“രാഷ്ട്രീയത്തിൽ ഒരിക്കലും പൂർണ്ണവിരാമങ്ങളില്ല” എന്ന് ഓർമ്മിപ്പിച്ചുകൊണ്ട് രാജ്യസഭയിൽ നിന്ന് വിരമിക്കുന്ന അംഗങ്ങൾക്ക് വികാരാധീനമായ യാത്രയയപ്പ് നൽകി പ്രധാനമന്ത്രി നരേന്ദ്ര മോദി. സഭയുടെ കാലാവധി പൂർത്തിയാക്കി പടിയിറങ്ങുന്ന ജനപ്രതിനിധികളെ അഭിസംബോധന ചെയ്യവേയാണ് രാഷ്ട്രീയ ജീവിതം തുടർച്ചയായ പ്രക്രിയയാണെന്നും സഭയ്ക്ക് പുറത്തും പൊതുസേവനം തുടരാനാകുമെന്നും പ്രധാനമന്ത്രി വ്യക്തമാക്കിയത്. പാർട്ടി രാഷ്ട്രീയത്തിന് അതീതമായ ബഹുമാനവും ആദരവുമാണ് ഇത്തരം സന്ദർഭങ്ങളിൽ സഭയിൽ ദൃശ്യമാകുന്നതെന്ന് അദ്ദേഹം പറഞ്ഞു. ഓരോ അംഗവും സഭയുടെ ചർച്ചകളിൽ നൽകുന്ന സവിശേഷമായ സംഭാവനകളെ അദ്ദേഹം പ്രസംഗത്തിൽ എടുത്തുപറഞ്ഞു.
വിരമിക്കുന്ന അംഗങ്ങളിൽ പ്രമുഖനായ കേന്ദ്രമന്ത്രി രാംദാസ് അത്താവാലെയെക്കുറിച്ചുള്ള പ്രധാനമന്ത്രിയുടെ വാക്കുകൾ സഭയിൽ ചിരിപടർത്തി. സഭയിലെ തമാശകളും ഹാസ്യരസമുള്ള സംഭാഷണങ്ങളും കാലക്രമേണ കുറഞ്ഞു വരികയാണെന്ന് നിരീക്ഷിച്ച മോദി, അത്താവാലെയെ ‘എവർഗ്രീൻ’ എന്നാണ് വിശേഷിപ്പിച്ചത്. “അത്താവാലെ ജി സഭ വിട്ടുപോകുകയാണ്, പക്ഷേ ഇവിടെ ആർക്കും അദ്ദേഹത്തിന്റെ കുറവ് അനുഭവപ്പെടില്ല. സഭയ്ക്ക് പുറത്തും അദ്ദേഹം തന്റെ ഹാസ്യവും പരിഹാസവും സമൃദ്ധമായി വിളമ്പുമെന്ന് എനിക്ക് പൂർണ്ണ വിശ്വാസമുണ്ട്,” പ്രധാനമന്ത്രി പറഞ്ഞു. അത്താവാലെയുടെ സാന്നിധ്യം സഭയിലെ പിരിമുറുക്കം കുറയ്ക്കാൻ എന്നും സഹായിച്ചിരുന്നതായും അദ്ദേഹം കൂട്ടിച്ചേർത്തു.
സഭയിലെ ചർച്ചകളിൽ ഓരോ അംഗവും വഹിക്കുന്ന പങ്കിനെ പ്രധാനമന്ത്രി അഭിനന്ദിച്ചു. വിവിധ വിഷയങ്ങളിൽ ഭിന്നാഭിപ്രായങ്ങൾ ഉണ്ടാകാമെങ്കിലും വിരമിക്കൽ വേളയിൽ എല്ലാവരും ഒരേ വികാരത്തോടെയാണ് ഒത്തുചേരുന്നത്. സഭയുടെ അന്തസ്സ് ഉയർത്തിപ്പിടിച്ച എല്ലാവർക്കും അദ്ദേഹം നന്ദി അറിയിച്ചു. വിരമിക്കുന്ന അംഗങ്ങളുടെ അനുഭവസമ്പത്ത് വരും കാലങ്ങളിൽ രാജ്യത്തിന് മുതൽക്കൂട്ടാകുമെന്നും സഭയിൽ നിന്ന് വിരമിക്കുന്നത് ഒരു പുതിയ തുടക്കമാണെന്നും മോദി ഓർമ്മിപ്പിച്ചു. രാജ്യസഭയിൽ നടന്ന യാത്രയയപ്പ് ചടങ്ങിൽ ഭരണ-പ്രതിപക്ഷ ഭേദമന്യേ നിരവധി പ്രമുഖർ പങ്കെടുത്തു
