ഐപിഎൽ 2026-ൽ ചെന്നൈ സൂപ്പർ കിംഗ്സിനോട് തോറ്റതോടെ അഞ്ച് കളികളിൽ നിന്ന് വെറും ഒരു പോയിന്റുമായി കെകെആർ പോയിന്റ് പട്ടികയിൽ ഏറ്റവും അവസാന സ്ഥാനത്താണ്. ഈ ദയനീയ അവസ്ഥയ്ക്ക് പിന്നാലെയാണ് കെകെആർ മാനേജ്മെന്റിന്റെ തീരുമാനങ്ങളെ ചോദ്യം ചെയ്ത് മുഹമ്മദ് കൈഫ് രംഗത്തെത്തിയത്.
ലേലത്തിൽ 25.20 കോടി രൂപ മുടക്കി കെകെആർ സ്വന്തമാക്കിയ ഓസ്ട്രേലിയൻ താരം കാമറൂൺ ഗ്രീനിന്റെ പ്രകടനത്തെ കൈഫ് നിശിതമായി വിമർശിച്ചു. സിഎസ്കെയ്ക്കെതിരായ മത്സരത്തിൽ ആദ്യ പന്തിൽ തന്നെ പുറത്തായ ഗ്രീൻ, ബൗളിംഗിൽ 2 ഓവറിൽ 30 റൺസ് വഴങ്ങുകയും ചെയ്തിരുന്നു.
“കാമറൂൺ ഗ്രീനിനെ നോക്കൂ, അവനെ വാങ്ങിയത് 25.2 കോടി രൂപയ്ക്കാണ്. അഞ്ച് മത്സരങ്ങൾ കളിച്ച അവന് ബാറ്റിംഗിലും തിളങ്ങാനായില്ല. തുടക്കത്തിൽ അവൻ ബൗൾ ചെയ്തിരുന്നില്ല. ലഖ്നൗവിനെതിരായ മത്സരത്തിൽ അവൻ പന്തെറിയാൻ വന്നു, ആദ്യ മത്സരം കളിക്കുന്ന മുകുൾ ചൗധരി ഗ്രീനിനെ അടിച്ചുപറത്തിയാണ് കളി മാറ്റിയത്. ഇന്നലെയും 2 ഓവറിൽ 30 റൺസ് വിട്ടുകൊടുത്തു. അവൻ തീർത്തും പരാജയമാണ്,” കൈഫ് തന്റെ യൂട്യൂബ് ചാനലിൽ പറഞ്ഞു. 5 കളികളിൽ നിന്ന് വെറും 56 റൺസും ഒരു വിക്കറ്റും മാത്രമാണ് ഗ്രീനിന്റെ സമ്പാദ്യം.
ടീമിന്റെ നിലവിലെ പവർ കോച്ചും കെകെആർ ഇതിഹാസവുമായ ആന്ദ്രെ റസ്സലിനെ പ്ലേയിങ് ഇലവനിൽ ഉൾപ്പെടുത്തണമെന്നാണ് കൈഫിന്റെ ഏറ്റവും വലിയ നിർദ്ദേശം. “ഞാൻ പറയുന്നത് ഇതാണ്, ആന്ദ്രെ റസ്സലിനെപ്പോലൊരു താരത്തിന് ഒറ്റക്കാലിൽ നിൽക്കാൻ കഴിയുമെങ്കിൽ പോലും നിങ്ങൾ അവനെ കളിപ്പിക്കണം. അവൻ ഡഗ്ഔട്ടിൽ ഇരിക്കുന്നത് കാണുന്നത് തന്നെ എതിർ ടീമിന് വലിയ സമ്മർദ്ദമാണ്. ടീമിന് അവന്റെ സാന്നിധ്യം എത്രത്തോളം ആവശ്യമാണെന്ന് ഇപ്പോൾ വ്യക്തമാണ്,” അദ്ദേഹം വ്യക്തമാക്കി.
ഐപിഎൽ 2026 ലേലത്തിന് മുൻപ് റസ്സലിനെ റിലീസ് ചെയ്ത കെകെആർ, താരം വിരമിച്ചതിന് പിന്നാലെ പവർ കോച്ചായി നിയമിക്കുകയായിരുന്നു. എന്നാൽ ഇതിന് പിന്നിലെ തന്ത്രം കൈഫ് പൊളിച്ചടുക്കി. “റസ്സലിനെ അവർ പൂർണ്ണമായും ഒഴിവാക്കിയതുമില്ല, കളിപ്പിക്കുന്നുമില്ല. ഡഗ്ഔട്ടിൽ പാഡ് കെട്ടി ബാറ്റ് വീശി അടുത്തതായി താൻ ഇറങ്ങുമെന്ന രീതിയിൽ റസ്സൽ ഇരിക്കുമ്പോൾ തന്നെ ബൗളർമാർക്ക് ഭയമാണ്. ലേലത്തിൽ അവനെ മറ്റേതെങ്കിലും ഫ്രാഞ്ചൈസി സ്വന്തമാക്കിയാൽ തങ്ങൾക്ക് പണികിട്ടുമെന്ന് കെകെആറിന് നന്നായി അറിയാമായിരുന്നു. അതുകൊണ്ടാണ് അവനെ കോച്ചാക്കി കൂടെ നിർത്തിയത്,” കൈഫ് ആരോപിച്ചു.
37 വയസ്സായെങ്കിലും ലോകമെമ്പാടുമുള്ള ഫ്രാഞ്ചൈസി ലീഗുകളിൽ ഇപ്പോഴും ഏറ്റവും കൂടുതൽ ഡിമാൻഡുള്ള താരമാണ് റസ്സലെന്നും കൈഫ് കൂട്ടിച്ചേർത്തു. ഐപിഎല്ലിൽ 140 മത്സരങ്ങളിൽ നിന്ന് 2,651 റൺസും 123 വിക്കറ്റുകളും റസ്സൽ സ്വന്തമാക്കിയിട്ടുണ്ട്.
