കണ്ണൂർ : പയ്യന്നൂരിലെ മുതിർന്ന നേതാവും ബ്രാഞ്ച് അംഗവും ഖാദി ബോർഡ് മുൻ വൈസ് ചെയർമാനുമായ ടി. പുരുഷോത്തമനെ പുറത്താക്കി സിപിഎം. രക്തസാക്ഷി ഫണ്ട് ക്രമക്കേട് പുറത്തുകൊണ്ടുവന്ന മുൻ ഏരിയ സെക്രട്ടറി വി. കുഞ്ഞികൃഷ്ണൻ രചിച്ച പുസ്തകത്തിന്റെ പ്രകാശന ചടങ്ങിൽ പങ്കെടുത്തതാണ് പുരുഷോത്തമനെതിരെയുള്ള അടിയന്തര നടപടിക്ക് കാരണമായത്.
പാർട്ടി വിലക്ക് ലംഘിച്ച് വി. കുഞ്ഞികൃഷ്ണന്റെ പുസ്തക പ്രകാശനത്തിൽ പങ്കെടുത്തത് ഗുരുതരമായ അച്ചടക്കലംഘനമാണെന്ന് സിപിഎം വിലയിരുത്തി. പാർട്ടിയെ പ്രതിരോധത്തിലാക്കിയ ഒരു വ്യക്തിയുടെ സമാന്തര പരിപാടിയിൽ മുതിർന്ന നേതാവ് പങ്കെടുത്തത് പ്രവർത്തകർക്കിടയിൽ തെറ്റായ സന്ദേശം നൽകുമെന്നാണ് പാർട്ടി വ്യക്തമാക്കുന്നത്. പയ്യന്നൂർ ഏരിയ കമ്മിറ്റിയുടെ ശുപാർശ പ്രകാരം ജില്ലാ കമ്മിറ്റിയാണ് നടപടിക്ക് അംഗീകാരം നൽകിയത്.
പയ്യന്നൂരിലെ സിപിഎമ്മിന്റെ കരുത്തുറ്റ മുഖങ്ങളിൽ ഒരാളായിരുന്നു ടി പുരുഷോത്തമൻ. സാംസ്കാരിക രംഗത്തും സജീവ സാന്നിധ്യമായിരുന്നു. നേരത്തെ പയ്യന്നൂർ തിരഞ്ഞെടുപ്പ് ഫണ്ട്, കെട്ടിട നിർമ്മാണ ഫണ്ട് എന്നിവയിൽ ക്രമക്കേട് നടന്നുവെന്ന് പരാതിപ്പെട്ടതിനെത്തുടർന്നാണ് വി. കുഞ്ഞികൃഷ്ണനെ ഏരിയ സെക്രട്ടറി സ്ഥാനത്ത് നിന്നും പുറത്താക്കിയിരുന്നത്.
