രവീന്ദ്ര ജഡേജയുടെ ഒരു ‘ക്രിപ്റ്റിക്’ കമന്റ് ഇപ്പോൾ ക്രിക്കറ്റ് ലോകത്ത് ചർച്ചയാകുകയാണ്. അജിത് അഗാർക്കർ ബിസിസിഐയുടെ സീനിയർ പുരുഷ സെലക്ഷൻ കമ്മിറ്റി ചെയർമാൻ സ്ഥാനമൊഴിഞ്ഞതിന് പിന്നാലെയാണ് ജഡേജയുടെ കൗതുകമുണർത്തുന്ന പ്രതികരണം.
ഒക്ടോബർ 4നാണ് അഗാർക്കറുടെ സെലക്ഷൻ കമ്മിറ്റി ചെയർമാൻ എന്ന നിലയിലെ കാലാവധി ഔദ്യോഗികമായി അവസാനിച്ചത്. 2023 ജൂലൈയിൽ ചുമതലയേറ്റ അഗാർക്കർ തുടർനിയമനത്തിന് താൽപര്യം പ്രകടിപ്പിച്ചിരുന്നില്ല. അദ്ദേഹത്തിന്റെ കാലയളവിൽ ഇന്ത്യ മൂന്ന് ഐസിസി കിരീടങ്ങളാണ് സ്വന്തമാക്കിയത്. 2024ലെ ടി20 ലോകകപ്പ്, 2025ലെ ചാമ്പ്യൻസ് ട്രോഫി, 2026ലെ ടി20 ലോകകപ്പ് എന്നിവ ഇന്ത്യയുടെ നേട്ടങ്ങളിൽ ഉൾപ്പെടുന്നു.
സെലക്ഷൻ കമ്മിറ്റിയിൽ ഒഴിവ് വന്നതായി ബിസിസിഐ ചൊവ്വാഴ്ച പ്രഖ്യാപിച്ചതിന് പിന്നാലെ ബുധനാഴ്ച ജഡേജ സോഷ്യൽ മീഡിയയിൽ കുറിച്ചത് “എന്താണ് നടപടിക്രമം??” എന്നായിരുന്നു. ഒപ്പം ചിരിക്കുന്ന ഇമോജിയും ചേർത്തിരുന്നു. സെലക്ടർ സ്ഥാനത്തേക്കുള്ള നടപടിക്രമത്തെക്കുറിച്ചുള്ള തമാശയായുള്ള പ്രതികരണമായാണ് ജഡേജയുടെ കമന്റ് വിലയിരുത്തപ്പെടുന്നത്. അതേസമയം, വെസ്റ്റ് ഇൻഡീസിനെതിരായ മൂന്ന് മത്സര ഏകദിന പരമ്പരയിലൂടെയാണ് ജഡേജ വീണ്ടും ഏകദിന ടീമിൽ തിരിച്ചെത്തിയത്. അഫ്ഗാനിസ്ഥാനെതിരായ ഹോം ഏകദിന പരമ്പരയിലും ഈ വർഷം ഇംഗ്ലണ്ടിൽ നടന്ന ഏകദിന പരമ്പരയിലും അദ്ദേഹം കളിച്ചിരുന്നില്ല. വെസ്റ്റ് ഇൻഡീസിനെതിരായ ആദ്യ രണ്ട് മത്സരങ്ങളിൽ യഥാക്രമം 2/75, 0/54 എന്നിങ്ങനെയായിരുന്നു ജഡേജയുടെ ബൗളിംഗ് പ്രകടനം.
2025 മുതൽ കളിച്ച അവസാന 15 ഏകദിനങ്ങളിൽ 10 ഇന്നിങ്സുകളിൽ ബാറ്റ് ചെയ്ത ജഡേജ 29.80 ശരാശരിയിൽ 149 റൺസാണ് നേടിയത്. 32 റൺസാണ് ഉയർന്ന സ്കോർ. സ്ട്രൈക്ക് റേറ്റ് 95. ബൗളിംഗിലും നേരിയ ഇടിവാണ് കാണുന്നത്. 15 മത്സരങ്ങളിൽ 14 വിക്കറ്റ് മാത്രമാണ് നേടിയത്. 47.93 ആണ് ബൗളിംഗ് ശരാശരി. മികച്ച പ്രകടനം 3/26. ഈ വർഷം അഞ്ച് മത്സരങ്ങളിൽ നിന്ന് രണ്ട് വിക്കറ്റ് മാത്രമാണ് ജഡേജ നേടിയത്. മൂന്ന് ഇന്നിങ്സുകളിൽ 43 റൺസും നേടി. 27 റൺസാണ് മികച്ച സ്കോർ.
എന്നാൽ ടെസ്റ്റ് ക്രിക്കറ്റിൽ ജഡേജ ഇപ്പോഴും ഇന്ത്യയുടെ പ്രധാന താരങ്ങളിലൊരാളാണ്. ശ്രീലങ്കയ്ക്കെതിരായ രണ്ട് ടെസ്റ്റുകളിൽ മൂന്ന് ഇന്നിങ്സുകളിൽ നിന്ന് 65 റൺസ് നേടിയ ജഡേജയുടെ മികച്ച സ്കോർ 43 ആയിരുന്നു. ബൗളിംഗിൽ എട്ട് വിക്കറ്റും സ്വന്തമാക്കി. 33.57 ആയിരുന്നു ശരാശരി, മികച്ച ബൗളിംഗ് പ്രകടനം 3/57 . നവംബർ 22ന് ആരംഭിക്കുന്ന ന്യൂസിലൻഡിനെതിരായ അഞ്ച് മത്സര ഏകദിന പരമ്പരയിലും അതിന് പിന്നാലെയുള്ള രണ്ട് ടെസ്റ്റുകളിലും ജഡേജ ഉണ്ടാകുമോ എന്ന കാര്യത്തിൽ ഇപ്പോഴും വ്യക്തതയില്ല. ഇരു പരമ്പരകൾക്കുമുള്ള ഇന്ത്യൻ ടീമിനെ ഇതുവരെ പ്രഖ്യാപിച്ചിട്ടില്ല.
