ന്യൂയോർക്ക് : അമേരിക്കയിലെ തിരക്കേറിയ വിമാനത്താവളങ്ങളിൽ ഒന്നായ ന്യൂയോർക്കിലെ ലാഗ്വാർഡിയയിൽ വിമാനവും അഗ്നിശമന സേനാ വാഹനവും തമ്മിൽ കൂട്ടിയിടിച്ച് വൻ അപകടം. തിങ്കളാഴ്ച രാവിലെയാണ് സംഭവം. മോൺട്രിയലിൽ നിന്നും എത്തിയ എയർ കാനഡ എക്സ്പ്രസ് വിമാനമാണ് റൺവേയിൽ വെച്ച് ഫയർ ട്രക്കുമായി കൂട്ടിയിടിച്ചത്.
അപകടത്തിൽ നിരവധി യാത്രക്കാർക്കും അഞ്ച് അഗ്നിശമന സേനാ ഉദ്യോഗസ്ഥർക്കും പരിക്കേറ്റതായി പ്രാഥമിക റിപ്പോർട്ടുകൾ സൂചിപ്പിക്കുന്നു. ചിലരുടെ പരിക്ക് ഗുരുതരമാണ്. ഫ്ലൈറ്റ് ട്രാക്കിംഗ് ഡാറ്റ പ്രകാരം AC8646 എന്ന എയർ കാനഡ എക്സ്പ്രസ് വിമാനമാണ് അപകടത്തിൽപ്പെട്ടത്. ലാൻഡിംഗിന് ശേഷം ടാക്സിവേയിലൂടെ നീങ്ങുന്നതിനിടെ റൺവേ 4-ന് സമീപം വെച്ച് വിമാനം വിമാനത്താവളത്തിലെ ഫയർ ട്രക്കുമായി ഇടിക്കുകയായിരുന്നു. വിമാനത്തിന്റെ മുൻഭാഗത്തിന് സാരമായ കേടുപാടുകൾ സംഭവിച്ചിട്ടുണ്ട്.
അപകടത്തിന് തൊട്ടുപിന്നാലെ വിമാനത്തിലുണ്ടായിരുന്ന നൂറിലധികം യാത്രക്കാരെ എമർജൻസി എക്സിറ്റ് വഴി റൺവേയിലേക്ക് ഒഴിപ്പിച്ചു. അപകടത്തെത്തുടർന്ന് ഫെഡറൽ ഏവിയേഷൻ അഡ്മിനിസ്ട്രേഷൻ വിമാനത്താവളത്തിൽ പൂർണ്ണമായ ഗ്രൗണ്ട് സ്റ്റോപ്പ് പ്രഖ്യാപിച്ചു.ലാഗ്വാർഡിയയിലേക്കുള്ള എല്ലാ വിമാനങ്ങളും താൽക്കാലികമായി റദ്ദാക്കുകയോ വഴിതിരിച്ചുവിടുകയോ ചെയ്തു.
