ന്യൂസീലൻഡിനെതിരായ രണ്ടാം ട്വന്റി-20 മത്സരത്തിലെ വിജയത്തിനു പിന്നാലെ ഇന്ത്യൻ ഓപ്പണർ സഞ്ജു സാംസണും പരിശീലകൻ ഗൗതം ഗംഭീറും തമ്മിൽ ഗ്രൗണ്ടിൽ വെച്ച് നടന്ന ദീർഘനേരത്തെ ഗൗരവകരമായ ചർച്ച തരംഗമാകുന്നു. മത്സരം ഇന്ത്യ വിജയിച്ചെങ്കിലും ഏറെ ഗൗരവം വിടാതെ സഞ്ജുവിനോട് കാര്യങ്ങൾ വിശദീകരിക്കുന്ന ഗംഭീറിന്റെയും അത് ശ്രദ്ധയോടെ കേൾക്കുന്ന സഞ്ജുവിന്റെയും ദൃശ്യങ്ങൾ സമൂഹമാധ്യമങ്ങളിൽ വൻതോതിൽ പ്രചരിക്കുകയാണ്. വിജയത്തിനിടയിലും ഇരുവരും തമ്മിൽ എന്താണ് ഇത്രയും ഗൗരവത്തിൽ സംസാരിച്ചതെന്ന ആകാംക്ഷയിലാണ് ക്രിക്കറ്റ് ആരാധകർ.
ക്രൈസ്റ്റ്ചർച്ചിൽ നടന്ന മത്സരത്തിൽ പതിവു ഫോമിലേക്ക് ഉയരാൻ സഞ്ജുവിന് സാധിച്ചിരുന്നില്ല. 17 പന്തിൽ ഒരു സിക്സും ഫോറും ഉൾപ്പെടെ 14 റൺസ് മാത്രമാണ് താരം നേടിയത്. മാറ്റ് ഹെൻറിയെറിഞ്ഞ ഇന്നിങ്സിലെ ആദ്യ ഓവറിലെ മുഴുവൻ പന്തുകളും പാഴാക്കിയ സഞ്ജു മെയ്ഡൻ ഓവറോടെയാണ് ഇന്നിങ്സ് തുടങ്ങിയത്. പിന്നീട് ഇന്നിങ്സിലെ നാലാം ഓവറിൽ ജേക്കബ് ഡഫിയുടെ പന്തിൽ വലിയ സിക്സറിന് ശ്രമിച്ച സഞ്ജുവിനെ ഗ്ലെൻ ഫിലിപ്സ് ക്യാച്ചെടുത്തു പുറത്താക്കുകയായിരുന്നു.
ആദ്യ മത്സരത്തിൽ 67 റൺസ് നേടി മത്സരത്തിലെ താരമായ സഞ്ജുവിൽ നിന്ന് മികച്ചൊരു ഇന്നിങ്സ് പ്രതീക്ഷിച്ചെങ്കിലും രണ്ടാം മത്സരത്തിൽ തുടക്കം പാളുകയായിരുന്നു. പരുക്കേറ്റ ഇഷാൻ കിഷന് പകരം വൈഭവ് സൂര്യവംശി ടീമിലെത്തിയെങ്കിലും, സഞ്ജു-അഭിഷേക് ശർമ ഓപ്പണിങ് ജോഡിയെ മാറ്റേണ്ടെന്ന തീരുമാനത്തിൽ പരിശീലകൻ ഗൗതം ഗംഭീറും ക്യാപ്റ്റൻ ശ്രേയസ് അയ്യരും ഉറച്ചുനിൽക്കുകയായിരുന്നു. ഓപ്പണിങ്ങിൽ ഇരുവരും ചേർന്ന് 40 റൺസാണ് കണ്ടെത്തിയത്. എന്നാൽ മൂന്നാം നമ്പറിലിറങ്ങിയ വൈഭവ് സൂര്യവംശിക്കും തിളങ്ങാനായില്ല. എട്ട് പന്തിൽ നാല് റൺസ് മാത്രമാണ് യുവതാരം നേടിയത്. സഞ്ജുവിന്റെ സമീപകാലത്തെ മികച്ച ഫോം കണക്കിലെടുത്ത് വരും മത്സരങ്ങളിലും ഇതേ ബാറ്റിങ് ക്രമത്തിൽ തന്നെ ഇന്ത്യ മുന്നോട്ട് പോകാനാണ് സാധ്യത.
I only see gambhir saying to Sanju I take care …..
For what pic.twitter.com/tFZe2THkfk
— shanu (@VocalReflect_) October 24, 2026
