ചെന്നൈയിലെ ചെപ്പോക്ക് സ്റ്റേഡിയത്തിൽ സിംബാബ്വെക്കെതിരായ നിർണ്ണായക പോരാട്ടത്തിന് ഇന്ത്യ ഒരുങ്ങുമ്പോൾ, മലയാളി താരം സഞ്ജു സാംസണെ ചുറ്റിപ്പറ്റിയുള്ള ആവേശം കൊടുമുടിയിലാണ്. പരിശീലന സെക്ഷനുശേഷം സഞ്ജുവിന്റെ എളിമയോടെയുള്ള പെരുമാറ്റം ഇപ്പോൾ സോഷ്യൽ മീഡിയയിൽ തരംഗമായിരിക്കുകയാണ്.
ചൊവ്വാഴ്ച നടന്ന നീണ്ട നെറ്റ് സെഷന് ശേഷം സ്റ്റേഡിയത്തിന് പുറത്ത് കാത്തുനിന്ന ആരാധകന് പുഞ്ചിരിയോടെ ഓട്ടോഗ്രാഫ് നൽകുന്ന സഞ്ജുവിന്റെ വീഡിയോ ആണ് ഇപ്പോൾ വൈറലായിരിക്കുന്നത്. സഞ്ജുവിന്റെ ലാളിത്യവും വിനയവും ഒരിക്കൽ കൂടി ചർച്ചയാകുന്ന നിമിഷമായിരുന്നു അത്.
ഇന്ത്യയുടെ മുൻനിര ബാറ്റർമാരുടെ തുടർച്ചയായ പരാജയങ്ങൾ സഞ്ജു സാംസണ് ടീമിലേക്കുള്ള വഴി തുറക്കുമെന്നാണ് സൂചന. സഞ്ജുവിന്റെ സാന്നിധ്യം ടീം മാനേജ്മെന്റ് ഗൗരവമായി ചർച്ച ചെയ്യുന്നുണ്ടെന്ന് അസിസ്റ്റന്റ് കോച്ച് റയാൻ ടെൻ ഡോഷെറ്റ് സ്ഥിരീകരിച്ചു. നേരത്തെ അഭിഷേക് ശർമ്മയ്ക്ക് സുഖമില്ലാതിരുന്നപ്പോൾ നമീബിയക്കെതിരെ കളിച്ച സഞ്ജു എട്ട് പന്തിൽ 22 റൺസെടുത്ത് വെടിക്കെട്ട് പ്രകടനം കാഴ്ചവെച്ചിരുന്നു.
സഞ്ജു ടീമിലെത്തിയാൽ ആര് പുറത്തിരിക്കേണ്ടി വരും എന്നതാണ് ഇപ്പോൾ ഉയരുന്ന ചോദ്യം. ഫോമില്ലാതെ ഉഴലുന്ന ഓപ്പണർ അഭിഷേക് ശർമ്മയോ അതോ തിലക് വർമ്മയോ? ചെപ്പോക്കിലെ പിച്ചിൽ സഞ്ജുവിനെപ്പോലൊരു താരത്തിന്റെ സാന്നിധ്യം ടീമിന് കരുത്താകുമെന്ന് ഉറപ്പാണ്. പവർപ്ലേ ഓവറുകളിൽ അതിവേഗം റൺസ് കണ്ടെത്താനുള്ള സഞ്ജുവിന്റെ കഴിവിലാണ് ഇന്ത്യയുടെ പ്രതീക്ഷ.
സെമി ഫൈനൽ സാധ്യത നിലനിർത്താൻ വരാനിരിക്കുന്ന രണ്ട് മത്സരങ്ങളിലും ഇന്ത്യയ്ക്ക് വിജയം അനിവാര്യമാണ്. നാളെ ഇന്ത്യ സിംബാബ്വെയെയും തുടർന്ന് വെസ്റ്റ് ഇൻഡീസിനെയും നേരിടും. സിംബാബ്വെയും വെസ്റ്റ് ഇൻഡീസും കരുത്തരാണെങ്കിലും ഇന്ത്യയ്ക്ക് അവരെ പരാജയപ്പെടുത്താൻ സാധിക്കുമെന്ന ആത്മവിശ്വാസത്തിലാണ് ആരാധകർ.
Sanju Samson stopping to sign autographs that quiet smiles says everything.
No rush , No ego just gratitude for the fans. pic.twitter.com/re4izB1n21
— Yash MSdian ™️ 🦁 (@itzyash07) February 25, 2026
