ചെന്നൈയിലെ ക്രിക്കറ്റ് ആരാധകരുടെ സ്നേഹത്തിന് മുന്നിൽ മനസ്സ് തുറന്ന് മലയാളി താരം സഞ്ജു സാംസൺ. ഐപിഎൽ 2026-ന് മുന്നോടിയായുള്ള ട്രേഡിംഗിന് ശേഷം ആദ്യമായി ചെന്നൈയിലെത്തിയ സഞ്ജുവിന് ലഭിച്ചത് സമാനതകളില്ലാത്ത വരവേൽപ്പാണ്. ഇതിനെക്കുറിച്ച് സംസാരിക്കവേയാണ് ചെന്നൈയും കേരളവും തമ്മിലുള്ള ആത്മബന്ധത്തെക്കുറിച്ചും ആരാധകർ നൽകുന്ന ഊർജ്ജത്തെക്കുറിച്ചും താരം വാചാലനായത്.
ഐപിഎല്ലിൽ രാജസ്ഥാൻ റോയൽസിൽ നിന്നും ചെന്നൈ സൂപ്പർ കിംഗ്സിലേക്കുള്ള സഞ്ജുവിന്റെ ചുവടുമാറ്റം ക്രിക്കറ്റ് ലോകത്ത് വലിയ ചർച്ചയായിരുന്നു.
ചെന്നൈയിലെ ആരാധകരെക്കുറിച്ച് സഞ്ജു പറഞ്ഞ വാക്കുകൾ ഇങ്ങനെ:
“ട്രേഡിംഗിന് ശേഷം ഞാൻ ആദ്യമായാണ് ഇവിടെ വരുന്നത്. വിമാനത്താവളത്തിൽ ഇറങ്ങിയ നിമിഷം മുതൽ എനിക്ക് ആ സ്നേഹവും കരുതലും അനുഭവിക്കാൻ കഴിയുന്നുണ്ട്. സാധാരണയായി നമ്മൾ ഇവിടെ വരാറുണ്ട്, കേരളവും ചെന്നൈയും തമ്മിൽ വളരെ അടുത്ത ബന്ധമാണുള്ളത്. എനിക്ക് ആ ഊർജ്ജം ഫീൽ ചെയ്യുന്നുണ്ട്—നമ്മൾ ഉടൻ വീണ്ടും കാണും.”
സിംബാബ്വെക്കെതിരായ മത്സരത്തിൽ സഞ്ജുവിന്റെ പേര് അനൗൺസ് ചെയ്തപ്പോൾ സ്റ്റേഡിയത്തിലുണ്ടായ ആരവം അദ്ദേഹം ചെന്നൈയുടെ പ്രിയപുത്രനായി മാറിക്കഴിഞ്ഞു എന്നതിന്റെ തെളിവാണ്. സിംബാബ്വെക്കെതിരെ 15 പന്തിൽ 24 റൺസെടുത്ത് ഇന്ത്യക്ക് തകർപ്പൻ തുടക്കം നൽകിയ സഞ്ജുവിന്റെ അടുത്ത വെല്ലുവിളി വെസ്റ്റ് ഇൻഡീസാണ്. ഞായറാഴ്ച കൊൽക്കത്തയിലെ ഈഡൻ ഗാർഡൻസിലാണ് ഈ നിർണ്ണായക മത്സരം.
ഈ മത്സരത്തിൽ വിജയിക്കുന്ന ടീമിന് മാത്രമേ സെമി ഫൈനൽ ടിക്കറ്റ് ലഭിക്കൂ. പവർപ്ലേയിൽ സ്പിന്നർമാരെയും പേസർമാരെയും ഒരുപോലെ നേരിടാനുള്ള സഞ്ജുവിന്റെ കരുത്ത് ഇന്ത്യക്ക് വലിയ മുതൽക്കൂട്ടാണ്. വിൻഡീസിനെതിരെ ഒരു വമ്പൻ ഇന്നിംഗ്സ് സഞ്ജുവിൽ നിന്നും ആരാധകർ പ്രതീക്ഷിക്കുന്നു.
