നാല് പതിറ്റാണ്ടിലേറെയായി ചിരിയുടെ മാലപ്പടക്കം തീർത്ത സംവിധായകൻ പ്രിയദർശൻ കോമഡി സിനിമകളിൽ നിന്ന് പിൻവാങ്ങുന്നു. തനിക്ക് കോമഡി സിനിമകൾ ചെയ്യാൻ ഇപ്പോൾ ഭയമാണെന്നും പുതിയ ആശയങ്ങൾ തന്റെ പക്കൽ അവശേഷിക്കുന്നില്ലെന്നും അദ്ദേഹം തുറന്നു പറഞ്ഞു. ‘പിങ്ക് വില്ല’യ്ക്ക് നൽകിയ അഭിമുഖത്തിലാണ് അദ്ദേഹം തന്റെ മനസ്സ് തുറന്നത്.
“സത്യം പറഞ്ഞാൽ എനിക്കിപ്പോൾ ഗൗരവമേറിയ സിനിമകൾ ചെയ്യാനാണ് താൽപ്പര്യം. കോമഡി സിനിമകൾ ചെയ്യാൻ എനിക്ക് ഇപ്പോൾ താൽപ്പര്യമില്ല, പലപ്പോഴും അതിനായി നിർബന്ധിക്കപ്പെടുകയാണ്. എന്റെ പക്കലുള്ള പുതിയ ഐഡിയകളെല്ലാം തീർന്നുപോയി എന്ന് ഞാൻ കരുതുന്നു. പഴയ കാര്യങ്ങൾ തന്നെ വീണ്ടും ആവർത്തിക്കാൻ എനിക്ക് ആഗ്രഹമില്ല. ഇനി ഒരു കോമഡി ചിത്രം കൂടി ചെയ്തേക്കാം, അതോടെ ആ അധ്യായം അവസാനിക്കും,” പ്രിയദർശൻ പറഞ്ഞു.
തിയേറ്ററുകളിൽ പരാജയപ്പെട്ട ‘ധോൾ’ (Dhol), ‘ഖട്ട മീഠ’ (Khatta Meetha) തുടങ്ങിയ ചിത്രങ്ങൾ ഇപ്പോൾ ഒടിടി പ്ലാറ്റ്ഫോമുകളിൽ വൻ സ്വീകാര്യത നേടുന്നതിൽ അദ്ദേഹം സന്തോഷം പ്രകടിപ്പിച്ചു. ഇന്ത്യൻ ക്രിക്കറ്റ് താരം വിരാട് കോലി ഉൾപ്പെടെയുള്ളവർ തന്റെ സിനിമകളുടെ ആരാധകരാണെന്ന് പ്രിയദർശൻ വെളിപ്പെടുത്തി. “മത്സരങ്ങൾക്ക് മുൻപ് റിലാക്സ് ചെയ്യാൻ കോലി ‘ധോൾ’ കാണാറുണ്ടെന്നും അതിലെ ഡയലോഗുകൾ സുഹൃത്തുക്കൾക്കിടയിൽ പറയാറുണ്ടെന്നും അറിയുന്നതിൽ വലിയ സന്തോഷമുണ്ട്,” അദ്ദേഹം കൂട്ടിച്ചേർത്തു. ഐപിഎൽ പരസ്യചിത്രങ്ങൾക്കിടയിൽ താരത്തിന്റെ അഭിനയമികവ് കണ്ട പ്രിയദർശൻ, താരം ഭാവിയിൽ അഭിനയത്തിൽ ഒരു കൈ നോക്കണമെന്ന് നേരത്തെ നിർദ്ദേശിച്ചിരുന്നു.
അക്ഷയ് കുമാർ, പരേഷ് റാവൽ, രാജ്പാൽ യാദവ് തുടങ്ങിയ സ്ഥിരം അഭിനേതാക്കളെ തന്റെ സിനിമകളിൽ ഉൾപ്പെടുത്തുന്നതിന്റെ കാരണവും അദ്ദേഹം വിശദീകരിച്ചു. ഹാസ്യം കൈകാര്യം ചെയ്യാൻ കൃത്യമായ ‘ടൈമിംഗ്’ ആവശ്യമാണ്. അത് മനസ്സിലാക്കുന്ന നടന്മാർക്കൊപ്പം പ്രവർത്തിക്കാനാണ് തനിക്ക് എളുപ്പമെന്നും അദ്ദേഹം പറഞ്ഞു. ഗോവിന്ദ, ഷാരൂഖ് ഖാൻ എന്നിവർക്കും മികച്ച ടൈമിംഗ് ഉണ്ടെന്ന് അദ്ദേഹം അഭിപ്രായപ്പെട്ടു. അക്ഷയ് ഖന്നയെ ഒരു മികച്ച നടനെന്ന് വിശേഷിപ്പിച്ച അദ്ദേഹം, ഹൽചുൽ, ഹംഗാമ തുടങ്ങിയ ചിത്രങ്ങളിൽ താരം നടത്തിയ പ്രകടനത്തെ പ്രശംസിച്ചു.
