നമീബിയക്കെതിരായ പോരാട്ടത്തിന് പിന്നാലെ സിംബാബ്വെക്കെതിരെയും മികച്ച തുടക്കം ലഭിച്ചിട്ടും വലിയ സ്കോറിലേക്ക് എത്താനാവാതെ സഞ്ജു സാംസൺ പുറത്ത്. 15 പന്തിൽ രണ്ട് തകർപ്പൻ സിക്സറുകളും ഒരു ഫോറുമടക്കം 24 റൺസെടുത്താണ് സഞ്ജു മടങ്ങിയത്. താരം പുറത്തായെങ്കിലും ക്രീസിലുണ്ടായിരുന്ന ചുരുങ്ങിയ സമയം വിന്റേജ് സഞ്ജുവിനെ അനുസ്മരിപ്പിക്കുന്ന മാസ്മരിക ഷോട്ടുകളാൽ ചെപ്പോക്കിനെ ആവേശത്തിലാക്കാൻ അദ്ദേഹത്തിന് സാധിച്ചു.
ടോസ് നഷ്ടപ്പെട്ട് ബാറ്റിംഗിനിറങ്ങിയ ഇന്ത്യക്കായി ഓപ്പണറുടെ റോളിലെത്തിയ സഞ്ജു തുടക്കം മുതൽ ആക്രമിച്ചു കളിക്കാനാണ് ശ്രമിച്ചത്. നമീബിയക്കെതിരെ 8 പന്തിൽ 22 റൺസ് നേടി പുറത്തായ സഞ്ജു, ഇന്നും അതേ ശൈലി തന്നെയാണ് പിന്തുടർന്നത്. സിംബാബ്വെ ബൗളർമാരെ കടന്നാക്രമിച്ച സഞ്ജു രണ്ട് മനോഹരമായ സിക്സറുകൾ പറത്തി. റിസ്ക് എടുത്തു കളിക്കാനുള്ള ശ്രമത്തിനിടയിലാണ് 24 റൺസിൽ നിൽക്കെ താരം പുറത്തായത്. എങ്കിലും ഇന്ത്യക്ക് ആവശ്യമായ വേഗത്തിലുള്ള തുടക്കം നൽകാൻ സഞ്ജുവിന് സാധിച്ചു.
സൂപ്പർ-8 ലെ ശേഷിക്കുന്ന മത്സരങ്ങളിലും നോക്കൗട്ട് പോരാട്ടങ്ങളിലും സഞ്ജു ഈ തുടക്കങ്ങൾ വലിയ ഇന്നിംഗ്സുകളാക്കി മാറ്റുമെന്ന പ്രതീക്ഷയിലാണ് ആരാധകർ. നിലവിൽ 6 ഓവറിൽ നിന്ന് 80 റൺസ് എടുത്ത ഇന്ത്യ കൂറ്റൻ സ്കോറാണ് ലക്ഷ്യമിടുന്നത്.
