മറ്റ് ടീമുകളിൽ നിന്ന് നിങ്ങൾക്ക് ഇഷ്ടമുള്ള ഒരു യുവ ഇന്ത്യൻ താരത്തെ തിരഞ്ഞെടുക്കാൻ പറഞ്ഞാൽ ആരെ തിരഞ്ഞെടുക്കും? സ്റ്റാർ സ്പോർട്സിന്റെ ഈ ചോദ്യത്തിന് ഇന്ത്യൻ ക്രിക്കറ്റിലെ പ്രമുഖ താരങ്ങൾക്ക് നൽകാൻ ഒരേയൊരു പേരേ ഉണ്ടായിരുന്നുള്ളൂ— വൈഭവ് സൂര്യവംശി. തന്റെ ടീമിലേക്ക് ഏത് യുവതാരത്തെ വേണമെന്ന് ചോദിച്ചപ്പോൾ ശുഭ്മാൻ ഗിൽ ഒട്ടും ആലോചിക്കാതെ പറഞ്ഞത് രാജസ്ഥാൻ റോയൽസിന്റെ വൈഭവ് സൂര്യവംശിയുടെ പേരാണ്. വൈഭവിന്റെ ബാറ്റിംഗ് ശൈലിയും ആത്മവിശ്വാസവുമാണ് ഗില്ലിനെ ആകർഷിച്ചത്.
യുവതാരങ്ങളെ പ്രോത്സാഹിപ്പിക്കുന്നതിൽ മുന്നിലുള്ള ഇഷാൻ കിഷനും വൈഭവിനെയാണ് തിരഞ്ഞെടുത്തത്. വെറും 15 വയസ്സുകാരൻ കാണിക്കുന്ന അസാമാന്യ പക്വതയും വെടിക്കെട്ട് ബാറ്റിംഗും ഇഷാനെ അമ്പരപ്പിച്ചു. കഴിഞ്ഞ മത്സരത്തിൽ വൈഭവിന്റെ ബാറ്റിംഗ് ചൂട് നേരിട്ട് അറിഞ്ഞ പാട്ടിദാറും മറ്റാരെയും തിരഞ്ഞെടുത്തില്ല. തന്റെ ടീമിനെതിരെ 26 പന്തിൽ 78 റൺസ് അടിച്ചുകൂട്ടിയ വൈഭവിനെ തന്റെ ടീമിലെത്തിക്കാൻ പാട്ടിദാറിനും വലിയ ആഗ്രഹമുണ്ട്.
ഐപിഎൽ 2026-ൽ രാജസ്ഥാൻ റോയൽസിനായി കളിക്കുന്ന വൈഭവ് സൂര്യവംശി ഇതിനോടകം തന്നെ ഓറഞ്ച് ക്യാപ്പ് സ്വന്തമാക്കി കഴിഞ്ഞു. ജസ്പ്രീത് ബുംറ, ജോഷ് ഹേസൽവുഡ് തുടങ്ങിയ ഇതിഹാസ ബൗളർമാരെ ഒരു ഭയവുമില്ലാതെ നേരിടുന്ന വൈഭവ് ഇന്ത്യൻ ക്രിക്കറ്റിലെ അടുത്ത സൂപ്പർസ്റ്റാർ ആണെന്ന് ഉറപ്പിക്കുകയാണ് ഈ താരങ്ങളുടെ വാക്കുകൾ.
ഇന്നലത്തെ മത്സരശേഷം തന്റെ ബാറ്റിംഗ് രഹസ്യത്തെക്കുറിച്ച് വൈഭവ് പറഞ്ഞ വാക്കുകൾ ക്രിക്കറ്റ് ലോകം ഏറ്റെടുത്തു കഴിഞ്ഞു. “ഞാൻ പന്തിനെയാണ് നോക്കുന്നത്, ബൗളറെയല്ല. എതിരാളി ബുംറയാണോ ഹേസൽവുഡ് ആണോ എന്നത് മനസ്സിന്റെ ഒരു മൂലയിലുണ്ടാകും, പക്ഷേ പന്തിന്റെ മെറിറ്റ് അനുസരിച്ച് കളിക്കാനാണ് ഞാൻ ശ്രമിക്കുന്നത്,” വൈഭവ് പറഞ്ഞു. ഹേസൽവുഡിന്റെ നാല് പന്തുകളിൽ തുടർച്ചയായി മൂന്ന് ഫോറും ഒരു സിക്സറും പറത്തിയാണ് ഈ കൗമാരതാരം തന്റെ കരുത്ത് കാട്ടിയത്.
