ടി20 ക്രിക്കറ്റ് ചരിത്രത്തിൽ സഞ്ജു സാംസൺ എന്ന പേര് സുവർണ്ണാക്ഷരങ്ങളാൽ എഴുതപ്പെടുകയാണ്. മുംബൈ ഇന്ത്യൻസിനെതിരെ വാംഖഡെയിൽ നേടിയ മിന്നൽ സെഞ്ച്വറിയോടെ ടി20യിൽ ഏറ്റവും കൂടുതൽ സെഞ്ച്വറികൾ നേടുന്ന ഇന്ത്യൻ ബാർറ്റർമാരിൽ സഞ്ജു സംഹാാരതാണ്ഡവം തുടരുന്നു. 8 സെഞ്ച്വറികളുമായി രോഹിത് ശർമ്മയെ മറികടന്ന സഞ്ജു, ഇപ്പോൾ വിരാട് കോഹ്ലിക്കും അഭിഷേക് ശർമ്മയ്ക്കും തൊട്ടുപിന്നാലെയുണ്ട്.
9 സെഞ്ച്വറികൾ വീതം നേടി വിരാട് കോഹ്ലിയും അഭിഷേക് ശർമ്മയും ഒന്നാം സ്ഥാനം പങ്കിടുമ്പോൾ, തൊട്ടുപിന്നാലെ 8 സെഞ്ച്വറികളുമായി സഞ്ജു സാംസൺ തന്റെ സ്ഥാനം ഉറപ്പിച്ചു കഴിഞ്ഞു. ഇന്ത്യൻ ക്രിക്കറ്റിലെ ഇതിഹാസമായ രോഹിത് ശർമ്മയുടെ റെക്കോർഡിന് ഒപ്പമെത്തിയ സഞ്ജു, നിലവിലെ തലമുറയിലെ ഏറ്റവും അപകടകാരിയായ ബാറ്റർമാരിൽ ഒരാളാണെന്ന് വീണ്ടും തെളിയിച്ചിരിക്കുകയാണ്.
ഐപിഎൽ 2026 സീസണിൽ ചെന്നൈ സൂപ്പർ കിംഗ്സ് എന്ന വമ്പൻ ടീമിന്റെ സകല പ്രതീക്ഷകളും സഞ്ജുവിന്റെ തോളിലായിരുന്നു. ടീമിന്റെ ബാറ്റിംഗ് ഡിപ്പാർട്ട്മെന്റിലെ എല്ലാ പ്രധാന റെക്കോർഡുകളും ഇപ്പോൾ സഞ്ജുവിന് മുന്നിൽ വഴിമാറുകയാണ്. ഈ സീസണിൽ ചെന്നൈയ്ക്കായി ഏറ്റവും കൂടുതൽ റൺസ് നേടിയതും ഉയർന്ന വ്യക്തിഗത സ്കോർ കുറിച്ചതും സഞ്ജു സാംസണാണ്. കേവലം റൺസ് നേടുക മാത്രമല്ല, ടീമിലെ ഏറ്റവും മികച്ച ബാറ്റിംഗ് ശരാശരിയും സ്ട്രൈക്ക് റേറ്റും നിലനിർത്തുന്നതും ഈ മലയാളി താരം തന്നെയാണ്.
ചെന്നൈ ടീമിലെ മറ്റ് വമ്പൻ താരങ്ങളെപ്പോലും നിഷ്പ്രഭമാക്കുന്ന പ്രകടനമാണ് സഞ്ജു കാഴ്ചവെക്കുന്നത്. സീസണിൽ ഏറ്റവുമധികം സെഞ്ച്വറികൾ നേടിയ താരം എന്നതിന് പുറമെ, ടീമിനായി ഏറ്റവും കൂടുതൽ ഫോറുകളും സിക്സറുകളും പറത്തിയതും സഞ്ജു തന്നെയാണ്. ഓരോ ഇന്നിംഗ്സിലും സഞ്ജു പുലർത്തുന്ന ആധിപത്യം അദ്ദേഹത്തെ ഈ തലമുറയിലെ ടി20 സ്പെഷ്യലിസ്റ്റ് ബാറ്റർമാരുടെ പട്ടികയിൽ അഗ്രഗണ്യനാക്കുന്നു. മഞ്ഞക്കുപ്പായത്തിൽ സഞ്ജു നടത്തുന്ന ഈ വേട്ട വരാനിരിക്കുന്ന ലോകകപ്പ് അടക്കമുള്ള ടൂർണമെന്റുകളിൽ സഞ്ജുവിന്റെ സ്ഥാനം ഉറപ്പിക്കുന്നതാണ്.
