ലോകത്തെ മുൾമുനയിൽ നിർത്തി പശ്ചിമേഷ്യൻ സംഘർഷം അതിരൂക്ഷമാകുന്നു. അമേരിക്കൻ പ്രസിഡന്റ് ഡൊണാൾഡ് ട്രംപിന്റെയും ഇസ്രായേൽ നേതാക്കളുടെയും രക്തം ചിന്തണമെന്ന് പരസ്യമായി ആഹ്വാനം ചെയ്ത് ഇറാന്റെ മുതിർന്ന പുരോഹിതൻ ആയത്തുള്ള അമോലി ലാരിജാനി രംഗത്തെത്തി. ഇറാന്റെ ഔദ്യോഗിക ചാനലിലൂടെയാണ് ട്രംപിനെതിരെ കൊലവിളി മുഴക്കിയത്. ഇറാന്റെ പരമോന്നത നേതാവ് ആയത്തുള്ള അലി ഖമേനിയുടെ വധത്തിന് പകരമായി ‘ചോരയ്ക്ക് ചോര’ എന്ന നിലപാടിലാണ് ഇറാൻ ഭരണകൂടമെന്ന് ഈ പ്രസ്താവന വ്യക്തമാക്കുന്നു. ഇതോടെ അമേരിക്കയും ഇറാനും നേരിട്ടുള്ള ഒരു മഹായുദ്ധത്തിലേക്ക് നീങ്ങുകയാണെന്ന സൂചനയാണ് പുറത്തുവരുന്നത്.
ട്രംപിനെ വധിക്കാതെ തങ്ങളുടെ പോരാട്ടം അവസാനിക്കില്ലെന്നും ഇസ്ലാമിക വിപ്ലവത്തിന്റെ ശത്രുക്കളെ ലോകത്തിന്റെ ഏത് കോണിലായാലും വേട്ടയാടുമെന്നും ലാരിജാനി മുന്നറിയിപ്പ് നൽകി. ഇതിനിടെ, ഇറാന്റെ ഭീഷണിയെ പുച്ഛിച്ചുതള്ളിയ വൈറ്റ് ഹൗസ്, ഏത് തരത്തിലുള്ള ആക്രമണത്തെയും നേരിടാൻ അമേരിക്കൻ സൈന്യം സജ്ജമാണെന്ന് വ്യക്തമാക്കിയിട്ടുണ്ട്. ഇറാന്റെ പുതിയ നേതാവ് മൊജ്തബ ഖമേനിയുടെ കീഴിൽ രാജ്യം കൂടുതൽ മൗലികവാദത്തിലേക്കും അക്രമത്തിലേക്കും നീങ്ങുകയാണെന്ന് ഈ ആഹ്വാനം അടിവരയിടുന്നു.
അമേരിക്കൻ പ്രസിഡന്റിനെ നേരിട്ട് ലക്ഷ്യം വെച്ചുള്ള ഇറാന്റെ നീക്കം പശ്ചിമേഷ്യയിലെ ശക്തിസന്തുലിതാവസ്ഥയെ പൂർണ്ണമായും തകർക്കും. ഇസ്രായേൽ ഇതിനോടകം തന്നെ ഇറാന്റെ തന്ത്രപ്രധാന കേന്ദ്രങ്ങളിൽ ആക്രമണം കടുപ്പിച്ചിട്ടുണ്ട്. ലോകത്തെ ഒന്നടങ്കം ഭീതിയിലാഴ്ത്തുന്ന ഇറാന്റെ ഈ കൊലവിളി ഐക്യരാഷ്ട്രസഭയിലും വലിയ ചർച്ചയാകും. ഭീകരവാദത്തെ പ്രോത്സാഹിപ്പിക്കുന്ന നിലപാടുകളിൽ നിന്ന് ഇറാൻ പിന്തിരിയണമെന്നും അല്ലാത്തപക്ഷം രാജ്യം ഭൂപടത്തിൽ നിന്ന് തന്നെ അപ്രത്യക്ഷമായേക്കാമെന്നുമാണ് പാശ്ചാത്യ രാജ്യങ്ങളുടെ മുന്നറിയിപ്പ്.
