ഇന്ത്യയുടെ സെമി ഫൈനൽ പ്രവേശം ഉറപ്പാക്കിയ ഇന്നിംഗ്സിന് ശേഷം തന്റെ വികാരനിർഭരമായ ആഘോഷത്തെക്കുറിച്ച് പ്രതികരിക്കുകയായിരുന്നു സഞ്ജു സാംസൺ. വിജയറൺ നേടിയ ശേഷം മുട്ടുകുത്തിനിന്ന് ആകാശത്തേക്ക് നോക്കി കൈകൾ ഉയർത്തിയ സഞ്ജുവിന്റെ ചിത്രം സോഷ്യൽ മീഡിയയിൽ തരംഗമായിരുന്നു. ജിയോ ഹോട്ട്സ്റ്റാറിൽ പാർത്ഥിവ് പട്ടേലിന് നൽകിയ അഭിമുഖത്തിലാണ് സഞ്ജു തന്റെ മനസ്സ് തുറന്നത്.
തന്റെ ആഘോഷം വളരെ വ്യക്തിപരമായ ഒന്നാണെന്നും അതിന് പിന്നിലെ രഹസ്യം വെളിപ്പെടുത്താൻ ആഗ്രഹിക്കുന്നില്ലെന്നും സഞ്ജു പറഞ്ഞു. “വളരെ പ്രത്യേകതയുള്ള നിമിഷമാണത്. ഞാൻ വലിയൊരു ദൈവവിശ്വാസിയാണ്. ആ നിമിഷത്തെ വളരെ സ്വകാര്യമായി സൂക്ഷിക്കാൻ ഞാൻ ആഗ്രഹിക്കുന്നു,” സഞ്ജു വ്യക്തമാക്കി. ഒരു സെഞ്ചുറി നേടുന്നതിനേക്കാൾ വലുതാണ് രാജ്യത്തിന് വേണ്ടി ഇത്തരമൊരു നിർണ്ണായക മത്സരം വിജയിപ്പിക്കുക എന്നത്.
“ഇന്ത്യയിലെ ഓരോ ക്രിക്കറ്ററും സ്വപ്നം കാണുന്നൊരു ദിവസമാണിത്. കേരളത്തിൽ നിന്നുള്ള ഒരു സാധാരണ പയ്യൻ, രാജ്യത്തിന് വേണ്ടി ഇത്രയും നിർണ്ണായകമായൊരു കളി ജയിപ്പിക്കുക എന്നത് വലിയ കാര്യമാണ്. ഞാനത് സ്വപ്നം കണ്ടു, ഇന്ന് അത് യാഥാർത്ഥ്യമായി,” സഞ്ജു പറഞ്ഞു. സാധാരണ ഗതിയിൽ മികച്ച തുടക്കം ലഭിച്ചാൽ ആക്രമിച്ച് കളിച്ച് കളി വേഗത്തിൽ തീർക്കാനാണ് താൻ ശ്രമിക്കാറുള്ളതെന്ന് സഞ്ജു പറഞ്ഞു. എന്നാൽ വിക്കറ്റുകൾ തുടർച്ചയായി വീണതോടെ തന്റെ ശൈലി മാറ്റാൻ നിർബന്ധിതനായി. “ഇന്ന് എനിക്ക് കളി തീർക്കേണ്ടതുണ്ടായിരുന്നു. അവസാന ഓവർ വരെ ക്രീസിൽ നിൽക്കുക എന്നതായിരുന്നു എന്റെ ലക്ഷ്യം. എന്റെ അനുഭവസമ്പത്തും ടീമിലെ റോളും ഇന്ന് കൃത്യമായി പാലിക്കാൻ കഴിഞ്ഞു,” അദ്ദേഹം കൂട്ടിച്ചേർത്തു.
മോശം ഫോമിലൂടെ കടന്നുപോയപ്പോൾ സ്വയം തിരുത്താനായി സോഷ്യൽ മീഡിയയിൽ നിന്നും ഫോണിൽ നിന്നും വിട്ടുനിന്നതായി സഞ്ജു വെളിപ്പെടുത്തി. “ഞാൻ ഫോണും സോഷ്യൽ മീഡിയയും ഓഫ് ചെയ്തു വെച്ചു. എനിക്ക് എന്നെത്തന്നെ കേൾക്കണമായിരുന്നു. എന്റെ അടിസ്ഥാന കാര്യങ്ങളിലേക്ക് ഞാൻ മടങ്ങിപ്പോയി. ഇന്ന് ലഭിച്ച ഈ സന്തോഷത്തിൽ ഞാൻ അതീവ തൃപ്തനാണ്,” സഞ്ജു പറഞ്ഞു.
