേടി ബാറ്റിംഗ് തിരഞ്ഞെടുത്തുവെങ്കിലും ബാബറിന് പ്രതീക്ഷിച്ച വേഗത്തിൽ റൺസ് കണ്ടെത്താനായില്ല. ബാബർ ബാറ്റിംഗിന് ഇറങ്ങിയപ്പോൾ അദ്ദേഹം മികച്ച ഫോമിലാണെന്നും ഇന്ന് ബാബറിന്റെ ദിവസമായിരിക്കുമെന്നും സ്പോർട്സ് അനലിസ്റ്റ് പ്രസന്ന അഗോറം എക്‌സിൽ (X) കുറിച്ചിരുന്നു. ഇതിന് മറുപടിയായാണ് ആർ. അശ്വിൻ രസകരമായ ഒരു മീം പങ്കുവെച്ചത്. “ഞാൻ നിനക്ക് ഒരിക്കൽ കൂടി മുന്നറിയിപ്പ് നൽകുന്നു” എന്ന അടിക്കുറിപ്പോടെയുള്ള അശ്വിന്റെ പോസ്റ്റ് നിമിഷങ്ങൾക്കുള്ളിൽ വൈറലായി.

നേരത്തെ ഗ്രൂപ്പ് ഘട്ടത്തിൽ ഇന്ത്യക്കെതിരെ 5 റൺസിന് പുറത്തായപ്പോഴും അശ്വിൻ ബാബറിനെ പരിഹസിച്ചിരുന്നു. ഈ ലോകകപ്പിലെ നാല് ഇന്നിംഗ്‌സുകളിൽ നിന്നായി വെറും 91 റൺസാണ് ബാബറിന്റെ സമ്പാദ്യം. 112.34 എന്ന പരിതാപകരമായ സ്ട്രൈക്ക് റേറ്റ് ടീമിനെ വലിയ രീതിയിൽ ബാധിക്കുന്നുണ്ട്. ഇംഗ്ലണ്ടിനെതിരെയും 100-ന് അടുത്ത് മാത്രം സ്ട്രൈക്ക് റേറ്റിൽ ബാറ്റ് ചെയ്ത ബാബറിനെതിരെ മുൻ താരങ്ങളും വിമർശനവുമായി രംഗത്തെത്തി.

ബാബർ പരാജയപ്പെട്ടെങ്കിലും ഓപ്പണർ സാഹിബ്സാദ ഫർഹാന്റെ അർദ്ധ സെഞ്ച്വറി പാകിസ്ഥാനെ ഭേദപ്പെട്ട സ്കോറിലെത്തിക്കുകയായിരുന്നു. 45 പന്തിൽ 63 റൺസാണ് താരം നേടിയത്. ഫഖർ സമാൻ (25), ഷദബ് ഖാൻ (23) എന്നിവരുടെ ചെറിയ വെടിക്കെട്ടുകൾ കൂടി ചേർന്നതോടെ പാകിസ്ഥാൻ 20 ഓവറിൽ 9 വിക്കറ്റ് നഷ്ടത്തിൽ 164 റൺസെടുത്തു. ഇംഗ്ലണ്ടിനായി ലിയാം ഡോസൺ മൂന്ന് വിക്കറ്റുകൾ വീഴ്ത്തി. എന്നാൽ മറുപടിയിൽ നായകൻ ബ്രൂക്കിന്റെ സെഞ്ച്വറി മികവിൽ ഇംഗ്ലണ്ട് 2 വിക്കറ്റിന്റെ ആവേശ ജയം സ്വന്തമാക്കുക ആയിരുന്നു.

I am warning you once more https://t.co/IA75B3Hp9U pic.twitter.com/X08mOzgfeF

— Ashwin 🇮🇳 (@ashwinravi99) February 24, 2026