കേരളം നിയമസഭാ തിരഞ്ഞെടുപ്പിലേക്ക് (2026 ഏപ്രിൽ 9) കടക്കുന്ന പശ്ചാത്തലത്തിൽ, എന്താണ് മാതൃകാ പെരുമാറ്റച്ചട്ടം എന്ന് അറിയാം? തിരഞ്ഞെടുപ്പ് കമ്മീഷൻ തിരഞ്ഞെടുപ്പ് തീയതികൾ പ്രഖ്യാപിക്കുന്ന നിമിഷം മുതൽ വോട്ടെണ്ണൽ പൂർത്തിയാകുന്നത് വരെ രാഷ്ട്രീയ പാർട്ടികളും സ്ഥാനാർത്ഥികളും വോട്ടർമാരും പാലിക്കേണ്ട കർശനമായ മാർഗ്ഗനിർദ്ദേശങ്ങളാണ് മാതൃകാ പെരുമാറ്റച്ചട്ടം.
സ്വതന്ത്രവും നിഷ്പക്ഷവുമായ തിരഞ്ഞെടുപ്പ് ഉറപ്പാക്കുക എന്ന ലക്ഷ്യത്തോടെ നടപ്പിലാക്കുന്ന ഈ ചട്ടം നിലവിൽ വരുന്നതോടെ സർക്കാരിന് പുതിയ വികസന പദ്ധതികളോ സാമ്പത്തിക സഹായങ്ങളോ പ്രഖ്യാപിക്കാനോ തറക്കല്ലിടൽ ചടങ്ങുകൾ നടത്താനോ അധികാരമുണ്ടായിരിക്കില്ല. ഭരണകക്ഷികൾ തങ്ങളുടെ ഔദ്യോഗിക പദവി തിരഞ്ഞെടുപ്പ് പ്രചാരണത്തിനായി ദുരുപയോഗം ചെയ്യുന്നില്ലെന്ന് ഉറപ്പാക്കാൻ സർക്കാർ വാഹനങ്ങൾ, ഉദ്യോഗസ്ഥർ, സർക്കാർ ഗസ്റ്റ് ഹൗസുകൾ എന്നിവയുടെ ഉപയോഗത്തിന് കർശന നിയന്ത്രണങ്ങൾ ഏർപ്പെടുത്തും. ജാതിയുടെയോ മതത്തിന്റെയോ പേരിൽ വോട്ട് ചോദിക്കുന്നതും ആരാധനാലയങ്ങൾ പ്രചാരണ വേദികളാക്കുന്നതും ഇതിലൂടെ നിരോധിച്ചിരിക്കുന്നു.
പ്രചാരണ പരിപാടികൾ നടത്തുമ്പോൾ രാഷ്ട്രീയ പാർട്ടികൾ പോലീസിന്റെയും ബന്ധപ്പെട്ട അധികാരികളുടെയും മുൻകൂർ അനുമതി വാങ്ങിയിരിക്കണം. വ്യക്തിഹത്യ നടത്തുന്ന പ്രസംഗങ്ങൾ ഒഴിവാക്കാനും മറ്റുള്ളവരുടെ സ്വകാര്യ ജീവിതത്തെ ബാധിക്കുന്ന തരത്തിലുള്ള വിമർശനങ്ങൾ പാടില്ലെന്നും ചട്ടം നിഷ്കർഷിക്കുന്നു. വോട്ടർമാരെ സ്വാധീനിക്കാൻ പണമോ മദ്യമോ മറ്റ് സമ്മാനങ്ങളോ നൽകുന്നത് കടുത്ത ശിക്ഷാർഹമായ കുറ്റമാണ്.
രാത്രി പത്ത് മണി മുതൽ രാവിലെ ആറ് മണി വരെ ഉച്ചഭാഷിണികൾ ഉപയോഗിക്കുന്നതിനും പൊതുയോഗങ്ങൾ നടത്തുന്നതിനും വിലക്കുണ്ട്. കൂടാതെ, രേഖകളില്ലാതെ വലിയ തുക കൈമാറുന്നതും പരിശോധനയ്ക്ക് വിധേയമാകും. പെരുമാറ്റച്ചട്ട ലംഘനം ശ്രദ്ധയിൽപ്പെട്ടാൽ സി-വിജിൽ ആപ്പ് വഴിയോ തിരഞ്ഞെടുപ്പ് ഉദ്യോഗസ്ഥർക്കോ പരാതി നൽകാം. ഇത്തരം നിയമലംഘനങ്ങൾ തെളിയിക്കപ്പെട്ടാൽ സ്ഥാനാർത്ഥിയെ അയോഗ്യനാക്കാനോ നിയമനടപടികൾ സ്വീകരിക്കാനോ തിരഞ്ഞെടുപ്പ് കമ്മീഷന് അധികാരമുണ്ട്.
