ഭാരതത്തിന്റെ ‘ക്രിക്കറ്റ് ദൈവം’ സച്ചിൻ ടെണ്ടുൽക്കർക്ക് ഇന്ന് 53-ാം ജന്മദിനം. സച്ചിന്റെ ബാല്യകാല സുഹൃത്തും മുൻ ഇന്ത്യൻ താരവുമായ വിനോദ് കാംബ്ലി സച്ചിന് നേർന്ന വ്യത്യസ്തമായ ആശംസ സോഷ്യൽ മീഡിയയിൽ വൈറലായിരിക്കുകയാണ്. തങ്ങൾ ഇരുവരും ക്രിക്കറ്റ് അഭ്യസിച്ച മുംബൈയിലെ ശിവാജി പാർക്കിൽ കുട്ടികൾക്കൊപ്പമിരുന്നാണ് കാംബ്ലി തന്റെ പ്രിയ സുഹൃത്തിന് ജന്മദിനാശംസകൾ നേർന്നത്.
ഒരു പരസ്യചിത്രത്തിന്റെ ഭാഗമായി പങ്കുവെച്ച വീഡിയോയിൽ “ഏയ് പാർട്ണർ, ഇന്ന് നമുക്ക് ആഘോഷിക്കണം. ഹാപ്പി ബർത്ത്ഡേ പാർട്ണർ” എന്ന് കാംബ്ലി പറയുന്നത് കേൾക്കാം. സച്ചിനുമായുള്ള തന്റെ ബന്ധത്തെക്കുറിച്ച് കാംബ്ലി വാചാലനായി. “ഓരോ ഏപ്രിൽ 24-ഉം എനിക്ക് സവിശേഷമാണ്. ശിവാജി പാർക്കിലെ മൈതാനങ്ങളിൽ ഞങ്ങൾ അടക്കിവാണിരുന്ന കാലത്തെ ഓർമ്മകൾ ഇന്നും മായാതെ നിൽക്കുന്നു. സച്ചിനും ഞാനും തമ്മിലുള്ള ആ ബന്ധം ഒരിക്കലും തകർക്കാനാവാത്തതാണ്,” കാംബ്ലി പറഞ്ഞു.
കോച്ച് രമാകാന്ത് അചരേക്കറുടെ കീഴിലാണ് ഇരുവരും ശിവാജി പാർക്കിൽ ക്രിക്കറ്റ് പിച്ചിലെ ആദ്യപാഠങ്ങൾ പഠിച്ചത്. 1973 ഏപ്രിൽ 24-ന് ജനിച്ച സച്ചിൻ ടെണ്ടുൽക്കർ ലോക ക്രിക്കറ്റിലെ ഏറ്റവും മികച്ച ബാറ്ററായാണ് അറിയപ്പെടുന്നത്. അന്താരാഷ്ട്ര ക്രിക്കറ്റിൽ 34,357 റൺസ് നേടിയ സച്ചിൻ ചരിത്രത്തിലെ ഏറ്റവും കൂടുതൽ റൺസ് നേടിയ താരമാണ്. ടെസ്റ്റിലും ഏകദിനത്തിലുമായി 100 സെഞ്ച്വറികൾ നേടിയ ഏക താരമാണ് സച്ചിൻ. കരിയറിലെ 79-ാം ഏകദിനത്തിലാണ് സച്ചിൻ തന്റെ ആദ്യ സെഞ്ച്വറി നേടിയതെന്നത് മറ്റൊരു സവിശേഷത.
ലോകത്ത് ഏറ്റവും കൂടുതൽ ടെസ്റ്റ് മത്സരങ്ങൾ (200) കളിച്ച താരമാണ് സച്ചിൻ. ടെസ്റ്റിൽ മാത്രം 15,921 റൺസും 51 സെഞ്ച്വറികളും അദ്ദേഹത്തിന്റെ പേരിലുണ്ട്. 15,000 ടെസ്റ്റ് റൺസ് എന്ന നാഴികക്കല്ല് ഏറ്റവും വേഗത്തിൽ (300 ഇന്നിംഗ്സ്) പിന്നിട്ട താരവും അദ്ദേഹം തന്നെയാണ്.
